ନୂଆଦିଲ୍ଲୀ: ପାକିସ୍ତାନରେ ଆସନ୍ତା ବର୍ଷ ଚାମ୍ପିୟନ୍ସ ଟ୍ରଫି କ୍ରିକେଟ ଆୟୋଜିତ ହେବ । ଶୁକ୍ରବାର ଭାରତୀୟ କ୍ରିକେଟ କଂଟ୍ରୋଲ ବୋର୍ଡ ସ୍ପଷ୍ଟ କରିଛି ଟିମ ଇଣ୍ଡିଆ ସୁରକ୍ଷା ଦୃଷ୍ଟିକୋଣରୁ ଏହି ଗସ୍ତରେ ଯିବନି । ଇଣ୍ଡିଆନ ଏକ୍ସପ୍ରେସରେ ପ୍ରକାଶିତ ଏକ ରିପୋର୍ଟ ଅନୁସାରେ ବିସିସିଆଇ ଏ ନେଇ ପିସିବିକୁ ପତ୍ର ମଧ୍ୟ ଲେଖିଛି । ଏପରିକି ଦୁବାଇରେ ଭାରତର ମ୍ୟାଚ ଆୟୋଜନ କରିବାକୁ ଅନୁରୋଧ କରିଛି । ମୁମ୍ବାଇ ଆତଙ୍କବାଦୀ ଆକ୍ରମଣ ଘଟଣା ପରେ ଭାରତୀୟ ଟିମ ପାକିସ୍ତାନ ଯାଇ ନାହାନ୍ତି । ଉଭୟ ଟିମ ମଧ୍ୟରେ ଦ୍ୱିପାକ୍ଷିକ ସିରିଜ ମଧ୍ୟ ଖେଳାଯାଇ ନାହିଁ । କେବଳ ଆଇସିସି ଓ ଏସିିସିରେ ଉଭୟ ମ୍ୟାଚ ଖେଳିଛନ୍ତି ।
୨୦୧୩ ପରଠାରୁ ୧୩ଟି ଦିନିକିଆ ଓ ୮ଟି ଆନ୍ତର୍ଜାତୀୟ ଟି୨୦ ମ୍ୟାଚ ନ୍ୟୁଟ୍ରାଲ ଭେନ୍ୟୁରେ ଖେଳାଯାଇଛି । ଅବଶ୍ୟ ଗତ ବର୍ଷ ଭାରତରେ ଦିନିକିଆ ବିଶ୍ୱକପ ଖେଳିବା ପାଇଁ ପାକିସ୍ତାନ ଅହମ୍ମଦାବାଦ ଆସିଥିଲା । ଏହି ମ୍ୟାଚକୁ ଭାରତ ୭ ୱିକେଟରେ ଜିତି ନେଇଥିଲା । ପିସିବି ଚାମ୍ପିୟନ୍ସ ଟ୍ରଫିର ଆୟୋଜକ ରହିଛି । ପାକିସ୍ତାନରେ ଭାରତ ମ୍ୟାଚ ନ ଖେଳିବା ଯୋଗୁ ପିସିବିର କ୍ଷତି ହେଉଛି । ଗତ ବର୍ଷ ଏସିଆ କପରେ ମଧ୍ୟ ଟିମ ଇଣ୍ଡିଆ ପାକିସ୍ତାନ ନ ଯାଇ ଶ୍ରୀଲଙ୍କାରେ ତାର ମ୍ୟାଚ ଖେଳିଥିଲା । ଫାଇନାଲରେ ଭାରତ ୧୦ ୱିକେଟରେ ଶ୍ରୀଲଙ୍କାକୁ ହରାଇ ଚାମ୍ପିୟନ ହୋଇଥିଲା ।