କଟକ: ଧରାପୃଷ୍ଠକୁ ଅବତରଣ କରିଛନ୍ତି ଜଗତଜନନୀ ମାଆ ଦୁର୍ଗା । ଏଥିପାଇଁ ଚଳଚଞ୍ଚଳ ହୋଇପଡିଛି ସିଲଭର୍ ସିଟି କଟକ । ଆଜି ମାଆଙ୍କ ମହାସପ୍ତମୀ ପୂଜା କରାଯାଇଛି । ସହରର ପ୍ରତ୍ୟକଟି ମଣ୍ଡପରେ ମାଆଙ୍କୁ ସ୍ୱତନ୍ତ୍ର ରୀତିନୀତିରେ ପୂଜାର୍ଚ୍ଚନା କରାଯାଇଛି । ଗତକାଲି ବିଲ୍ୱବରଣ ହେବା ପରେ ମହାନଦୀରୁ ଜଳ ଆଣି ବିଧି ଅନୁସାରେ ପୂଜା କରାଯାଉଛି । 
ଏସବୁ ପୂଜା ପରେ ମାଆଙ୍କ ଚକ୍ଷୁଦାନ କରାଯାଇ ମହାସପ୍ତମୀ ପୂଜା ଅନୁଷ୍ଠିତ ହୋଇଛି । ମଣ୍ଡପ ଗୁଡିକରେ ସେଭଳି କାର୍ଯ୍ୟକ୍ରମ ନ ଥିଲେ ବି କୋଭିଡ୍ କଟକଣା ମଧ୍ୟରେ ପୂଜା କରାଯାଇଛି ।
ପୂଜା ମଣ୍ଡପରେ ମାଆଙ୍କୁ ସ୍ୱତନ୍ତ୍ର ବିଧି ଅନୁସାରେ ପୂଜା କରାଯାଇଛି । ଆଉ ଆଜି ମହାସପ୍ତମୀ ଠାରୁ ହିଁ ପୂଜା ମଣ୍ଡପମାନଙ୍କରେ ମାଆ ଙ୍କ ପୂଜା ଆରମ୍ଭ କରାଯାଇଛି । କୋଭିଡ୍ କଟକଣା ପାଇଁ ଏବର୍ଷ କୌଣସି ପ୍ରକାର ଜନଗହଳି ଦେଖାଯାଇନାହିଁ । ଅନ୍ୟପଟେ ସହରର ବିଦ୍ୟାଧରପୁର, ଚାଉଳିଆଗଞ୍ଜ, ଖାନନଗର, ରାଣୀହାଟ,ମଙ୍ଗଳାବାଗ ଆଦି ମଣ୍ଡପରେ ମହାସପ୍ତମୀ ପୂଜା ଅନୁଷ୍ଠିତ ହୋଇଛି ।
ମଣ୍ଡପଗୁଡିକରେ ସାମ୍ନା ପଟୁ ପରଦା ଟଣାଯାଇ ଭିତରେ ପୂଜା କରାଯାଇଥିବା ବେଳେ କୌଣସି ଭକ୍ତଙ୍କୁ ଭିତରକୂ ଦର୍ଶନ କରିବାକୁ ଛଡାଯାଇ ନ ଥିଲା। ସେହିପରି ଜଣେ କର୍ତ୍ତା ଏବଂ ୪ ଜଣ ପୂଜକଙ୍କୁ ନେଇ ପୂଜା କରାଯାଇଥିଲା। ଆଉ ସରକାର କରିଥିବା ଏସ୍ଓପି କୁ ପାଳନ କରାଯାଇଥିବା କହିଛନ୍ତି କମିଟିର କର୍ମକର୍ତ୍ତାମାନେ।
ଆସନ୍ତାକାଲି ମହାଅଷ୍ଟମୀ ବିହୀତ ପୂଜା ଥିବାରୁ ମଣ୍ଡପରେ ଭିଡ ନ କରି ମହିଳା ଭକ୍ତଙ୍କୁ ଅଷ୍ଟମୀ ବ୍ରତ ଦିଆଯିବାକୁ ବ୍ୟବସ୍ଥା ହୋଇଛି ବୋଲି କମିଟି ପକ୍ଷରୁ କୁହାଯାଇଛି। ମଣ୍ଡପ ମାନଙ୍କରେ ଦଶହରାକୁ ନେଇ କଟକ ନିଜର ସ୍ୱତନ୍ତ୍ର ପରିଚୟ ସୃଷ୍ଟି କରୁଥିବାରୁ କୋଭିଡ୍ କଟଣା ନିଶ୍ଚିତରୁପେ ଦଶହରାକୁ ଫିକା କରିଛି।
