ନୂଆଦିଲ୍ଲୀ: ଫେସବୁକ ଓ ଇନଷ୍ଟାଗ୍ରାମ ଭଳି ସୋସିଆଲ ମିଡିଆ ପ୍ଲାଟଫର୍ମରେ ଠକେଇ ରୋକିବା ପାଇଁ ସରକାର କଠୋର ପଦକ୍ଷେପ ନେବାକୁ ଯାଉଛନ୍ତି । ଗତ କିଛି ବର୍ଷ ମଧ୍ୟରେ ସୋସିଆଲ ମିଡିଆରେ ଅପରାଧ ଓ ଠକେଇ ମାମଲା ରେ ବଡ଼ ଧରଣର ବୃଦ୍ଧି ଘଟିଛି । ସାଇବର ଅପରାଧୀମାନେ ସୋସିଆଲ ମିଡିଆ ପ୍ଲାଟଫର୍ମକୁ ବ୍ୟବହାର କରି ଲୋକଙ୍କୁ ଫସାଇ ନକଲି ଋଣ ଆପ୍ ଜାଲରେ ଲୋକଙ୍କୁ ଠକି ଚାଲିଛନ୍ତି।
ମିଡିଆ ରିପୋର୍ଟ ଅନୁଯାୟୀ, ଫେକ୍ ଲୋନ୍ ଆପ୍ କୁ ନେଇ ସରକାର ସୋସିଆଲ ମିଡିଆ ପ୍ଲାଟଫର୍ମକୁ କଡ଼ାକଡ଼ି କରିବାକୁ ଯାଉଛନ୍ତି। ସାଇବର ଅପରାଧୀମାନେ ସୋସିଆଲ ମିଡିଆରେ ଲୋକଙ୍କୁ ବିଭ୍ରାନ୍ତ କରି ନିଜ ଜାଲରେ ଫସାଇ ଥାନ୍ତି। ଏଥିପାଇଁ ଏହି ଅଦୃଶ୍ୟ ଅପରାଧୀମାନେ ସୋସିଆଲ ମିଡିଆ ପ୍ଲାଟଫର୍ମରେ ବିଜ୍ଞାପନ ଚଳାଇ ନକଲି ଋଣ ଆପକୁ ପ୍ରୋତ୍ସାହନ ଦିଅନ୍ତି ଏବଂ ଅଭାବୀ ଲୋକମାନେ ଏହାକୁ ଦେଖି ସେମାନଙ୍କ କଥାକୁ ଆସନ୍ତି ।
ଏଭଳି ବିଜ୍ଞାପନ ଚଳାଇବା ପାଇଁ ଅନୁମତି ଦେବା ପୂର୍ବରୁ ଏହାର ତଦନ୍ତ କରିବାକୁ ସରକାର ଏବେ ସୋସିଆଲ ମିଡିଆ କଂପାନିଗୁଡ଼ିକ ଉପରେ ଚାପ ପକାଇବାକୁ ଯାଉଛନ୍ତି।
ଆଇଟି ରାଷ୍ଟ୍ରମନ୍ତ୍ରୀ ରାଜୀବ ଚନ୍ଦ୍ରଶେଖର କହିଛନ୍ତି ଯେ ଏଥିପାଇଁ ସୂଚନା ପ୍ରଯୁକ୍ତିବିଦ୍ୟାର ପ୍ରଚଳିତ ନିୟମରେ ସଂଶୋଧନ କରାଯିବ। ଭାରତରେ ସୋସିଆଲ ମିଡିଆ ଜରିଆରେ ନକଲି ଋଣ ଆପ୍ ର ପ୍ରସାରକୁ ରୋକିବା ପାଇଁ ସରକାର କଠୋର ପଦକ୍ଷେପ ନେବାକୁ ଯାଉଛନ୍ତି। ଏହି ପ୍ଲାଟଫର୍ମରେ ନକଲି ଋଣ ଆପର ବିଜ୍ଞାପନକୁ ରୋକିବା ପାଇଁ ଏହି ଦିଗରେ ପ୍ରଚଳିତ ନିୟମରେ ସଂଶୋଧନ କରାଯିବ ବୋଲି ରାଷ୍ଟ୍ରମନ୍ତ୍ରୀ କହିଛନ୍ତି । ତେବେ ଏପ୍ରିଲ-ମେ ମାସରେ ଲୋକସଭା ନିର୍ବାଚନ ହୋଇପାରେ । ଏଭଳି ସ୍ଥିତିରେ ସୂଚନା ପ୍ରଯୁକ୍ତି ବିଦ୍ୟା ଆଇନରେ ଆବଶ୍ୟକ ପରିବର୍ତ୍ତନ ନିର୍ବାଚନ ପରେ ହିଁ ସଂଶୋଧନ କରାଯିବ।
ସୂଚନାଯୋଗ୍ୟ, ଫେକ୍ ଲୋନ୍ ଆପକୁ ନେଇ ସୋସିଆଲ ମିଡିଆ ପ୍ଲାଟଫର୍ମରେ ଅପରାଧୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଯେଉଁ ବ୍ୟବସ୍ଥା ରହିଛି, ସେଥିରେ ସେଭଳି କୌଣସି ବ୍ୟବସ୍ଥା ନାହିଁ। ସାଧାରଣତଃ ସୋସିଆଲ ମିଡିଆ ପ୍ଲାଟଫର୍ମଗୁଡିକ ବର୍ତ୍ତମାନ ଫି’ ଆଦାୟ କରି ବିଜ୍ଞାପନ ଚଳାଇବାକୁ ଅନୁମତି ଦିଅନ୍ତି। କିନ୍ତୁ ସାଇବର ଅପରାଧୀମାନେ ଏହାର ଅପବ୍ୟବହାର କରୁଛନ୍ତି। ୟୁଜର୍ସମାନେ ଖବର ଦେବା ପରେ ସୋସିଆଲ ମିଡିଆ କମ୍ପାନୀମାନେ ବିଜ୍ଞାପନକୁ ହଟାଇ ଦିଅନ୍ତି। ତେବେ ସେତେବେଳକୁ ଅନେକ ଲୋକ ଏହାର ଶିକାର ହୋଇସାରିଥାନ୍ତି। ଏବେ ନୂଆ ଆଇନରେ ସଂଶୋଧନ କରି ନକଲି ଋଣ ଆପର ବିଜ୍ଞାପନ ଚଳାଇ ସୋସିଆଲ ମିଡିଆ କମ୍ପାନିଗୁଡ଼ିକୁ ଦିଆଯାଇଥିବା ଆଇନଗତ ମୁକ୍ତି ଶେଷ ହେବ ବୋଲି ବ୍ୟବସ୍ଥା କରାଯାଉଛି। ଏହି କାରଣରୁ କଂପାନିଗୁଡ଼ିକ ବିନା ଯାଞ୍ଚରେ କୌଣସି ବିଜ୍ଞାପନ ଚଳାଇବା ବନ୍ଦ କରିଦେବେ।
Comments are closed.