ଭୁବନେଶ୍ୱର: ଖର୍ଚ୍ଚକାଟ ତଥା ସ୍ୱଳ୍ପ ମାନବ ସମ୍ବଳକୁ ଦୃଷ୍ଟିରେ ପୂର୍ବତଟ ରେଳପଥ ପକ୍ଷରୁ ତିନୋଟି ଟ୍ରେନର ମିଶ୍ରଣରେ ଏକକାଳୀନ ୨,୦୦୦ ମିଟର ଲମ୍ବର ଟ୍ରେନକୁ ପରୀକ୍ଷାମୂଳକ ଭାବେ ଚାଳିତ କରିଛନ୍ତି ।
ପରୀକ୍ଷାମୂଳକ ଭାବେ ରେଳ ଟ୍ରାକରେ ଗଡ଼ିଥିବା ଏହି ଟ୍ରେନର ଲମ୍ବ ହେଉଛି ୨,୦୦୦ ମିଟର ।
“ଏହି ଟ୍ରେନଟି ୧୪୭ଟି ୱାଗନ, ୩ଟି ବ୍ରେକ୍ / ଗାର୍ଡ଼ ଭ୍ୟାନ ସହିତ ୪ଟି ଇଞ୍ଜିନ୍ ସଂଯୋଗ ହୋଇ ପରୀକ୍ଷାମୂଳକ ଭାବେ ସମ୍ବଲପୁର ରେଳ ଡ଼ିଭିଜନ ଅନ୍ତର୍ଗତ ଗୋଡ଼ଭାଙ୍ଗ ଓ ବଲାଙ୍ଗୀର ଷ୍ଟେସନ ମଧ୍ୟରେ ଚାଲିବ,” ବୋଲି ପୂର୍ବତଦ ରେଳପଥ ଏକ ବିଜ୍ଞପ୍ତିରେ ପ୍ରକାଶ କରିଛି ।
ଏହି ଲମ୍ବା ଟ୍ରେନର ପରିକଳ୍ପନା କିଛି ବର୍ଷ ପୂର୍ବରୁ ଏକ ପାଇଲଟ୍ ପ୍ରୋଜେକ୍ଟ ଭାବେ ଗ୍ରହଣ କରାଯାଇଥିଲା । ଏହି ଯୋଜନା କାର୍ଯ୍ୟକାରୀ ହୋଇପାରିଲେ ଅନେକ ମାଲବାହୀ ରେଳ ଚଳାଚଳ ଏହି ରୂପେ ଫଳପ୍ରଦ ମଧ୍ୟ ହୋଇପାରିବାର ସମ୍ଭାବନା ରହିଛି ।
ଏହି କ୍ରମରେ ଉତ୍ତର ମଧ୍ୟ ରେଳ ବିଭାଗ ପକ୍ଷରୁ ‘ପାଇଥନ’ ସେବା ଭାବେ ଏବଂ ପଶ୍ଚିମ ରେଳବାଇ ପକ୍ଷରୁ ଏହା ‘ଆନାକୋଣ୍ଡା’ ଭାବେ ଜନାଦୃତି ଲାଭ କରିପାରିଛି ।
ଏହି ଯୋଜନାକୁ ବିଭିନ୍ନ ଦେଶ ଯଥା -ଅଷ୍ଟ୍ରେଲିଆ, ଋଷିଆ ଏବଂ ଯୁକ୍ତରାଷ୍ଟ୍ର ଆମେରିକା କାର୍ଯ୍ୟକାରୀ କରି ରେଳ ଚଳାଚଳରେ ସଫଳ ହୋଇପାରିଛନ୍ତି ।