ବେଜିଂ: ମାରାତ୍ମକ କରୋନା ଭୂତାଣୁ ପୁଣି ଜଣେ ଡାକ୍ତରଙ୍କ ଜୀବନ ନେଇଛି । ତେବେ ବଡ କଥା ହେଉଛି ଏହି ଭୂତାଣୁକୁ ପ୍ରଥମେ ଚିହ୍ନଟ କରି ଲୋକଲୋଚନକୁ ଆଣିଥିବା ଡାକ୍ତର ହିଁ ଭୂତାଣୁର ଶୀକାର ହୋଇଛନ୍ତି । ଦୀର୍ଘଦିନ ହେଲା କରୋନାରେ ସଂକ୍ରମିତ ହୋଇ ଜୀବନ ସହ ସଂଘର୍ଷ କରୁଥିବା ଚୀନ୍ ଉହାନର ଡାକ୍ତର ଲି ୱେନଲିଆଙ୍ଗଙ୍କ ଆଜି ମୃତ୍ୟୁ ହୋଇଛି । ପିପୁଲସ ଡେଲିରେ ଡାକ୍ତରଙ୍କ ମୃତ୍ୟୁ ବାବଦରେ ସୂଚନା ଦିଆଯିବା ସହ ଶେଷ ଶ୍ରଦ୍ଧାଂଜଳି ଦିଆଯାଇଛି । 
୨୦୧୯ ଡିସେମ୍ବର ୩୦ ତାରିଖରେ ପ୍ରଥମେ ଲି ୱେନଲିଆଙ୍ଗ ହିଁ କରୋନା ଭୂତାଣୁକୁ ଚିହ୍ନଟ କରିଥିଲେ । ମେଡିକାଲକୁ ଆସିଥିବା ସ୍ଥାନୀୟ ଅଂଚଳର ୭ ଜଣ ରୋଗୀଙ୍କ ଠାରେ ସାର୍ସ ଭଳି ଲକ୍ଷଣ ଦେଖାଦେଇଥିବା ବେଳେ ପରୀକ୍ଷା ପରେ ଏହି ରୋଗ କରୋନା ଭୂତାଣୁ ଜନିତ ବୋଲି ସେ ଜାଣିବାକୁ ପାଇଥିଲେ । ଏନେଇ ସେ ସରକାରଙ୍କୁ ସତର୍କ କରାଇଥିଲେ । ଏପରିକି ସେ ପଢୁଥିବା ପୁରାତନ ସ୍କୁଲ ଗ୍ରୁପରେ ମଧ୍ୟ କରୋନା ଭୂତାଣୁ ବାବଦରେ ସୂଚନା ଦେଇଥିଲେ । ସାଙ୍ଗସାଥୀ ଓ ପରିବାରକୁ ସେ ପଠାଇଥିବା ମେସେଜ ଓ ଭିଡିଓ ପରେ ଭାଇରାଲ୍ ହୋଇଥିଲା । ଏବଂ ବିଶ୍ୱ ସାମ୍ନାକୁ ଆସିଥିଲା କରୋନା ଭୂତାଣୁର ଭୟଙ୍କର ସତ ।
Comments are closed.