ପଶ୍ଚିମ ଭାରତକୁ ତୀର୍ଥଯାତ୍ରୀଙ୍କ ପାଇଁ ସ୍ବତନ୍ତ୍ର ପର୍ଯ୍ୟଟକ ଟ୍ରେନ

ଭୁବନେଶ୍ବର : ପଶ୍ଚିମ ଭାରତକୁ ତୀର୍ଥଯାତ୍ରୀଙ୍କ ପାଇଁ ଚାଲିବ ସ୍ବତନ୍ତ୍ର ପର୍ଯ୍ୟଟକ ଟ୍ରେନ । ଭାରତୀୟ ରେଳବାଇ କ୍ୟାଟରିଂ ଆଣ୍ଡ ଟୁରିଜିମ କର୍ପୋରେସନ ବା (IRCTC) ପକ୍ଷରୁ କରାଯାଇଛି ସ୍ବତନ୍ତ୍ର ପର୍ଯ୍ୟଟନ ପ୍ୟାକେଜ୍ । ଏହି ପ୍ୟାକେଜ୍ ଦ୍ବାରା ସାଧାରଣ ଲୋକ ଗୁଜୁରାଟର ଗୁରୁତ୍ବପୂର୍ଣ୍ଣ ଧାର୍ମିକ ଏବଂ ପର୍ଯ୍ୟଟନ ସ୍ଥାନ ଗୁଡିକ ଅତି ସୁଲଭ ମୂଲ୍ୟରେ ପରିଦର୍ଶନ କରିବା ପାଇଁ ସୁଯୋଗ ରହିଛି ।

ବାରାଣାସୀ, ଗୟା ଏବଂ ପ୍ରୟାଗରାଜ ଆଡକୁ ପ୍ରଥମ ତୀର୍ଥଯାତ୍ରୀ ସ୍ବତନ୍ତ୍ର ପର୍ଯ୍ୟଟନ ଟ୍ରେନର ସଫଳତା ପରେ ଦ୍ବିତୀୟ ତୀର୍ଥଯାତ୍ରୀ ସ୍ବତନ୍ତ୍ର ପର୍ଯ୍ୟଟନ ଟ୍ରେନ୍ ନଭେମ୍ବର ମାସ ଶେଷ ସପ୍ତାହରେ ଦ୍ବାରକା, ସୋମନାଥ ମନ୍ଦିର, ନାଗେଶ୍ବର, ବେଟ୍ ଦ୍ବାରକା, ଅହମ୍ମଦାବାଦ ଏବଂ ଷ୍ଟାଚ୍ୟୁ ଅଫ୍ ୟୁନିଟିକୁ ଭ୍ରମଣ କରାଇବ । ଏହି ତୀର୍ଥଯାତ୍ରୀ ସ୍ବତନ୍ତ୍ର ପର୍ଯ୍ୟଟନ ଟ୍ରେନ୍ ବିଜୟୱାଡା ଠାରୁ ୨୮ ନଭେମ୍ବରରୁ ଯାତ୍ରା ପ୍ରାରମ୍ଭ ଏବଂ ୮ ଡିସେମ୍ବର ୨୦୨୧ରେ ଯାତ୍ରା ଶେଷ ହେବ । ଏହି ଟ୍ରେନ୍ ବ୍ରହ୍ମପୁର, ଖୋର୍ଦ୍ଧା ରୋଡ୍, ଭୁବନେଶ୍ବର, କଟକ, ତାଳଚେର ରୋଡ୍, ଅନୁଗୁଳ, ସମ୍ବଲପୁର ଏବଂ ଝାରସୁଗୁଡାରେ ରହଣୀ କରିବ ।

ଷ୍ଟାଚ୍ୟୁ ଅଫ୍ ୟୁନିଟି, ଦ୍ୱାରକାଧିଶ ମନ୍ଦିର, ନାଗେଶ୍ବର ଜ୍ୟୋତିର୍ଲିଙ୍ଗ, ସୋମନାଥ ଜ୍ୟୋତିର୍ଲିଙ୍ଗ, କୀର୍ତ୍ତୀ ମନ୍ଦିର, ଅକ୍ଷ୍ୟରଧାମ ମନ୍ଦିର ପରି ପର୍ଯ୍ୟଟନ ତଥା ଧାର୍ମିକ ଗନ୍ତବ୍ୟ ସ୍ଥାନ ଏହି ପ୍ୟାକେଜରେ ସ୍ଥାନ ପାଇଛି । ପ୍ରତ୍ୟେକ ବ୍ୟକ୍ତିଙ୍କ ପାଇଁ ପ୍ୟାକେଜ୍ ମୂଲ୍ୟ ଷ୍ଟାଣ୍ଡାର୍ଡ ପ୍ୟାକେଜ୍ (ସ୍ଲିପର୍ କ୍ଲାସ୍)ରେ ୧୦ ହଜାର ୪୦୦ ଟଙ୍କା ଏବଂ ଆରାମଦାୟକ ପ୍ୟାକେଜ୍ (AC-3 Tier)ରେ ୧୭୩୩୦ ଟଙ୍କା ହେବ । ଏହି ପ୍ୟାକେଜରେ ରାତ୍ରି ରହଣି (ସ୍ଲିପର ଶ୍ରେଣୀ ପାଇଁ ଛାତ୍ରାବାସ ଏବଂ AC-3 Tier ପାଇଁ 3 ତାରକା ହୋଟେଲ), ଦର୍ଶନୀୟ ସ୍ଥାନ, ଜଳଖିଆ ଏବଂ ଶାକାହାରୀ ରାତ୍ରୀ ଭୋଜନ / ମଧ୍ୟାହ୍ନ ଭୋଜନ, ଟୁର୍ ଏସକର୍ଟ ଏବଂ ସୁରକ୍ଷା ବ୍ୟବସ୍ଥା, ଭ୍ରମଣ ବୀମା ଏବଂ ପାର୍କିଂ ଓ ଟୋଲ୍ ଚାର୍ଜ ଇତ୍ୟାଦି ଅନ୍ତର୍ଭୁକ୍ତ ।

ଏହି ଅଞ୍ଚଳର ଯାତ୍ରୀମାନେ ଗୁଜୁରାଟର ଧାର୍ମିକ ଓ ପର୍ଯ୍ୟଟନ ସ୍ଥାନକୁ ଓଡ଼ିଶାର ବିଭିନ୍ନ ରହଣୀ ଷ୍ଟେସନ ଗୁଡିକ ଠାରୁ ଉପରୋକ୍ତ ପର୍ଯ୍ୟଟକ ପ୍ୟାକେଜ୍ ଦ୍ବାରା ପରିଦର୍ଶନ କରିବାର ଲାଭ ପାଇପାରିବେ । ଏହା ବ୍ୟତୀତ ଭୁବନେଶ୍ବରରେ ଥିବା ଆଇଆରସିଟିସି ଆଞ୍ଚଳିକ କାର୍ଯ୍ୟାଳୟ ମଧ୍ୟ କାଶ୍ମୀର, ଆସାମ, ମେଘାଳୟ, ରାଜସ୍ଥାନ, ମଧ୍ୟପ୍ରଦେଶ, ହିମାଚଳ ପ୍ରଦେଶ ଏବଂ ଦକ୍ଷିଣ ଭାରତର ରାମେଶ୍ବରମ୍, ମଦୁରାଇ, କନ୍ୟାକୁମାରୀ ଏବଂ ତ୍ରିଭେନ୍ଦ୍ରମ ଇତ୍ୟାଦି ସ୍ଥାନମାନଙ୍କୁ ସବୁଠାରୁ ଶସ୍ତା ଘରୋଇ ଏୟାର ପ୍ୟାକେଜ୍ ମଧ୍ୟ ପ୍ରଦାନ କରୁଛି । ଯାତ୍ରୀମାନଙ୍କ ଚାହିଦାର ଆବଶ୍ୟକତା ଅନୁଯାୟୀ ଏହି ପ୍ୟାକେଜ୍ ଉପଲବ୍ଧ ହେବ ।