ଭୁବନେଶ୍ୱର: ଆପାର୍ଟମେଣ୍ଟରେ ଘଟୁଥିବା ଚୋରି ଏବଂ ଲୁଟକୁ ରୋକିବା ପାଇଁ ଏକ ସକ୍ରିୟ ପଦକ୍ଷେପ ସ୍ୱରୂପ ଭୁବନେଶ୍ୱର କମିସନରେଟ୍ ପୁଲିସ ଶୁକ୍ରବାର ପ୍ରାୟ 50ଟି ଘରୋଇ ସୁରକ୍ଷା ସଂସ୍ଥାର ପ୍ରତିନିଧିଙ୍କ ସହ ଏକ ଗୁରୁତ୍ୱପୂର୍ଣ୍ଣ ବୈଠକ କରିଛି। ସହରରେ ବନ୍ଦ ଆପାର୍ଟମେଣ୍ଟଗୁଡ଼ିକୁ ଟାର୍ଗେଟ୍ କରି ଦୁର୍ବୃତ୍ତମାନେ ଘଟାଉଥିବା ଅପରାଧକୁ ରୋକିବାରେ ଏହା ସହାୟକ ହେବ ବୋଲି କୁହାଯାଉଛି।
ଭୁବନେଶ୍ୱର ଡିସିପି ପ୍ରତୀକ ସିଂହଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି ବୈଠକରେ ଜୋନାଲ ACPs, ଅତିରିକ୍ତ DCPs, IsIC ଭଳି ପ୍ରମୁଖ ସୁରକ୍ଷା ସଂସ୍ଥାର ପ୍ରତିନିଧିମାନେ ଯୋଗ ଦେଇଥିଲେ। ସୁରକ୍ଷା କର୍ମୀମାନେ ସମ୍ମୁଖୀନ ହେଉଥିବା ଆହ୍ୱାନ ଏବଂ ଆପାର୍ଟମେଣ୍ଟର ସୁରକ୍ଷା ବ୍ୟବସ୍ଥାକୁ ସୁଦୃଢ଼ କରିବା ପାଇଁ ପୁଲିସ ଓ ଘରୋଇ ସୁରକ୍ଷା କିଭଳି ମିଳିତ ଭାବେ କାର୍ଯ୍ୟ କରିପାରିବ ସେନେଇ ଏହି ଆଲୋଚନାରେ ଗୁରୁତ୍ୱାରୋପ କରାଯାଇଥିଲା।
ଡିସିପି ପ୍ରତୀକ ସିଂହ କହିଛନ୍ତି ଯେ, ସହରବାସୀଙ୍କ ସୁରକ୍ଷା ପାଇଁ ସୁରକ୍ଷା କର୍ମୀଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ। ବିଶେଷ କରି ରାତିରେ ନିକଟସ୍ଥ ଥାନା ସହ ସକ୍ରିୟ ଭାବେ ଆଲୋଚନା କରି ସୂଚନା ଆଦାନ ପ୍ରଦାନ କରିବା ଏବଂ ପ୍ରଭାବୀ ଭାବେ ସହଯୋଗ କରିବା ପାଇଁ ସେ ସେମାନଙ୍କୁ ଉତ୍ସାହିତ କରିଥିଲେ। ପ୍ରଶିକ୍ଷଣ ସମ୍ପର୍କରେ ଚିନ୍ତା ପ୍ରକଟ କରି ପ୍ରତୀକ ସିଂହ ପରାମର୍ଶ ଦେଇଥିଲେ ଯେ ସୁରକ୍ଷା ଏଜେନ୍ସିଗୁଡ଼ିକ ସେମାନଙ୍କ ବର୍ତ୍ତମାନର ପ୍ରଶିକ୍ଷଣ କାର୍ଯ୍ୟକ୍ରମର ଲାଭ ଉଠାଇପାରିବେ ଏବଂ ପରସ୍ପର ସହ ସହଯୋଗ କରି ସେମାନଙ୍କ ସୁରକ୍ଷା କର୍ମୀମାନଙ୍କୁ ଉନ୍ନତ କରିପାରିବେ।
ଥାନା ସ୍ତରରେ ଆବାସିକ କୋଠା ଓ ଆପାର୍ଟମେଣ୍ଟର ବ୍ୟାପକ ସିକ୍ୟୁରିଟି ଅଡିଟ୍ କରିବାକୁ ବୈଠକରେ ନିଷ୍ପତ୍ତି ହୋଇଛି। ଦୁର୍ବଳତାକୁ ଚିହ୍ନଟ କରିବା ଏବଂ ଆବଶ୍ୟକ ସୁରକ୍ଷା ବ୍ୟବସ୍ଥାକୁ କାର୍ଯ୍ୟକାରୀ କରିବା ଏହି ପଦକ୍ଷେପର ଲକ୍ଷ୍ୟ। ଡିସିପି ବିଭିନ୍ନ ସଂସ୍ଥାକୁ ସହଯୋଗର ପ୍ରତିଶ୍ରୁତି ଦେବା ସହ ଉତ୍ତମ ସମନ୍ୱୟ ଓ ଫଳାଫଳ ପାଇଁ ଷ୍ଟାଣ୍ଡାର୍ଡ ଅପରେଟିଂ ପ୍ରୋସିଜିଓର (ଏସ୍ଓପି) ବିକଶିତ କରିବାକୁ ପ୍ରତିଶ୍ରୁତି ଦେଇଛନ୍ତି।
ଅପରାଧିକ ସୂଚନା ଆଦାନ ପ୍ରଦାନ ଏବଂ ସୁରକ୍ଷା ପଏଣ୍ଟରେ ତଦାରଖ ବୃଦ୍ଧି କ୍ଷେତ୍ରରେ ପୁଲିସ-ସୁରକ୍ଷା ଭାଗିଦାରୀର ସମ୍ଭାବନା ଉପରେ ସେ ଆଲୋକପାତ କରିଥିଲେ।
ଡିସିପି ପ୍ରତୀକ ସିଂହ ବୈଠକ ଶେଷରେ କହିଥିଲେ ଯେ ଅପରାଧ ରୋକିବା ଏବଂ ଏକ ସୁରକ୍ଷିତ ସମାଜ ସୁନିଶ୍ଚିତ କରିବା ଦିଗରେ ଘରୋଇ ସୁରକ୍ଷା ଏଜେନ୍ସିମାନେ ଏକ ବଡ଼ ଭୂମିକା ନିର୍ବାହ କରିପାରିବେ।
Comments are closed.