ଯଦି ଆପଣ ଏକ ପଞ୍ଚ ତାରକା କିମ୍ବା ସାତ ତାରକା ହୋଟେଲକୁ ଖାଇବାକୁ ଯାଉଛନ୍ତି, ତେବେ ଆପଣ ବିଲ୍ କେମିତି ଭରନ୍ତି ? ଆପଣ ଭାବୁଥିବେ ଏହା ଏକ ନିର୍ବୋଧ ପ୍ରଶ୍ନ ହୋଇପାରେ । ବିଲ ପାଇଁ ନଗଦ ଟଙ୍କା ଦେବାକୁ ହେବ । ନଚେତ୍ କ୍ରେଡ଼ିଟ୍ କାର୍ଡ଼ , ଡ଼େବିଟ୍ କାର୍ଡ଼ ଅଥବା କ୍ୟୁଆରକୋଡ଼୍ ମାଧ୍ୟମରେ ବିଲ୍ ଦେଇପାରିବେ । ସମସ୍ତେ ତ ଏମିତି ବିଲ୍ ଭରନ୍ତି । କିନ୍ତୁ ଆପଣ ଷ୍ଟାର ହୋଟେଲରେ ଖୁଚୁରା ଦେଇ ବିଲ୍ ଭରିବେ ତାହା କେମିତି ଲାଗିବ । କାହାକୁ କ’ଣ ଲାଗିବ ଭିନ୍ନ କଥା । କିନ୍ତୁ ଜଣେ ଯୁବକ ମୁମ୍ବାଇର ତାଜ ହୋଟେଲରେ ଖାଇବା ପରେ ଖୁଚୁରା ଦେଇ ବିଲ୍ ଭରିଛନ୍ତି, ଯାହାକୁ ନେଇ ସୋସିଆଲ ମିଡ଼ିଆରେ ଚର୍ଚ୍ଚା । ଖୁଚୁରା ବାବଦରେ ନିଜର ଅଭିଜ୍ଞତା ଜାଣିବା ପାଇଁ ଜଣେ ଯୁବକ ଏଭଳି ଖୁଚୁରା ଦେଇଥିଲେ, ଯାହାକୁ ସେ ସୋସିଆଲ ମିଡ଼ିଆରେ ସେୟାର କରିଛନ୍ତି ।
ସିଦ୍ଧେଶ ଲୋକ୍ରେ ନାମକ ଜଣେ ଯୁବକ ମୁମ୍ବାଇର ତାଜ ହୋଟେଲକୁ ରାତ୍ରୀ ଭୋଜନ କରିବାକୁ ଯାଇଥିଲେ । ସେ ନୀଳ ରଙ୍ଗର ସୁଟ୍ ପିନ୍ଧି ତାଜ ହୋଟେଲକୁ ପ୍ରବେଶ କରିଥିଲେ । ଭିତରକୁ ଯାଇ ସେ ଏକ ଟେବୁଲରେ ବସି ମେନୁ ଦେଖି ପିଜା ଅର୍ଡର କରିଥିଲେ । ପିଜା ଖାଇବା ପରେ ବିଲ ଆସିଥିଲା । ବିଲ ଭରିବା ପାଇଁ ବ୍ୟାଗରୁ କିଛି ଖୁଚୁରା ବାହାର କରି ଟେବୁଲ ଉପରେ ରଖି ଗଣିବାକୁ ଆରମ୍ଭ କରିଥିଲେ ସିଦ୍ଧେଶ । ତାଙ୍କର ଏଭଳି ଖୁଚୁରା ଗଣୁଥିବା ଦେଖି ନିକଟରେ ଖାଉଥିବା କିଛି ଗ୍ରାହକ ହସିବା ଆରମ୍ଭ କରିଥିଲେ । ଆଉ କିଛି ଗୁଣୁଗୁଣୁ ହୋଇ ଥଟ୍ଟା ବି କରୁଥିଲେ । ହୋଟେଲ କର୍ମଚାରୀ ଟଙ୍କା ନେବାକୁ ଆସି କିଛି ସମୟ ଆଶ୍ଚର୍ଯ୍ୟ ହୋଇ ଛିଡ଼ା ହୋଇଥିଲେ । ପରେ କିଛି ଉପାୟ ନ ପାଇ ଖୁଚୁରା ତକ ନେଇ ଯାଇଥିଲେ । କିଛି ଦିନ ତଳେ ସିଦ୍ଧେଶ ନିଜେ ଏହି ଭିଡ଼ିଓକୁ ସୋସିଆଲ ମିଡ଼ିଆରେ ସେୟାର କରିଛନ୍ତି । ଏହାକୁ ଏପର୍ଯ୍ୟନ୍ତ ୧.୨୫ ଲକ୍ଷ ଲୋକ ପସନ୍ଦ କରିସାରିଲେଣି ।
Comments are closed.