ନୂଆଦିଲ୍ଲୀ: ଏୟାରଷ୍ଟ୍ରାଇକ୍ ପରେ ବି ଚେତିନି ପାକିସ୍ତାନ। ବାରମ୍ବାର ଲାଇନ ଅଫ କଣ୍ଟ୍ରୋଲ ଉଲ୍ଲଂଘନ କରି ବାନର୍ତ ଜାରି ରଖିଛି। ସାଧାରଣ ଲୋକଙ୍କୁ କରୁଛି ଟାର୍ଗେଟ। ଅପରେସନ ସିନ୍ଦୂର ପରେ କଶ୍ମୀର ପୁଞ୍ଚ ଏବଂ ସୀମାବର୍ତ୍ତୀ ଅଞ୍ଚଳ ଲଗାତାର ଗୁଳିବର୍ଷା ଜାରି ରଖିଛି। ସେନା ବି ଲଗାତାର ଏହାର ଜବାବ ଦେଇ ଚାଲୁଛି। ହେଲେ ଏହାର କଡ଼ା ଜବାବରେ ଭାରତ କିଛି ବଡ଼ କରିପାରେ।
ଏହାକୁ ନେଇ ଆଜି ପ୍ରଧାନମନ୍ତ୍ରୀ ମୋଦିଙ୍କୁ ଭେଟିଛନ୍ତି ଚାଣକ୍ୟ ତଥା ଜାତୀୟ ସୁରକ୍ଷା ପରାମର୍ଶଦାତା ଅଜିତ ଡୋଭାଲ। ପ୍ରଧାନମନ୍ତ୍ରୀ ମୋଦିଙ୍କୁ ବାସଭବନରେ ପ୍ରାୟ ୫୦ ମିନିଟ ଧରି ଗୁରୁତ୍ବପୂର୍ଣ୍ଣ ଆଲୋଚନା କରିଥିଲେ ଏନଏସଏ ଅଜିତ ଡୋଭାଲ। ଅପରେସନ ସିନ୍ଦୂର ପରବର୍ତ୍ତୀ ପଦକ୍ଷେପ ଏବଂ ଦେଶର ସୁରକ୍ଷାକୁ ନେଇ ଗୁରୁତ୍ୱପୂର୍ଣ୍ଣ ଆଲୋଚନା ହୋଇନେଇଥିବ ସୂଚନା ରହିଛି। ପୁଣି ପାକିସ୍ତାନକୁ କିପରି ସାବାଡ୍ କରାଯିବ ସେନେଇ ଆଲୋଚନା ହୋଇଥାଇପାରେ।
ସେପଟେ ଅପରେସନ ସିନ୍ଦୂର ପରେ ସଂସଦ ଭବନରେ ଚାଲିଛି ସର୍ବଦଳୀୟ ବୈଠକ । ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ଅଧ୍ୟକ୍ଷତାରେ ବୈଠକରେ ଅମିତ ଶାହ, କିରନ ରିଜିଜୁ, ବୈଦେଶିକ ମନ୍ତ୍ରୀ, ଜେପି ନଡ୍ଡା, କଂଗ୍ରେସ ଅଧ୍ୟକ୍ଷ ଖଡ୍ଗେ, ରାହୁଲ ଗାନ୍ଧି ଉପସ୍ଥିତ ରହିଛନ୍ତି। ଆଗାମୀ ରଣନୀତି ନେଇ ଏଥିରେ ମଧ୍ୟ ବିଶେଷ ଆଲୋଚନା ଚାଲିଛି।
ତେବେ ଭାରତର ଉଚ୍ଚ-ସଠିକତା ସାମରିକ ଆକ୍ରମଣ ପରେ ପାକିସ୍ତାନ ସେନାମାନେ ଆଜି ୧୪ ତମ ଦିନ ପାଇଁ ଜମ୍ମୁ ଏବଂ କଶ୍ମୀରର ଏଲଓସି ଅଞ୍ଚଳରେ ଗୁଳିବର୍ଷା କରିଛନ୍ତି। ଯେଉଁଥିରେ ୧୫ ଜଣ ସାଧାରଣ ନାଗରିକ ପ୍ରାଣ ହରାଇଛନ୍ତି ଏବଂ ୫୯ ଜଣ ଆହତ ହୋଇଥିବା ସୂଚନା ରହିଛି। ଏହି ଆକ୍ରମଣ କୁପୱାରା, ବାରାମୁଲ୍ଲା, ଉରି ଏବଂ ଅଖନୁରର ଆଗୁଆ ଗାଁରେ ହୋଇଛି। ତେବେ ଗୁରୁବାର ଦିନ ଗୁଳିବର୍ଷାରେ ଜଣେ ଭାରତୀୟ ସେନା ସୈନିକ ମଧ୍ୟ ପ୍ରାଣ ହରାଇଛନ୍ତି। ପୁଞ୍ଚରେ, ପାକିସ୍ତାନ ଦ୍ୱାରା ନିୟନ୍ତ୍ରଣ ରେଖାରେ ଅସ୍ତ୍ରବିରତି ଉଲ୍ଲଂଘନରେ ୧୩ ଜଣ ସାଧାରଣ ନାଗରିକଙ୍କ ମୃତ୍ୟୁ ଘଟିଥିବା ଏବଂ ୪୪ ଜଣ ଆହତ ହୋଇଥିବା ବୈଦେଶିକ ମନ୍ତ୍ରଣାଳୟ ନିଶ୍ଚିତ କରିଛି। ଅଧିକାରୀଙ୍କ କହିବା ଅନୁଯାୟୀ, ପାକିସ୍ତାନୀ ସେନା ମଧ୍ୟରାତ୍ରି ପରେ କରନାହ ଅଞ୍ଚଳର ସାଧାରଣ ନାଗରିକ ଅଞ୍ଚଳକୁ ଟାର୍ଗେଟ କରି ସେଲ୍ ଏବଂ ମୋର୍ଟାର ମାଡ଼ କରିଥିଲା। କରନାହ ଗୁଳିମାଡ଼ରେ ଏପର୍ଯ୍ୟନ୍ତ ସାଧାରଣ ନାଗରିକଙ୍କ ମୃତାହତର କୌଣସି ରିପୋର୍ଟ ନାହିଁ।
ଅନ୍ୟପଟେ ଅପରେସନ ସିନ୍ଦୁର ପରେ ଭାରତ ଏବଂ ପାକିସ୍ତାନ ମଧ୍ୟରେ ବୃଦ୍ଧି ପାଉଥିବା ଉତ୍ତେଜନା ମଧ୍ୟରେ, ଅନେକ ସହରରେ ମକ୍ ଡ୍ରିଲ୍ କରାଯାଇଥିଲା, ଯାହା ବିମାନ ଆକ୍ରମଣ, ବୋମା ବିସ୍ଫୋରଣ ଏବଂ ଉଦ୍ଧାର କାର୍ଯ୍ୟ ଭଳି ପରିସ୍ଥିତିକୁ ଅନୁକରଣ କରିଥିଲା। ସୁରକ୍ଷା ବାହିନୀ ଜରୁରୀକାଳୀନ ପ୍ରତିକ୍ରିୟା ସମନ୍ୱିତ କରିବା ସମୟରେ ସାଇରନ୍ ବାଜିଥିଲା। ଏହି ଦେଶବ୍ୟାପୀ ଅଭ୍ୟାସ ଦିଲ୍ଲୀ, ପଞ୍ଜାବ, ହରିୟାଣା, ରାଜସ୍ଥାନ, ଉତ୍ତର ପ୍ରଦେଶ, ଗୁଜରାଟ, ମହାରାଷ୍ଟ୍ର, କର୍ଣ୍ଣାଟକ, ତାମିଲନାଡୁ, କେରଳ, ଆନ୍ଧ୍ର ପ୍ରଦେଶ, ତେଲେଙ୍ଗାନା, ଓଡ଼ିଶା, ବିହାର, ଝାଡ଼ଖଣ୍ଡ, ପଶ୍ଚିମବଙ୍ଗ, ଆସାମ, ମିଜୋରାମ, ତ୍ରିପୁରା, ନାଗାଲାଣ୍ଡ, ସିକିମ, ଅରୁଣାଚଳ ପ୍ରଦେଶ ଏବଂ ମଣିପୁର ସମେତ ବିଭିନ୍ନ ରାଜ୍ୟ ଏବଂ କେନ୍ଦ୍ରଶାସିତ ଅଞ୍ଚଳଗୁଡ଼ିକରେ ପ୍ରସାରିତ ହୋଇଥିଲା।
Comments are closed.