ଏବେ ପ୍ରବଳ ଗ୍ରୀଷ୍ମ ପ୍ରଭାବ ଯୋଗୁ ଚାରିଆଡ଼େ ତାତି ଆଉ ତାତି । ପରିସ୍ଥିତି ଏପରି ହେଉଛି ଯେ, ଘରୁ ବାହାରିବା ଅସମ୍ଭାଳ ହୋଇପଡ଼ୁଛି । ପୂର୍ବାହ୍ନ ୯ଟା ପରେ ରାସ୍ତାଘାଟ ଶୂନ୍ଶାନ୍ ହୋଇପଡ଼ୁଛି । ଅନେକ ସ୍ଥାନରେ ଲୋକଙ୍କର ଅଂଶୁଘାତରେ ମୃତ୍ୟୁ ମଧ୍ୟ ହେଉଛି । ଏଭଳି ସମୟରେ କାମ ନ ଥିଲେ ଘରୁ ବାହାରକୁ ନ ଯିବାକୁ ପରାମର୍ଶ ମଧ୍ୟ ଦିଆଯାଉଛି । ଆଜିକାଲି ଅଧିକାଂଶ ଲୋକ ଘରେ ଏସି କିମ୍ବା କୁଲର ରଖିଛନ୍ତି, ହେଲେ ମାସ ପୁରିଲା ବେଳକୁ ବିଦ୍ୟୁତ୍ ବିଲ୍ ସେମାନଙ୍କୁ ବାଧୁଛି । ଏସବୁଭିତରେ ଏବେ ସୋସିଆଲ ମିଡ଼ିଆରେ ଏମିତି ଏକ ଭିଡ଼ିଓ ଭାଇରାଲ ହେଉଛି, ଯେଉଁଥିରେ ଜଣେ ଯୁବକ ଗରମରୁ ରକ୍ଷା ପାଇବା ପାଇଁ ନୂଆ କୌଶଳ ଆପଣାଇ ଚର୍ଚ୍ଚାକୁ ଆସିଛନ୍ତି ।
ଭାଇରାଲ ଭିଡିଓରେ ଦେଖିବାକୁ ମିଳିଛି ଯେ, ପ୍ରବଳ ଗରମରୁ ରକ୍ଷା ପାଇବା ପାଇଁ ଜଣେ ଯୁବକ ନିଜ ବେଡ଼କୁ ଏକ ସୁଇମିଂ ପୁଲ ପରି ତିଆରି କରିଛନ୍ତି । ସେ ତାଙ୍କ ଖଟ ଉପରେ ଏକ ବାକ୍ସ ଲଗାଇଛନ୍ତି । ଆଉ ବାକ୍ସ ଭିତରେ ପାଣି ଭର୍ତ୍ତି କରି ସେଥିରେ ଶୋଇ ମୋବାଇଲ ଦେଖୁଛନ୍ତି । ଯେପରି ଲାଗୁଛି, ସେ ପ୍ରକୃତ ଏକ ସୁଇମିଂ ପୁଲରେ ମଜା ନେଉଛନ୍ତି । ଗୋଡ଼ ତଳେ ଏକ ଫ୍ୟାନ ମଧ୍ୟ ରଖିଛନ୍ତି । ମଝିରେ ମଝିରେ ସେ ନିଜେ ଉପରେ ପାଣି ଢାଳୁଛନ୍ତି ।
ଏହି ଭିଡିଓଟି ଦେଖିବା ପରେ ଅନେକ ଲୋକ ପସନ୍ଦ କରିବା ସହ ଯୁବକଙ୍କ ଆଇଡ଼ିଆକୁ ପ୍ରଶଂସା ବି କରିଛନ୍ତି ।
Comments are closed.