ନୟାଗଡ଼: ଆଜିର ଯୁବପିଢୀ ମଧ୍ୟରେ ଅନଲାଇନ ଗେମକୁ ନେଇ ରହିଛି ବହୁ ଆକର୍ଷଣ। ଯାହା ଅନେକ ସମୟରେ ସେମାନଙ୍କ ପାଇଁ କାଳ ମଧ୍ୟ ସାଜୁଥିବାର ନଜିର ରହିଛି।
ପୂର୍ବରୁ ଅନଲାଇନ ଗେମ ଯୋଗୁଁ ବହୁ ନିରୀହ ଜୀବନ ଯାଇଥିବା ବେଳେ ଆଜି ପୁନଃ ଏହାର ପୁନରାବୃତ୍ତି ଘଟିଛି ନୟାଗଡ଼ ଜିଲ୍ଲା ରଣପୁର ବ୍ଲକ୍ ଅନ୍ତର୍ଗତ ପଥରପୁଞ୍ଜି ଗାଁରେ । ଅନଲାଇନ୍ ଖେଳରେ ହାରିଯିବାରୁ ଜଣେ ଯୁବକ ଆତ୍ମହତ୍ୟା କରିଥିବା ଜଣାପଡିଛି।
ଏହି ଗ୍ରାମର ନିରଞ୍ଜନ ଷଡ଼ଙ୍ଗୀଙ୍କ ପୁଅ ମନୋରଞ୍ଜନ ଷଡ଼ଙ୍ଗୀ । ବୟସ ୧୯ ବର୍ଷ। ମନୋରଞ୍ଜନ ଫ୍ରି-ଫାୟାର ନାମକ ଏକ ଅନଲାଇନ ଗେମର ଅଭ୍ୟାସରେ ପଡିଯାଇଥିଲେ। ମନୋରଞ୍ଜନ ଏହି ଖେଳରେ ମସଗୁଲ ହୋଇ ଖାଇବା ପିଇବା ଭୁଲି ଯାଉଥିବା ତାଙ୍କ ଘରଲୋକେ କହିଛନ୍ତି। ନାଟର କିଛିଦିନ ହେଲା ସେ ଖେଳରେ ହାରିଯାଉଥିବାରୁ ସବୁ ସମୟରେ ନିରାଶ ଚିନ୍ତାରେ ରହିଥିବା କହିଛନ୍ତି ପରିବାର ଲୋକେ।
ପୁଅର ଏଭଳି ଆଚରଣକୁ ଘର ଲୋକେ ଏତେ ଗୁରୁତ୍ୱର ସହ ନେଇ ନଥିବା ବେଳେ ଶୁକ୍ରବାର ସନ୍ଧ୍ୟାରେ ନିକଟତମ ଜଙ୍ଗଲରେ କୀଟନାଶକ ପିଇ ଆତ୍ମହତ୍ୟା ଉଦ୍ୟମ କରିଥିଲେ ମନୋରଞ୍ଜନ। ମାତ୍ର ସେଠାରେ ସେ ଛାତି ଓ ପେଟରେ ମାତ୍ରାଧିକ କଷ୍ଟ ଅନୁଭବ କରିବାରୁ କୌଣସିମତେ ଘରକୁ ପଳେଇ ଆସିଥିଲେ। ପୁଅର ଏଭଳି ଅବସ୍ଥା ଦେଖି ଘର ଲୋକେ ପ୍ରଥମେ ରଣପୁର ହସ୍ପିଟାଲ୍ ଓ ପରେ ଭୁବନେଶ୍ବର ନେଇଯାଇଥିଲେ। ମାତ୍ର ଚିକିତ୍ସାଧୀନ ଅବସ୍ଥାରେ ରବିବାର ଦିନ ମନୋରଞ୍ଜନଙ୍କର ମୃତ୍ୟୁ ଘଟିଛି।
Comments are closed.