ପଟ୍ଟାମୁଣ୍ଡାଇ ଛାତ୍ରୀ ପୋଡି ଘଟଣା: ଆତ୍ମହତ୍ୟା ପାଇଁ ଉସୁକାଇଥିଲେ କି ପୁରୁଷ ବନ୍ଧୁ?, କଲ ଲିଷ୍ଟରୁ ମିଳିଲା…..

କେନ୍ଦ୍ରାପଡା: ଏବେ ବି ରହସ୍ୟ ଘେରରେ ପଟ୍ଟାମୁଣ୍ଡାଇ ଛାତ୍ରୀ ପୋଡି ଘଟଣା । କିଏ କହୁଛି ସତ? କାହିଁକି ଏତେ ବଡ ପଦକ୍ଷେପ ନେଲେ ଛାତ୍ରୀ ଜଣଙ୍କ । ଏନେଇ ତଦନ୍ତକାରୀ ଟିମ୍ ଏବେ ସୂତା ଖିଅ ଖୋଲୁଥିବା ବେଳେ ପୁରୁଷ ବନ୍ଧୁଙ୍କୁ ହେପାଜତରେ ନେଇଛି ପୋଲିସ୍ । ଯାହାକୁ ନେଇ ଏବେ ଅନେକ ପ୍ରଶ୍ନ ସୃଷ୍ଟି ହୋଇଛି ।

ଏସପି କହିଛନ୍ତି, ପୋଲିସ ରବିବାର ଅଭିଯୁକ୍ତ ପ୍ରମୋଦ ବେହେରାଙ୍କୁ ଗିରଫ କରିଛି ଏବଂ ତାଙ୍କଠାରୁ ଏକ ମୋବାଇଲ୍ ଫୋନ୍ ଜବତ କରିଛି। ଫୋରେନସିକ୍ ଟିମ୍ ଯାଞ୍ଚ ପରେ, ଆମେ ପ୍ରାଥମିକ ପ୍ରମାଣ ପାଇଲୁ ଏବଂ ଅଭିଯୁକ୍ତକୁ କୋର୍ଟକୁ ପଠାଇଲୁ। ଆମେ ପ୍ରାୟ ୬୦ଟି ଅଶ୍ଳୀଳ ଭିଡିଓ ପାଇଲୁ ଏବଂ ଜୁଲାଇ ୧୭ରେ, ଅଭିଯୁକ୍ତ ମୃତ ଛାତ୍ରୀଙ୍କ ବାପାଙ୍କ ପାଖକୁ ଗୋଟିଏ ଅଶ୍ଳୀଳ ଭିଡିଓ ପଠାଇଥିଲା। ସେ ଅନ୍ୟ ଚାରିରୁ ପାଞ୍ଚ ଜଣଙ୍କୁ ଭିଡିଓ ପଠାଇ ଭାଇରାଲ ମଧ୍ୟ କରିଥିଲା। କଲ୍ ଡିଟେଲ୍ ରେକର୍ଡ ବିଶ୍ଳେଷଣ ମାଧ୍ୟମରେ, ଆମେ ଜାଣିଲୁ ଯେ ଅଭିଯୁକ୍ତ ଅଗଷ୍ଟ ୬ରେ ସକାଳେ ପୀଡିତାଙ୍କୁ ଅନେକ ଥର ଫୋନ୍ କରିଥିଲେ। ଅଭିଯୁକ୍ତ ଅଗଷ୍ଟ ୫ ରେ ପୀଡିତାକୁ ପାଞ୍ଚରୁ ଛଅ ଥର ମେସେଜ୍ କରିଥିଲେ । ଏଥିସହିତ ଛାତ୍ରୀଙ୍କ ମାଙ୍କ ପୋନ୍ ମଧ୍ୟ ଜବତ ହୋଇଛି । ସେଥିରେ ମଧ୍ୟ ଯୁବକ ଫୋଟୋ ଏବଂ ଭିଡିଓ ପଠାଇ ବ୍ଲାକମେଲ୍ କରୁଥିବା କହିଛନ୍ତି ପୋଲିସ୍ ଏସପି । ତାଙ୍କ ହ୍ବାଟ୍‌ସଆପ୍ ଚାଟିଂ ଓ ଭିଡିଓ କଲ୍ ରେକର୍ଡ ମଧ୍ୟ ପୋଲିସ ପାଇଛି ।  ପୋଲିସ ଅଧିକ୍ଷକ ଏହା ମଧ୍ୟ ପ୍ରକାଶ କରିଛନ୍ତି ଯେ ପୋଷ୍ଟମର୍ଟମ୍ ରିପୋର୍ଟ ଏବଂ ଅନ୍ୟାନ୍ୟ ବୈଜ୍ଞାନିକ ବିଶ୍ଳେଷଣ ରିପୋର୍ଟରୁ ଜଣାପଡିବ ଯେ ଝିଅଟି ଆତ୍ମହତ୍ୟା କରିଛି ନା କେହି ତାକୁ ହତ୍ୟା କରାଯାଇଛି ।

ପୀଡିତାଙ୍କ ବାପାଙ୍କ ଅଭିଯୋଗ କ୍ରମେ ରବିବାର ଅଭିଯୁକ୍ତ ପୁରୁଷବନ୍ଧୁଙ୍କୁ ବାନ୍ଧିଛି ପୋଲିସ୍ । ଏନେଇ କେନ୍ଦ୍ରାପଡ଼ା ଏସପି ସିଦ୍ଧାର୍ଥ କଟାରିଆ କହିଛନ୍ତି, ଯେ ଶନିବାର ପୀଡିତାଙ୍କ ବାପାଙ୍କ ଅଭିଯୋଗ ଆଧାରରେ, ପଟ୍ଟାମୁଣ୍ଡାଇ ଗ୍ରାମୀଣ ପୋଲିସ ଷ୍ଟେସନରେ ଭାରତୀୟ ନ୍ୟାୟ ସଂହିତା ଆଇନର ବିଭିନ୍ନ ଧାରା ଅନୁଯାୟୀ ଏକ ମାମଲା ରୁଜୁ କରାଯାଇଛି, ଯେଉଁଥିରେ ଧାରା ୭୫ (ଯୌନ ନିର୍ଯାତନା), ୭୮ (ଫୋଲୋ କରିବା, ବାରମ୍ବାର ଯୌନ ନିର୍ଯାତନା ଦେବା), ୧୦୮ (ଆତ୍ମହତ୍ୟା ପାଇଁ ପ୍ରୋତ୍ସାହନ), ୬୭ ଓ ୬୭ (କ)- ସୋସିଆଲ ମିଡିଆରେ ଗୋପନୀୟତାର ଉଲ୍ଲଙ୍ଘନ ଏବଂ ପ୍ରମୋଦ କୁମାର ବେହେରାଙ୍କ ବିରୋଧରେ ଆଇଟି ଆଇନ ଭଳି ଦଫା  ଲାଗିଛି ।

ତେବେ ପ୍ରାଥମିକ ତଦନ୍ତରୁ ଏହା ଆତ୍ମହତ୍ୟା ବୋଲି ସନ୍ଦେହ କରୁଛି ପୋଲିସ୍ ।

ତେବେ ମୃତକଙ୍କ ବାପାମା ଏବଂ ପରିବାରର ଅନ୍ୟ ସଦସ୍ୟ ଅଗଷ୍ଟ ୬ରେ ପୀଡିତା ତାଙ୍କ ପୁରୁଷ ବନ୍ଧୁ ପ୍ରମୋଦ ବେହେରାଙ୍କ ବ୍ଲାକମେଲିଂ ଯୋଗୁଁ ନିଜକୁ ନିଆଁ ଲଗାଇ ଆତ୍ମହତ୍ୟା କରିଥିବା ଅଭିଯୋଗ କରିଥିଲେ । ଯାହାକୁ ନେଇ ସେ ଅବସାଦରେ ରହୁଥିଲା ଓ ଶେଷରେ ଆତ୍ମହତ୍ୟା କରିଦେଲା । ବାପାଙ୍କ ଏତଲା ଆଧାରରେ ମାମଲା ରୁଜୁ କରି ପୁରୁଷ ବନ୍ଧୁ ପ୍ରମୋଦ ନାଁରେ ସଙ୍ଗୀନ ଦଫା ଲଗାଇଛି ପଟ୍ଟାମୁଣ୍ଡାଇ ଗ୍ରାମାଞ୍ଚଳ ପୋଲିସ୍।