ଆଜିଠୁ ଛତିଶଗଡ଼ ସୀମାନ୍ତ ଓଡ଼ିଶାର ୧୦ ଜିଲ୍ଲାରେ ନାଇଟ୍ କର୍ଫ୍ୟୁ, ରାତି ୧୦ରୁ ସକାଳ ୫ଟା କଟକଣା

ନୂଆଦିଲ୍ଲୀ: ଛତିଶଗଡ଼ରେ କାୟା ବିସ୍ତାର କରୁଛି କରୋନା । ଏପଟେ ଓଡ଼ିଶାରେ ସୀମାନ୍ତବର୍ତ୍ତୀ ଜିଲ୍ଲାରେ ଦୈନିକ ସଂକ୍ରମଣ ବଢୁଛି । ମୁକାବିଲା ପାଇଁ ଆଜିଠୁ ଛତିଶଗଡ଼ ସୀମାନ୍ତ ପଶ୍ଚିମ ଓ ଦକ୍ଷିଣ ଓଡ଼ିଶାର ୧୦ ଜିଲ୍ଲାରେ ଲାଗୁ ହେବ ୭ ଘଣ୍ଟିଆ ନାଇଟକର୍ଫ୍ୟୁ । ଏସବୁ ଜିଲ୍ଲାଗୁଡ଼ିକ ହେଲା ସୁନ୍ଦରଗଡ଼ , ଝାରସୁଗୁଡ଼ା, ସମ୍ବଲପୁର, ବରଗଡ଼, ବଲାଙ୍ଗିର, ନୂଆପଡ଼ା, କଳାହାଣ୍ଡି, ନବରଙ୍ଗପୁର, କୋରାପୁଟ ଓ ମାଲକାନଗିରି । ରାତି ୧୦ଟାରୁ ସକାଳ ୫ଟା ଯାଏ ରାତ୍ରିକାଳୀନ କର୍ଫ୍ୟୁ ଅନ୍ୟାଦେଶ ଯାଏ ବଳବତ୍ତର ରହିବ ।

କ’ଣ ବନ୍ଦ
ନାଇଟ୍ କର୍ଫ୍ୟୁ ସମୟରେ ବନ୍ଦ ରହିବ ସମସ୍ତ ଦୋକାନ ବଜାର, ବ୍ୟବସାୟିକ ପ୍ରତିଷ୍ଠାନ ଓ କାର୍ୟ୍ୟାଳୟ । ଲୋକଙ୍କ ବୁଲାବୁଲି ଉପରେ କଟକଣା ଲାଗିବ । ଜରୁରୀ କାମ ନଥିଲେ ରାତି ୧୦ଟା ପରେ ବୁଲାବୁଲି ମନା । କାମ ନଥାଇ ଘରୁ ବାହାରିଲେ ମାମଲା ରୁଜୁ ହେବ । ନିର୍ଦ୍ଦେଶର ଉଲ୍ଲଂଘନ କଲେ କଠୋର କାର୍ଯ୍ୟାନୁଷ୍ଠାନ ହେବ ।
କ’ଣ ଖୋଲା
ନାଇଟ୍ କର୍ଫ୍ୟୁ ବେଳେ ଜରୁରିକାଳୀନ ସେବାକୁ ବାଦ ଦିଆଯିବ । ମେଡିକାଲ୍ କିମ୍ବା ଅନ୍ୟ କୌଣସି ଜରୁରିକାଳୀନ କାମରେ ଯାଆସ କରିପାରିବେ । ସ୍ୱାସ୍ଥ୍ୟସେବା ଓ ଆମ୍ବୁଲାନ୍ସ ସେବା ଜାରି ରହିବ । ପେଟ୍ରୋଲ ପମ୍ପ, ସିଏନଜି ସେଣ୍ଟର ଖୋଲା ରହିବ । ଶିଳ୍ପ ପ୍ରତିଷ୍ଠାନ ଉପରେ କଟକଣା ନାହିଁ । ନିର୍ମାଣ କାମ ଚାଲୁ ରହିବ । ହୋମ୍ ଡେଲିଭରି ଉପରେ ନାହିଁ କଟକଣା । ବିଦ୍ୟୁତ, ଅଗ୍ନିଶମ, ଜଳ ଯୋଗାଣ, ରେଲଓ୍ୱେ ଓ ଏୟାରପୋର୍ଟ କର୍ମଚାରୀ ଯାଆସ କରି ପାରିବେ ।