ପ୍ରଫୁଲ୍ଲ କୁମାର ତ୍ରିପାଠୀଙ୍କ ନିୟମିତ ବିଭାଗ
ଶବ୍ଦାର୍ଥ ସଂଧାନୀ ସଜ୍ଜନ
ଏଣିକି ଶବ୍ଦର ଗଠନ
ଆଡ଼କୁ ଦେଲେ ଟିକେ ଧ୍ୟାନ
ବୁଝିବେ ଆଦାନପ୍ରଦାନ
ବହୁ ଉତ୍ସରୁ ଶବ୍ଦ ଆସି
ଭାଷାରେ ଯାଇଥାଂତି ପଶି
ତା’ପରେ ଯାଇଥାଂତି ମିଶି
ହୁଅଂତି ବହୁ ଭାଷା-ବାସୀ
ତେଣୁ ଶବ୍ଦର ସମାନତା
ଅଟେ ଭାଷାର ବାସ୍ତବତା
ଶବ୍ଦଟେ ଅନେକ ଭାଷାରେ
ସ୍ବଚ୍ଛଂଦେ ସ୍ଥାନ ପାଇପାରେ
ଶବ୍ଦ ଉପରେ ସ୍ବାଧିକାର
ନ ଥାଏ କୌଣସି ଭାଷାର
ଶବ୍ଦ ଯେହେତୁ ଉଡ଼ା-ମଂଜି
ମନରେ ହୋଇଥାଏ ଖଂଜି
ଶବ୍ଦଟେ ପଡ଼େ ଯେବେ କାନେ
ରହେ ନିଶ୍ଚୟ ଶ୍ରୋତା ମନେ
ଶବ୍ଦାଦି ହେଲେ ଗତିଶୀଳ
ଭାଷାକୁ କରଂତି ସବଳ
ସମଗୋତ୍ରୀ ଭାଷାରେ ଥାଏ
ଅନେକ ଶବ୍ଦ ଏକପ୍ରାୟେ
ସେ ସବୁ ଯେଣୁ କୋଠ-ଧନ
ଦିଶଂତି ପ୍ରାୟତଃ ସମାନ
ଭାଷାକାଶରେ ଶବ୍ଦ ଉଡ଼ି
ଅନେକ ଭାଷା ସହ ଯୋଡ଼ି
ହୁଏ ଓ ରହେ ସେଠି ପଡ଼ି
କିଂବା ପାରଇ ନିଜେ ବଢ଼ି
ଆଗତ ଶବ୍ଦଂକୁ ସ୍ବାଗତ
କଲେ ଅବଶ୍ୟ ହୁଏ ହିତ
ବଳିଷ୍ଠ ହେବେ ସବୁ ଭାଷା
ଶବ୍ଦ ହୋଇଲେ ମିଳାମିଶା
Comments are closed.