କାମରିବା ବନ୍ଦ କରିଦେବ ଆଇଫୋନ ! ଲକ୍ଷ ଳକ୍ଷ ୟୁଜର୍ସଙ୍କ ପାଇଁ ରହିଛି ବିପଦ

ନୂଆଦିଲ୍ଲୀ: ଯଦି ଆପଣ ଆଇଫୋନ୍‌ ବ୍ୟବହାର କରୁଛନ୍ତି, ତେବେ ସତର୍କ ହେବାର ଆବଶ୍ୟକତା ରହିଛି। ଭାରତ ସରକାରଙ୍କ ଏଜେନ୍ସି କମ୍ପ୍ୟୁଟର ଏମରଜେନ୍ସି ରେସପନ୍ସ ଟିମ୍‌ (CERT-In) ଭାରତରେ ଆପଲ୍‌ ଡିଭାଇସ୍‌ ବ୍ୟବହାର କରୁଥିବା ସମସ୍ତ ଉପଭୋକ୍ତାଙ୍କ ପାଇଁ ଏକ ଚେତାବନୀ ଜାରି କରିଛି। ଏଥିରେ କୁହାଯାଇଛି ଯେ ଆପଲ୍‌ ଡିଭାଇସ୍‌ରେ ଏକ ସୁରକ୍ଷା ତ୍ରୁଟି ମିଳିଛି, ଯାହାର ଫାଇଦା ଉଠାଇ ହ୍ୟାକର୍ସ ଆପଣଙ୍କ ଡିଭାଇସ୍‌କୁ ହ୍ୟାକ୍‌ କରିପାରନ୍ତି। ଏହା କାରଣରୁ ଆପଣଙ୍କ ଆଇଫୋନ୍‌ କାମ କରିବା ବନ୍ଦ କରିପାରେ ଏବଂ ଡିଭାଇସ୍‌ର ପ୍ରୋସେସ୍‌ ମେମୋରୀ ମଧ୍ୟ ନଷ୍ଟ ହୋଇପାରେ।

ଏହି ଡିଭାଇସ୍‌ଗୁଡ଼ିକରେ ହ୍ୟାକିଂର ଅଧିକ ବିପଦ

iOS କିମ୍ବା iPadOS 26.0.1ରୁ ପୁରୁଣା ସଂସ୍କରଣରେ ଚାଲୁଥିବା ଆଇଫୋନ୍‌ ଉପଭୋକ୍ତାଙ୍କ ପାଇଁ ହ୍ୟାକିଂର ବିପଦ ଅଧିକ ରହିଛି। ଏହା ବ୍ୟତୀତ macOS Tahoe 26.0.1ରୁ ପୁରୁଣା ସଂସ୍କରଣ, macOS Sequoiaର 14.8.1ରୁ ପୁରୁଣା ସଂସ୍କରଣ ଏବଂ visionOSର 26.0.1ରୁ ପୁରୁଣା ସଂସ୍କରଣରେ ଚାଲୁଥିବା ଡିଭାଇସ୍‌ଗୁଡ଼ିକରେ ମଧ୍ୟ ହ୍ୟାକିଂର ଅଧିକ ଆଶଙ୍କା ରହିଛି। ଏହି ପୁରୁଣା ସଂସ୍କରଣଗୁଡ଼ିକରେ ଏକ ସୁରକ୍ଷା ତ୍ରୁଟି ମିଳିଛି, ଯାହା ଦ୍ୱାରା ବ୍ୟକ୍ତି କିମ୍ବା କମ୍ପାନୀଙ୍କ ଡିଭାଇସ୍‌କୁ ଟାର୍ଗେଟ କରାଯାଇପାରେ। CERT-In ଅନୁଯାୟୀ, ଏହି ତ୍ରୁଟିର ବିପଦ ସ୍ତର ମଧ୍ୟମ ଅଟେ ଏବଂ ଏହାକୁ ଡାଟାରେ ହେରଫେର କରିବା ପାଇଁ ବ୍ୟବହାର କରାଯାଇପାରେ। ଟାର୍ଗେଟ ହେବା ପରେ ପ୍ରଭାବିତ ଡିଭାଇସ୍‌ କାମ କରିବା ବନ୍ଦ କରିଦେବ ଏବଂ ଏହାର ଆପ୍ସଗୁଡ଼ିକ ବାରମ୍ବାର କ୍ରାସ୍‌ ହେବାକୁ ଲାଗିବ। ଚେତାବନୀ ଅନୁଯାୟୀ, ଆଉଟ୍‌-ଅଫ୍‌-ବାଉଣ୍ଡ ରାଇଟ୍‌ ଇସୁ କାରଣରୁ ଏହି ତ୍ରୁଟି ଉପୁଜିଛି।

ଉପଭୋକ୍ତାଙ୍କ ପାଇଁ ଏବେ କ’ଣ ବିକଳ୍ପ?

ଏହି ସୁରକ୍ଷା ତ୍ରୁଟିର ପୂର୍ଣ୍ଣ ପ୍ରଭାବ ପୁରୁଣା ସଂସ୍କରଣରେ ଦେଖାଯାଉଛି। ଅର୍ଥାତ୍‌ ପୁରୁଣା ସଂସ୍କରଣରେ ଡିଭାଇସ୍‌ ଚଳାଉଥିବା ଉପଭୋକ୍ତାଙ୍କ ପାଇଁ ବିପଦ ଅଧିକ। ଏପରି କୌଣସି ବିପଦରୁ ରକ୍ଷା ପାଇବା ପାଇଁ ପ୍ରଥମେ ଆପଣଙ୍କ ଅପରେଟିଂ ସିଷ୍ଟମକୁ ଅପଡେଟ୍‌ କରନ୍ତୁ। ସାଧାରଣତଃ ହ୍ୟାକିଂ କିମ୍ବା ସାଇବର ବିପଦରୁ ରକ୍ଷା ପାଇବା ପାଇଁ ଡିଭାଇସ୍‌କୁ ଅପଡେଟ୍‌ ରଖିବାକୁ ପରାମର୍ଶ ଦିଆଯାଇଛି। ଯଦି ଆପଣ ମ୍ୟାନୁଆଲି ଅପଡେଟ୍‌ କରିବାକୁ ନାଚାହାନ୍ତି, ତେବେ ସେଟିଂସ୍‌କୁ ଯାଇ ଅଟୋମେଟିକ୍‌ ଅପଡେଟ୍‌ ସକ୍ଷମ କରିପାରନ୍ତି।