ବିକାଶଖଣ୍ଡ: ପ୍ରେମର କୌଣସି ବୟସ ସୀମା ନଥାଏ ବୋଲି କୁହାଯାଏ, ଆଉ ଏହାର ଏକ ଜ୍ୱଳନ୍ତ ଉଦାହରଣ ଉତ୍ତରପ୍ରଦେଶରୁ ସାମ୍ନାକୁ ଆସିଛି । ଜଣେ ୩୦ ବର୍ଷୀୟା ଇନଷ୍ଟାଗ୍ରାମ ବ୍ଲଗର୍ ୭୫ ବର୍ଷୀୟ ଜଣେ ବୃଦ୍ଧଙ୍କ ପ୍ରେମରେ ପଡ଼ିଯାଇଛନ୍ତି । କେବଳ ସେତିକି ନୁହେଁ, ଉଭୟେ ପରସ୍ପରକୁ ଶୀଘ୍ର ବିବାହ କରିବାକୁ ଯାଉଛନ୍ତି । ଏହି ଅନନ୍ୟ ପ୍ରେମ କାହାଣୀ ଏବେ ସୋସିଆଲ ମିଡିଆରେ ଚର୍ଚ୍ଚାର ବିଷୟ ପାଲଟିଛି । ବିକାଶଖଣ୍ଡର ଅରିଆରୀ ଗ୍ରାମର ୭୫ ବର୍ଷୀୟ ରାମସୁଗର ଏବଂ ୩୦ ବର୍ଷୀୟା ଇନଷ୍ଟାଗ୍ରାମ ବ୍ଲଗର୍ ରାଣୀ ରାଜପୁତଙ୍କ ମଧ୍ୟରେ ଏହି ପ୍ରେମ ସମ୍ପର୍କ ଗଢ଼ିଉଠିଛି । ରାମସୁଗରଙ୍କ ଝିଅ ରାଧା ମଧ୍ୟ ଜଣେ ୟୁଟ୍ୟୁବର । ରାଣୀ ରାଜପୁତ ଭିଡିଓ ସୁଟିଂ ସମ୍ବନ୍ଧରେ ରାଧାଙ୍କ ଘରକୁ ଯାଆଆସ କରୁଥିଲେ ।
ରାଧାଙ୍କ ମାଙ୍କର ୭ ବର୍ଷ ପୂର୍ବେ ଦେହାନ୍ତ ହୋଇଯାଇଥିବାରୁ ରାମସୁଗର ଏକାକୀ ରହୁଥିଲେ । ଗତ ଦୁଇ ବର୍ଷ ଧରି ଘରକୁ ଯିବାଆସିବା ଭିତରେ ରାଣୀ ଏବଂ ରାମସୁଗରଙ୍କ ମଧ୍ୟରେ ନିକଟତରତା ବଢ଼ିଥିଲା ଏବଂ ଉଭୟେ ପରସ୍ପରକୁ ଭଲ ପାଇ ବସିଥିଲେ । ପ୍ରଥମେ ଏହି ଅଜବ ପ୍ରେମ କାହାଣୀକୁ ନେଇ ଚର୍ଚ୍ଚା ଜୋର ଧରିଥିବାବେଳେ, ପରିବାର ଲୋକେ ଏହା ଜାଣିବା ପରେ ତରବରିଆ ଭାବେ ନିର୍ବନ୍ଧ କରାଇ ଦେଇଛନ୍ତି । ଗତ ଏକ ସପ୍ତାହ ପୂର୍ବେ ଏକ ବ୍ୟୁଟି ପାର୍ଲରରେ ଉଭୟଙ୍କ ନିର୍ବନ୍ଧ ଅନୁଷ୍ଠିତ ହୋଇଛି, ଯାହାର ଭିଡିଓ ଏବେ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି । ପରିବାର ଲୋକଙ୍କ ସହମତିରେ ଉଭୟ ରାମସୁଗର ଏବଂ ରାଣୀ ସମସ୍ତ ରୀତିନୀତି ଅନୁଯାୟୀ ଶୀଘ୍ର ବିବାହ ବନ୍ଧନରେ ବାନ୍ଧି ହେବେ । ନିର୍ବନ୍ଧ ପରେ ରାଣୀ ତାଙ୍କ ଇନଷ୍ଟାଗ୍ରାମ ଆକାଉଣ୍ଟର ନାମ ମଧ୍ୟ ବଦଳାଇ ରାଧା କି ମମ୍ମି ରଖିଛନ୍ତି ।
