ନୂଆଦିଲ୍ଲୀ: ଭାରତରେ କଲର୍ ପରିଚୟକୁ ନେଇ ଏକ ବଡ଼ ପରିବର୍ତ୍ତନ ଆରମ୍ଭ ହୋଇସାରିଛି । TRAIର ନୂଆ ପଦକ୍ଷେପ CNAP (Caller Name Presentation) ଆସିବା ପରେ ଏହି ପ୍ରଶ୍ନ ଉଠୁଛି ଯେ କ’ଣ ଏବେ True caller ଭଳି ଲୋକପ୍ରିୟ ଆପ୍ର ଆବଶ୍ୟକତା ଶେଷ ହୋଇଯିବ । କିନ୍ତୁ ବାସ୍ତବତା ଏହାଠାରୁ କିଛି ଭିନ୍ନ ଏବଂ ରୋଚକ ଅଟେ ।
CNAP ଅର୍ଥାତ୍ କଲର୍ ନେମ୍ ପ୍ରେଜେଣ୍ଟେସନ୍, ଭାରତୀୟ ଦୂରସଞ୍ଚାର ନିୟାମକ ପ୍ରାଧିକରଣ (TRAI)ର ଏକ ନୂଆ ବ୍ୟବସ୍ଥା । ଏହା ଦ୍ୱାରା ମୋବାଇଲ୍ ଉପଭୋକ୍ତାଙ୍କୁ କୌଣସି ଆପ୍ ଡାଉନଲୋଡ୍ ନକରି ଏବଂ ସବସ୍କ୍ରିପସନ୍ ବିନା, ଆସୁଥିବା କଲ୍ ଉପରେ କଲର୍ର ନାମ ଦେଖାଇ ଦିଆଯାଏ । ଏହି ନାମ ଟେଲିକମ୍ କମ୍ପାନୀଙ୍କ ପାଖରେ ଥିବା KYC-ଆଧାରିତ ଅଫିସିଆଲ ରେକର୍ଡରୁ ନିଆଯାଏ, ଯାହା ସିମ୍ ନେବା ସମୟରେ ଦସ୍ତାବିଜ୍ ମାଧ୍ୟମରେ ରେଜିଷ୍ଟର୍ ହୋଇଥାଏ । ଅର୍ଥାତ୍ କଲ୍ ଆସିଲେ ନେଟୱର୍କ ନିଜେ ନମ୍ବର ସହ ଜଡ଼ିତ ରେଜିଷ୍ଟର୍ଡ ନାମକୁ ସ୍କ୍ରିନ୍ରେ ଦେଖାଇ ଦେଇଥାଏ ।
ବର୍ତ୍ତମାନ CNAPକୁ ୪ଜି ଏବଂ ୫ଜି ନେଟୱର୍କରେ ଚରଣବଦ୍ଧ ଭାବେ ଲାଗୁ କରାଯାଉଛି । ପରେ ଏହାକୁ ପୁରୁଣା ନେଟୱର୍କରେ ମଧ୍ୟ ଆଣିବାର ଯୋଜନା ଅଛି । ଏହାର ସବୁଠାରୁ ବଡ଼ ବିଶେଷତା ହେଲା ଏଥିପାଇଁ ଇଣ୍ଟରନେଟ୍ କନେକସନ୍ କିମ୍ବା କୌଣସି ଥାର୍ଡ-ପାର୍ଟି ଆପ୍ର ଆବଶ୍ୟକତା ନାହିଁ । TRAI ଏହି ବିକଳ୍ପ ମଧ୍ୟ ଦେଇଛନ୍ତି ଯେ ଯେଉଁ ଉପଭୋକ୍ତା ନିଜ ନାମ ଦେଖାଇବାକୁ ଚାହାନ୍ତି ନାହିଁ, ସେମାନେ CLIR (Calling Line Identification Restriction) ସେଟିଂ ମାଧ୍ୟମରେ ଏହାରୁ ବାହାରେ ରହିପାରିବେ ।
CNAPର ମୁଖ୍ୟ ଉଦ୍ଦେଶ୍ୟ ଏକ ମାନକ ଏବଂ ବିଶ୍ୱସନୀୟ କଲର୍ ଆଇଡି ସିଷ୍ଟମ୍ ପ୍ରଦାନ କରିବା, ଯାହା ସିଧା ନେଟୱର୍କ ସ୍ତରରେ କାମ କରେ । ଏହା ଦ୍ୱାରା ଫର୍ଜି ପରିଚୟ, ଭୁଲ ନାମ ଏବଂ ଅଜଣା କଲ୍କୁ ନେଇ ହେଉଥିବା ସମସ୍ୟା କମ୍ ହୋଇପାରିବ ।ଟେଲିକମ୍ କମ୍ପାନୀ ଏବଂ ଡିଭାଇସ୍ ନିର୍ମାତାଙ୍କୁ ମଧ୍ୟ କୁହାଯାଇଛି ଯେ ସେମାନେ ସମୟରେ ଡିଭାଇସ୍ ସପୋର୍ଟ ନିଶ୍ଚିତ କରନ୍ତୁ । ଆଶା କରାଯାଉଛି ଯେ ୨୦୨୬ର ଆରମ୍ଭରେ ଏହି ସିଷ୍ଟମ୍ ବଡ଼ ପରିମାଣରେ ଉପଲବ୍ଧ ହେବ ।
Truecaller ଏକ ଜଣାଶୁଣା କଲର୍ ଆଇଡି ଏବଂ ସ୍ପାମ୍ ଡିଟେକସନ୍ ଆପ୍ ଅଟେ, ଯାହା ଆଣ୍ଡ୍ରଏଡ୍ ଏବଂ iOS ଉଭୟରେ ଉପଲବ୍ଧ । ଏହାର ପରିଚୟ କେବଳ କଲର୍ର ନାମ ଦେଖାଇବାରେ ସୀମିତ ନୁହେଁ । Truecallerର ଡାଟାବେସ୍ ଉପଭୋକ୍ତା କମ୍ୟୁନିଟିରୁ ମିଳୁଥିବା ତଥ୍ୟ ଏବଂ ରିଅଲ୍-ଟାଇମ୍ ପ୍ୟାଟର୍ନ୍ ଉପରେ ଆଧାରିତ । ଏହି କାରଣରୁ ଏହା କଲ୍କୁ ସ୍ପାମ୍, ଫ୍ରଡ୍, ବିଜନେସ୍ କିମ୍ବା ପର୍ସନାଲ୍ ଭାବେ ଟ୍ୟାଗ୍ କରି ଦେଖାଇ ପାରେ । ଏହା ଛଡ଼ା Truecallerରେ କଲ୍ ବ୍ଲକିଂ, ସ୍ପାମ୍ ଆଲର୍ଟ, ବିଜନେସ୍ ଡାଇରେକ୍ଟରୀ, କଲ୍ର କାରଣ, ଲୋଗୋ ବ୍ୟାଜ୍ ଏବଂ ଭଏସ୍ମେଲ୍ ଭଳି ସୁବିଧା ମଧ୍ୟ ମିଳିଥାଏ । କିନ୍ତୁ ଏଥିପାଇଁ ଆପ୍ ଇନ୍ଷ୍ଟଲ୍ କରିବା ଏବଂ ମୋବାଇଲ୍ ନମ୍ବରରୁ ରେଜିଷ୍ଟ୍ରେସନ୍ ଜରୁରୀ ।
CNAP ଏବଂ Truecaller ମଧ୍ୟରେ ସବୁଠାରୁ ବଡ଼ ଅନ୍ତର ହେଲା ଡାଟାର ଉତ୍ସ । CNAP ଟେଲିକମ୍ ଅପରେଟର୍ର ଆଧିକାରିକ ଏବଂ KYC-ଭେରିଫାଏଡ୍ ରେକର୍ଡ ଉପରେ ନିର୍ଭର କରେ, ଯେତେବେଳେ Truecaller ଉପଭୋକ୍ତା ଦ୍ୱାରା ସେୟାର ହୋଇଥିବା ତଥ୍ୟ ଏବଂ କମ୍ୟୁନିଟି ଡାଟାରୁ ପରିଚୟ ଗଢ଼ିଥାଏ ।CNAP ଏକ ନେଟୱର୍କ-ଲେଭଲ୍ ସୁବିଧା ଯାହା ଇଣ୍ଟରନେଟ୍ ଏବଂ ଆପ୍ ବିନା କାମ କରେ । ଅନ୍ୟପଟେ Truecaller ଏକ ଫିଚର-ରିଚ୍ ଆପ୍ ଯାହାକୁ ଇନ୍ଷ୍ଟଲ୍ କରିବା ଏବଂ ସମୟ ସମୟରେ ଅପଡେଟ୍ କରିବା ପଡ଼େ । ଫଙ୍କସନାଲିଟି କ୍ଷେତ୍ରରେ ମଧ୍ୟ ଉଭୟ ଭିନ୍ନ । CNAP କେବଳ ରେଜିଷ୍ଟର୍ଡ ନାମ ଦେଖାଇବାରେ ସୀମିତ ଯେତେବେଳେ Truecaller ସ୍ପାମ୍ ବ୍ଲକିଂ, ଫ୍ରଡ୍ ଆଲର୍ଟ ଏବଂ କଲ୍ ସହ ଜଡ଼ିତ ଅତିରିକ୍ତ ତଥ୍ୟ ଦେଇଥାଏ ।
