ତେଜସ୍ଵିିନୀ ପଣ୍ଡା 
ଜଣାନାହିଁ କାଲି
ସକାଳେ କଣ ହେବ?
ଶ୍ରାବଣୀ ଆସି ଭିଜେଇବ
କି ବୈଶାଖୀ ଆସି ଜାଳିଦେବ,
ପାପପୁଣ୍ୟ, ସୂର୍ଯ୍ୟଚନ୍ଦ୍ର
କ’ଣ ସବୁ ମାଟିରୁ ଲିଭିଯିବେ,
ଲିଭିଯିବ କ’ଣ ପଥରରେ
ଲେଖା ଇତିହାସ।
କିଏ ଜାଣେ,
ସେ ତ ଆସନ୍ତା କାଲିର ଚରିତ୍ର ।
ଜଣାନାହିଁ କାଲି
ଅପରାହ୍ନରେ କଣ ହେବ?
ନୂଆ ଇତିହାସ ଲେଖାହେବ
କି ଭୂଗୋଳରେ ଗାଁର
ବାସ୍ନା ହଜିଯିବ,
ପୃଥିବୀର ପରିଧି ଆଶାରେ
ସବୁ ମାୟା ଏ ଜାତିକୁ
କଣ ଗ୍ରାସ କରିବ କି
ଏଠି ସ୍ୱାଭିମାନର
ରକ୍ତ ମରିଯିବି।
କିଏ ଜାଣେ,
ସେ ତ ଆସନ୍ତା କାଲିର ଚରିତ୍ର।
ଜଣାନାହିଁ କାଲି
ସନ୍ଧ୍ୟାରେ କଣ ହେବ?
ମାଟିଦୀପରେ ଅନ୍ଧାର ଲୁଚିବ
ଆଲୁଅ ସବୁ ପାଉଁଶ ପାଲଟିବ,
ନୂଆବୋହୂ ମଥାରେ
ଓଢଣା ଟାଣିବ କି
କାନ୍ଦି କାନ୍ଦି ମଥାରୁ
ସିନ୍ଦୂର ପୋଛିବ।
କିଏ ଜାଣେ,
ସେ ତ ଆସନ୍ତା କାଲିର ଚରିତ୍ର।
ଜଣାନାହିଁ କାଲି
ରାତିରେ କ’ଣ ହେବ?
ଫୁଲର ଶେଯ ସଜା ହେବ
କି ମଶାଣୀରେ ଜୁଇ ଜଳିବ,
ସବୁ ପ୍ରତୀକ୍ଷାର
ଶେଷ ହେବ କି
କିଛି ବାକି ରହିଯିବ।
କିଏ ଜାଣେ,
ସେ ତ ଆସନ୍ତା କାଲିର ଚରିତ୍ର।
ଜଗତସିଂହପୁର
Comments are closed.