ନୂଆଦିଲ୍ଲୀ: ଦେଶରେ ବର୍ତ୍ତମାନ କରୋନା କାୟା କମୁଛି । କିନ୍ତୁ ପଶ୍ଚିମବଙ୍ଗରେ ବଢୁଛି ଦୈନିକ ସଂକ୍ରମିତଙ୍କ ସଂଖ୍ୟା । ଗତ କିଛି ସପ୍ତାହ ହେବ ସଂକ୍ରମିତଙ୍କ ସଂଖ୍ୟା ବଢ଼ିଛି । ଏନେଇ ସତର୍କ କରାଇଛନ୍ତି କେନ୍ଦ୍ର ସରକାର । ପଶ୍ଚିମବଙ୍ଗ ସ୍ୱାସ୍ଥ୍ୟ ସଚିବଙ୍କୁ ଚିଠି ଲେଖିଛନ୍ତି କେନ୍ଦ୍ର ସ୍ୱାସ୍ଥ୍ୟ ସଚିବ ରାଜେଶ ଭୂଷଣ । ଦେଶରେ ସଂକ୍ରମିତଙ୍କ ସଂଖ୍ୟା ହ୍ରାସ ପାଉଥିବା ବେଳେ ପଶ୍ଚିମବଙ୍ଗରେ କେସ୍ ବଢୁଥିବାରୁ ଚିନ୍ତା ବଢ଼ିଛି ।
ଗତ ମାସେ ଭିତରେ ପଶ୍ଚିମବଙ୍ଗରୁ ଚିହ୍ନଟ ହୋଇଛନ୍ତି ୨୦ହଜାର ୯୩୬ ଆକ୍ରାନ୍ତ । ଯାହାକି ଦେଶର ସଂକ୍ରମିତଙ୍କ ସଂଖ୍ୟାର ୩.୪ ପ୍ରତିଶତ । ବିଶେଷ କରି କୋଲକାତାରୁ ଅଧିକ ପଜିଟିଭ୍ କେସ୍ ବାହାରୁଛି । ଅକ୍ଟୋବର ୧୪ରେ ସରିଥିବା ସପ୍ତାହରେ କୋଲକାତାରେ ଦୈନିକ ହାରାହାରି ସଂକ୍ରମିତଙ୍କ ସଂଖ୍ୟା ଥିଲା ୨୧୭ । ୨୧ ତାରିଖରେ ସରିଥିବା ସପ୍ତାହରେ ଏହି ସଂଖ୍ୟା ବଢ଼ି ୨୭୨ ହୋଇଛି ।
ବିଶେଷ କରି ଦଶହରା ପରେ ପଶ୍ଚିମବଙ୍ଗରେ ଅନାଚକ ସଂକ୍ରମିତଙ୍କ ସଂଖ୍ୟା ବଢ଼ିଛି । ଆଗକୁ କୋଭିଡ୍ ଗାଇଡଲାଇନକୁ କଡ଼ାକଡ଼ି ପାଳନ ଉପରେ ଗୁରୁତ୍ୱ ଦେବାକୁ କହିଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ । ଟେଷ୍ଟିଂ, ଟ୍ରାକିଂ, ଟ୍ରେସିଂ ଓ ଟିକାକରଣ ଉପରେ ଫୋକସ କରିବାକୁ କୁହାଯାଇଛି । ଏବେଠାରୁ ପରିସ୍ଥିତି ନିୟନ୍ତ୍ରଣ କରାନଗଲେ ଆଗକୁ ସ୍ୱାସ୍ଥ୍ୟ ଭିତ୍ତିଭୂମି ଉପରେ ଚାପ ସୃଷ୍ଟି ହେବ ବୋଲି ପଶ୍ଚିମବଙ୍ଗକୁ ଚେତାଇ ଦେଇଛି କେନ୍ଦ୍ର ସ୍ୱାସ୍ଥ୍ୟ ମନ୍ତ୍ରାଳୟ।