ବର୍ବରତା, ଅମାନୁଷିକ କାଣ୍ଡ; ଯୁବକଙ୍କୁ ଗଛରେ ବାନ୍ଧି ନିସ୍ତୁକ ମାଡ

ଖଣ୍ଡପଡ଼ା: ନୟାଗଡ ଫତେଗଡ଼ ଥାନା ବଡ଼ସହରାରେ ମଧ୍ୟଯୁଗୀୟ ବର୍ବରତା l ଜଣେ ଯୁବକଙ୍କୁ ଗଛରେ ବାନ୍ଧି କାଠ ଫାଳିଆରେ ନିସ୍ତୁକ ମାଡ଼ ମରାଯାଇଥିବା ଅଭିଯୋଗ ହୋଇଛି l ଜଣେ ମହିଳାଙ୍କ ସମେତ ୩ରୁ ୪ ଜଣ ମାଡ଼ ମାରିବାର ଦୃଶ୍ୟ ଭାଇରାଲ ହେବାରେ ଲାଗିଛି l ଗତକାଲି ଅପରାହ୍ନରେ ଏହି ଘଟଣା ଘଟିଥିଲା l ମାଡ ବେଳର ଭିଡିଓ ଭାଇରାଲ ହେବା ପରେ ମାମଲା ରୁଜୁ କରି ପୋଲିସ ତଦନ୍ତ ଆରମ୍ଭ କରିଛି l

ଭାଇରାଲ୍ ଭିଡିଓରେ ଜଣେ ଯୁବକଙ୍କୁ ଗଛରେ ବାନ୍ଧି କାଠ ଫାଳିଆରେ ଅତି ଅମାନୁଷିକ ଭାବେ କିଛି ଲୋକ ମାଡ଼ ମାରୁଥିବା ଦେଖିବାକୁ ମିଳିଛି l ମାଡ ମାରି ମୁମୂର୍ଷୁ ଅବସ୍ଥାରେ ରାସ୍ତା ପାର୍ଶ୍ଵରେ କିଛି ଲୋକ ପକେଇଦେଇଥିବା ଜଣାପଡିଛି l ଉକ୍ତ ଯୁବକଙ୍କ ମୁହଁ ଓ ମୁଣ୍ଡରେ ଗଭୀର ଆଘାତ ଲାଗିଥିବା ବେଳେ ଯୁବକ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ ଭାପୁର ସ୍ୱାସ୍ଥ୍ୟକେନ୍ଦ୍ର ପରେ ଭୁବନେଶ୍ଵରସ୍ଥିତ କ୍ୟାପିଟାଲ ହସ୍ପିଟାଲ୍‌କୁ ପଠାଯାଇଛି l ତେବେ ଭିଡିଓରେ ଜଣେ ମହିଳା ଓ ପୁରୁଷ କାଠ ଫାଳିଆ ଧରି ତାଙ୍କୁ ମାଡ଼ ମାରୁଥିବା ସ୍ପଷ୍ଟ ଜଣାପଡିଛି l ଭିଡିଓରୁ ଚିହ୍ନଟ ସମସ୍ତ ଅଭିଯୁକ୍ତ ଫେରାର ରହିଥିବା ବେଳେ ଏପର୍ଯ୍ୟନ୍ତ ପୋଲିସ ହାତ ଖାଲି ରହିଛି l ତେବେ କ’ଣ ପାଇଁ ଜଣଙ୍କୁ ଏପରି ବର୍ବର ଆକ୍ରମଣ ସ୍ପଷ୍ଟ ହୋଇପାରି ନାହିଁ l