ରାମସେତୁ ବିବାଦ: ମେକର୍ସ, ଅକ୍ଷୟଙ୍କ ବିରୋଧରେ କେସ କରିବେ ସୁବ୍ରମଣ୍ୟମ ସ୍ୱାମୀ

ମୁମ୍ବାଇ: ଅକ୍ଷୟ କୁମାରଙ୍କ ଆଗାମୀ ଫିଲ୍ମ ରାମସେତୁକୁ ନେଇ ବିବାଦ ବଢ଼ିବାରେ ଲାଗିଛି । ବିଜେପି ନେତା ସୁବ୍ରମଣ୍ୟମ ସ୍ୱାମୀ ଅଭିଯୋଗ କରିଛନ୍ତି ଯେ, ଏହି ଫିଲ୍ମରେ ଭୁଲ ତଥ୍ୟ ପ୍ରଦାନ କରାଯାଇଛି । ଶନିବାର ସେ ମେକର୍ସ ଏବଂ ଅକ୍ଷୟଙ୍କ ବିରୋଧରେ କେସ କରିବେ ବୋଲି ସୋସିଆଲ ସାଇଟରେ ସୂଚନା ଦେଇଛନ୍ତି । ମୋ ଓକିଲ ସତ୍ୟ ସଭରୱାଲ କେସର ଡ୍ରାଫ୍ଟ ପ୍ରସ୍ତୁତ କରି ସାରିଛନ୍ତି, ଏହା କେବଳ ରୁଜୁ ହେବାକୁ ବାକି ରହିଛି । ରାମସେତୁର ଛବିକୁ ଫିଲ୍ମ ମାଧ୍ୟମରେ ତଳେ ପକାଇବା ପାଇଁ ଉଦ୍ୟମ କରାଯାଇଛି ବୋଲି ସ୍ୱାମୀ କହିଛନ୍ତି । ଆଉ ଏକ ଟୁଇଟରେ ସେ ଉଲ୍ଲେଖ କରିଛନ୍ତି, ଅକ୍ଷୟ ଯଦି ଜଣେ ବିଦେଶୀ ନାଗରିକ ହୋଇଥିବେ ତାହାହେଲେ ଆମେ ତାଙ୍କୁ ଗିରଫ କରାଇବା ସହ ଦେଶ ବାହାରକୁ ପଠାଇବା ପାଇଁ ବ୍ୟବସ୍ଥା କରିବୁ । ନିକଟରେ ରାମସେତୁର ଏକ ପୋଷ୍ଟର ରିଲିଜ ହେବା ପରେ ସୋସିଆଲ ସାଇଟରେ ଏହା ଟ୍ରୋଲ ହୋଇଥିଲା । ପୋଷ୍ଟରରେ ଅକ୍ଷୟ ମଶାଲ ଜଳାଇ ରଖିଥିବା ବେଳେ ଫିଲ୍ମର ଅଭିନେତ୍ରୀ ଜ୍ୟାକଲିନ ଫର୍ଣ୍ଣାଣ୍ଡିଜ ଟର୍ଚ୍ଚ ଧରିଥିଲେ । ବିକ୍ରମ ମାଲହୋତ୍ରା ଓ ଅରୁଣା ଭାଟିୟା ଏହାର ପ୍ରଡ୍ୟୁସର ହୋଇଥିବା ବେଳେ ଅଭିଷେକ ଶର୍ମା ନିର୍ଦ୍ଦେଶନା ଦେଇଛନ୍ତି ।