ବଲାଙ୍ଗିର: କଳାହାଣ୍ଡି ମହାଲିଙ୍ଗ ସନସାଇନ୍ ପବ୍ଲିକ ସ୍କୁଲ ଅଧ୍ୟକ୍ଷା ମମିତା ମେହେର ନିଖୋଜ ରହସ୍ୟ ଉପରୁ ଖୁବଶୀଘ୍ର ହଟିପାରେ ପରଦା । ମୁଖ୍ୟ ଅଭିଯୁକ୍ତ ଗୋବିନ୍ଦ ମେହେର ମୁହଁରୁ ସତ ବାହାର କରିଛି ବଲାଙ୍ଗିର ପୋଲିସ । ଗତକାଲି ଗିରଫ ପରେ ଗୋବିନ୍ଦକୁ ସାରା ରାତି ବଲାଙ୍ଗିର ଏସପିଙ୍କ କାର୍ୟ୍ୟାଳୟରେ ଜେରା ହୋଇଛି । ପୂରା ଘଟଣାର ଗୋଟି ଗୋଟି ସତ ତା ପାଖରୁ ବାହାର କରିଥିବା ସୂଚନା ମିଳିଛି । ଆଜି ଗୋବିନ୍ଦକୁ କୋର୍ଟ ଚାଲାଣ କରିବ ପୋଲିସ ।
ଗତ ୮ ତାରିଖରୁ ନିଖୋଜ ଅଛନ୍ତି ମମିତା ମେହେର । ମହାଲିଙ୍ଗ ଯାଉଥିବା ବେଳେ ଅଧାବାଟରେ ଚାନ୍ଦୋତରା ନିକଟରେ ବସରୁ ଓହ୍ଲାଇଥିଲେ । ଗୋବିନ୍ଦ ସାହୁଙ୍କ ସହ କାରରେ ଯାଇଥିବା ଅଭିଯୋଗ ହୋଇଛି । ଭବାନୀପାଟଣାରେ ସପିଂ କରିଥିବା କୁହାଯାଉଛି । ସିସିଟିଭି ଭିଡିଓ ପୋଲିସ ହାତରେ ଲାଗିଥିବା ସୂଚନା ମିଳିଛି । ତାପରଠୁ କୁଆଡ଼େ ଗଲେ ମମିତା ? ତାଙ୍କର ଖୋଜ ଖବର ନଥିବା ବେଳେ ଗୋବିନ୍ଦ ପୋଲିସ ବାରାକୁ ଚମ୍ପଟ ମାରିବା ଘଟଣା ମମିତାଙ୍କ ନିଖୋଜକୁ ଅଧିକ ରହସ୍ୟମୟ କରିଥିଲା ।
ସେପଟେ ଅଟକ ଜେସିବି ଡ୍ରାଇଭର, କଲେଜର ନାଇଟ୍ ଓ୍ୱାଚ୍ ମ୍ୟାନ୍ ଓ କଲେଜ ପ୍ରିନ୍ସିପାଲଙ୍କୁ ବି ପଚରାଉଚରା କରିଛି ପୋଲିସ । ସେମାନଙ୍କୁ ବଲାଙ୍ଗିର ଆଣି ଜେରା କରାଯାଇଥିବା ସୂଚନା ମିଳିଛି । ଏହି ୩ ଜଣଙ୍କ ପାଖରୁ ପୋଲିସ ପାଇଛି ଗୁରୁତ୍ୱପୂର୍ଣ୍ଣ ସୁରାକ । ତଥ୍ୟ ପ୍ରମାଣ ବି ପୋଲିସ ହାତରେ ଲାଗିଛି । ଏବେ ସାଇଣ୍ଟିଫିକ୍ ତଥ୍ୟ ପ୍ରମାଣକୁ ଅପେକ୍ଷା । ତେଣୁ ଖୁବଶୀଘ୍ର ପୋଲିସ ମମିତା ନିଖୋଜ ମିଷ୍ଟ୍ରିର ପର୍ଦ୍ଦାଫାସ କରିବ ଆଶା କରାଯାଉଛି ।
Comments are closed.