ଭୁବନେଶ୍ୱର: ସ୍ୱାଭିମାନ ସହଯୋଗରେ କେତକୀ ଫାଉଣ୍ଡେସନ୍ ଟ୍ରଷ୍ଟ ଦ୍ୱାରା ଭୁବନେଶ୍ୱରର ଭାରତୀୟ ବିଦ୍ୟା ଭବନରେ ବିଶ୍ୱ କବିତା ଦିବସ ଏବଂ ବିଶ୍ୱ ଡାଉନ୍ ସିଣ୍ଡ୍ରୋମ୍ ଦିବସ ଅବସରରେ ସାହିତ୍ୟିକ ଅଭିବ୍ୟକ୍ତି ଓ ସାମାଜିକ ସଚେତନତାର ଏକ ସୁନ୍ଦର ସନ୍ଧ୍ୟା ଅନୁଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମ ଡାଉନ୍ ସିଣ୍ଡ୍ରୋମ ସଚେତନତାର ଗୁରୁତ୍ୱ ଉପରେ ଆଲୋକପାତକରିବା ସହିତ, ପଦ୍ୟ ଶକ୍ତିର ଉତ୍ସବକୁ ପାଳନ କରିବା ପାଇଁ କବି, ବିଦ୍ୱାନ, ଏବଂ କର୍ମୀମାନଙ୍କୁ ଏକତ୍ରିତ କରିଥିଲା ।
ଜ୍ୟୋତିରଞ୍ଜନ ସ୍ୱାଇଁଙ୍କ ଦ୍ୱାରା ସ୍ୱାଗତ ସଭାରେ ଏହି ଦ୍ୱୈତ ଅବସରର ଗୁରୁତ୍ୱ ଉପସ୍ଥାପିତ ହୋଇଥିଲା । କବି ପବିତ୍ର ମୋହନ କରଙ୍କ ଦ୍ୱାରା ସମ୍ପୂର୍ଣ୍ଣ କାର୍ଯ୍ୟକ୍ରମଟି ପରିଚାଳିତ ହୋଇଥିଲା, ଯାହା ଏକ ସୁନିୟୋଜିତ ଓ ଅର୍ଥବାହୀ ପରିବେଶ ସୃଷ୍ଟି କରିପାରିଥିଲା।
ଏହି ଅବସରରେ ଡାଉନ୍ ସିଣ୍ଡ୍ରୋମ୍ ସହିତ ଶିଶୁମାନେ ଓ ସେମାନଙ୍କର ଅଭିଭାବକମାନଙ୍କ ସହଭାଗୀତା କାର୍ଯ୍ୟକ୍ରମଟିକୁ ଏକ ଜୀବନ୍ତ ଆଲୋଡ଼ନରେ ଭରିଦେଇଥିଲା । ସମାଜରେ ସମାନତା, ଗ୍ରହଣଯୋଗ୍ୟତା ଓ ସହାନୁଭୂତିର ଆବଶ୍ୟକତା ଉପରେ ମଧ୍ୟ ଏହି କାର୍ଯ୍ୟକ୍ରମ ଆଲୋକପାତ କରିଥିଲା ।
ବିଶିଷ୍ଟ ସମାଜସେବୀ ତଥା ସ୍ୱାଭିମାନର ପ୍ରତିଷ୍ଠାତା ଡ଼ଃ ସୃତି ମହାପାତ୍ର ମୁଖ୍ୟ ଅତିଥି ଭାବେ ଯୋଗଦେଇ ସମାଜରେ ସମାନ ସୁଯୋଗ ଓ ସଚେତନତାର ଗୁରୁତ୍ୱ ଉପରେ ଅଲୋକପାତ କରିଥିଲେ ।
ପରେ ଏକ ଆକର୍ଷଣୀୟ କବିତା ପାଠୋତ୍ସବ ଅନୁଷ୍ଠିତ ହୋଇଥିଲା, ଯେଉଁଥିରେ ମନୁଆ ଦାସ, ଭାରତ ମାଝୀ, ବିୟତପ୍ରଜ୍ଞା ତ୍ରିପାଠୀ, ଭାରଦ୍ୱାଜ ମିଶ୍ର, ସତ୍ୟ ରଞ୍ଜନ ପ୍ରହରାଜ, ରସ୍ମିତା ବେହେରା, ଏବଂ ପବିତ୍ର ମୋହନ କରଙ୍କ ଭଳି ପ୍ରସିଦ୍ଧ କବିମାନେ ନିଜ ରଚନା ପାଠ କରିଥିଲେ । ସେମାନଙ୍କର କବିତାରେ ମାନବିକତା, ଅନୁଭୂତି ଓ ସାମୁଦାୟିକ ସମ୍ପର୍କର ସୁନ୍ଦର ପ୍ରତିଫଳନ ଦେଖିବାକୁ ମିଳିଥିଲା ।
ଡ଼ଃ ରବୀନ୍ଦ୍ର କୁ ସ୍ୱାଇଁଙ୍କ ସମାପନୀ ମନ୍ତବ୍ୟ ସହିତ କାର୍ଯ୍ୟକ୍ରମ ଶେଷ ହୋଇଥିଲା । ପରେ ଅତିଥି କବିମାନଙ୍କୁ ସମ୍ମାନ ପ୍ରଦାନ କରାଯାଇଥିଲା । କପିଳାଶ ଭୂୟାଁ ଧନ୍ୟବାଦ ଜ୍ଞାପନ କରି କାର୍ଯ୍ୟକ୍ରମର ସଫଳତା ପାଇଁ ସମସ୍ତଙ୍କୁ କୃତଜ୍ଞତା ଜଣାଇଥିଲେ ।
କେତକୀ ଫାଉଣ୍ଡେସନ ଟ୍ରଷ୍ଟ ଓଡ଼ିଶାର କଳା, ସଂସ୍କୃତି ଓ ସାହିତ୍ୟର ପ୍ରଚାର, ସଂରକ୍ଷଣ ଓ ପ୍ରସାର ପାଇଁ ଉତ୍ସର୍ଗୀକୃତ । କେତକୀ ଟ୍ରଷ୍ଟ ପ୍ରକାଶନ ଏବଂ ଅନ୍ୟାନ୍ୟ ପଦକ୍ଷେପ ମାଧ୍ୟମରେ ଉଲ୍ଲେଖନୀୟ କାର୍ଯ୍ୟଗୁଡ଼ିକୁ ସମର୍ଥନ ଏବଂ ପ୍ରୋତ୍ସାହିତ କରିବାକୁ ଚେଷ୍ଟାକରେ । ସ୍ୱାଭିମାନ ସହଯୋଗରେ ଟ୍ରଷ୍ଟ ବହୁ ବର୍ଷରୁ ସମାଜରେ ସଚେତନତା, ସମାନତା ଓ ସାମୁଦାୟିକ ଉନ୍ନତି ପାଇଁ ବିଭିନ୍ନ ପଦକ୍ଷେପ ନେଇଆସୁଛି ଆଉ ଏ ପ୍ରୟାସ ଆଗକୁ ମଧ୍ୟ ଜାରି ରହିବ ।