ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ ଦିଲ୍ଲୀପ ରାୟ ନିର୍ବାଚନ ଲଢିବାକୁ କୋର୍ଟରେ କଲେ ଆବେଦନ

ନୂଆଦିଲ୍ଲୀ/ଭୁବନେଶ୍ୱର: ପୂର୍ବତନ କେନ୍ଦ୍ରମନ୍ତ୍ରୀ ଦିଲ୍ଲୀପ ରାୟ ନିର୍ବାଚନ ଲଢିବାକୁ ଇଚ୍ଛା ରଖିଛନ୍ତି। କୋଇଲା ଦୁର୍ନୀତି ମାମଲାରେ ଦୋଷୀ ସାବ୍ୟସ୍ତ ହେବା ଉପରେ ନିର୍ବାଚନ ନଲଢିବା ଉପରେ ରୋକ୍ ଲାଗିଛି। ଏହାପରେ ଦିଲ୍ଲୀ ହାଇକୋର୍ଟରେ ନିର୍ବାଚନ ଲଢିବା ପାଇଁ ଏକ ଆବେଦନ କରିଛନ୍ତି। ୧୯୯୯ ମସିହାରେ ଝାଡ଼ଖଣ୍ଡ ବ୍ଲକ ଆବଣ୍ଟନରେ ଅନିୟମିତତା ଅଭିଯୋଗରେ ୩ ବର୍ଷ ଜେଲ୍ ଦଣ୍ଡାଦେଶ ପାଇଥିବା ଦିଲ୍ଲୀପ ରାୟ ପରେ ଜାମିନ୍ ପାଇଥିଲେ।

ଦିଲ୍ଲୀପ ରାୟଙ୍କ ଆବେଦନକୁ ନେଇ ଦିଲ୍ଲୀ ହାଇକୋର୍ଟର ବିଚାରପତି ସ୍ୱର୍ଣ୍ଣା କାନ୍ତ ଶର୍ମା କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ)କୁ ନୋଟିସ ଜାରି କରିଛନ୍ତି। କୋର୍ଟ ସିବିଆଇକୁ ଷ୍ଟାଟସ୍ ରିପୋର୍ଟ ଦାଖଲ କରିବାକୁ କହିଛନ୍ତି ଏବଂ ପରବର୍ତ୍ତୀ ଶୁଣାଣି ଏପ୍ରିଲ ୫ ତାରିଖକୁ ଧାର୍ଯ୍ୟ କରିଛନ୍ତି।

ଅଟଳ ବିହାରୀ ବାଜପେୟୀ ସରକାରରେ କୋଇଲା ରାଷ୍ଟ୍ରମନ୍ତ୍ରୀ ଭାବେ ଦାୟିତ୍ୱ ତୁଲାଇଥିବା ଦିଲ୍ଲୀପ ରାୟଙ୍କ ପକ୍ଷରୁ ବରିଷ୍ଠ ଆଇନଜୀବୀ ମୁକୁଲ ରୋହତଗୀ ପ୍ରତିନିଧିତ୍ୱ କରୁଛନ୍ତି। ରୋହତଗୀ କହିଛନ୍ତି ଯେ ଆଗାମୀ ନିର୍ବାଚନରେ ଲଢ଼ିବା ପାଇଁ ରାୟଙ୍କ ଇଚ୍ଛା ଅଛି। ହେଲେ ସେ ଦୋଷୀ ସାବ୍ୟସ୍ତ ହୋଇଥିବାରୁ ନିର୍ବାଚନ ଲଢିବା ଉପରେ ରୋକ୍ ଲାଗିଛି।

ଆବେଦନ ଅନୁଯାୟୀ, ଜନପ୍ରତିନିଧି ଆଇନର ଧାରା ୮(୩) କାରଣରୁ ଦିଲ୍ଲୀପ ରାୟ ଙ୍କୁ ଆଗାମୀ ଲୋକସଭା କିମ୍ବା ଓଡ଼ିଶା ବିଧାନସଭା ନିର୍ବାଚନଲଢ଼ିବା କିମ୍ବା ରାଜ୍ୟସଭାକୁ ମନୋନୀତ ହେବା ପାଇଁ ଅଯୋଗ୍ୟ ଘୋଷଣା କରାଯାଇଛି। ବିଶେଷ କରି ବୟସକୁ ଦୃଷ୍ଟିରେ ରଖି ଏହି ଅଯୋଗ୍ୟତା ତାଙ୍କୁ ଯଥେଷ୍ଟ ପକ୍ଷପାତ କରୁଛି।

ବରିଷ୍ଠ ଆଇନଜୀବୀ ଆର୍ ଏସ୍ ଚିମା ଏବଂ ଆଇନଜୀବୀ ତରନୁମ୍ ଚିମାଙ୍କ ପକ୍ଷରୁ ସିବିଆଇ କହିଛି ଯେ ସେମାନେ ଠିକ୍ ସମୟରେ ଆବେଦନର ଜବାବ ଦେବେ।