ଅନୁବାଦ କବିତା : ଏହାଠାରୁ ଅଧିକ

ମୂଳ ବାଂଲା : ସୈୟଦ ଶାମସୁଲ୍ ହକ୍

ଏହାଠାରୁ ବି ଅଧିକ
ଖରାପ ହୋଇ ପାରିଥାନ୍ତା
ମୋର ସମୟ,
ମୋ କବିତା ବି ହୋଇ ପାରିଥାନ୍ତା
ଏହାଠାରୁ ହେୟ।
ଗ୍ରେନେଡ ଦ୍ୱାରା ଛିନ୍ନଛତ୍ର ଓ ରକ୍ତାକ୍ତ
ହୋଇପାରିଥାନ୍ତା
ମୋର ଭାଷା
ବିସ୍ଫୋରଣରେ ଉଡ଼ିଯାଇ ପାରିଥାନ୍ତା
ଶବ୍ଦମାନ ସଙ୍କଳିତ ଥିବା
ମୋର କବିତାର ଖାତା
ବାରୁଦର ତୀବ୍ର ଗନ୍ଧରେ
ଗୋଲାପ ମୃତ ହୋଇ ପାରିଥାନ୍ତା
ଦିନକୁ ଧର୍ଷଣ କରୁଛି ରାତି
ଏହାଠାରୁ ଅଧିକ ଧର୍ଷିତ
ହୋଇ ପାରିଥାନ୍ତା
ଆମର ଆଦାନ ପ୍ରଦାନର ବାର୍ତ୍ତା।

କିନ୍ତୁ ଭାଷା ଏବେବି
ଭାଷା ଭିତରେ ଅଛି
ଆଉ ଗୋଲାପ ବି ଅଛି ଗୋଲାପରେ
ଏବଂ କବିତା କଲମ ମୂନରେ ।

ମାଟି କେବେ ବି ପାଦତଳୁ
ଯାଏନା ଅପସରି
ଭାଷା ଚାଲିଯାଏନା ଜିଭକୁ ଛାଡ଼ି
ଫୁଲରୁ ପଲାଇ ଯାଏନା ସୁବାସ
ଇତିହାସରୁ ଲିଭିଯାଏନା
ବିଜୟର ଉଲ୍ଲାସ।

ବରଂ ଏଇ ବାରୁଦ ଗନ୍ଧ ଯୋଗୁଁ
ଗୋଲାପକୁ
ମନେ ପଡ଼ୁଛି ଅତିଶୟ
ଏଇ ବିସ୍ଫୋରଣ ପାଇଁ
ମୋର ଶବ୍ଦ ସମୂହର
ଆମ ଭାଷାର ବାକ୍ଯ ସମ୍ଭାରରେ
ପାଲଟୁଛି ଅତୁଟ ଓ ଅକ୍ଷୟ
କବିତା ପାଇଁ ଏହାଠାରୁ ଅଧିକ
ଭଲ ସମୟ କାହାକୁ କହିବା?
ଏହାଠାରୁ ଭଲ ବେଳା
ପାଇବକି ଗୋଲାପ ହୃଦୟର
ରକ୍ତିମ ପ୍ରତିଭା?

ଅନୁବାଦ : ମନୋରଞ୍ଜନ ହୋତା