ନୂଆଦିଲ୍ଲୀ: ଅଗଷ୍ଟ ୨୬ ତାରିଖରେ ନେପାଳରେ ଘଟିଥିବା ଭୟଙ୍କର ବନ୍ୟା ଅନେକ ଅଞ୍ଚଳକୁ ଧ୍ୱଂସ କରିଦେଇଥିଲା। ନଦୀର ପାଣି ଦେଖୁଦେଖୁ ସବୁ ଛାରଖାର କରି ଦେଇଥିଲା। ଏହି ଭୟଙ୍କର ପରିସ୍ଥିତି ମଧ୍ୟରେ ନୂଆକୋଟର ଏକ ସ୍କୁଲର ୧,୬୪୩ ପିଲାଙ୍କ ଜୀବନ ବଞ୍ଚିଯାଇଛି।
ସ୍କୁଲର ପ୍ରଧାନଶିକ୍ଷକ ରାଜେନ୍ଦ୍ର ଦାୱାଡିଙ୍କ ସମୟୋଚିତ ଏବଂ ସୁଚିନ୍ତିତ ନିଷ୍ପତ୍ତି ହଜାର ହଜାର ପିଲାଙ୍କୁ ମୃତ୍ୟୁ ମୁହଁରୁ ରକ୍ଷା କରିଥିଲା।
ତ୍ରିଶୂଳୀ ନଦୀ ଉପତ୍ୟକାରେ ଅବସ୍ଥିତ ତ୍ରିଭୁବନ ତ୍ରିଶୂଳୀ ମାଧ୍ୟମିକ ବିଦ୍ୟାଳୟରେ ଏହି ଘଟଣା ଘଟିଥିଲା। ସେହି ଦିନ ଶ୍ରେଣୀଗୁଡ଼ିକ ସ୍ୱାଭାବିକ ଭାବରେ ଚାଲିଥିଲା ଯେତେବେଳେ ଅଞ୍ଚଳରେ ହଠାତ୍ ବନ୍ୟା ମାଡ଼ି ଆସିଥିଲା। ରାଜେନ୍ଦ୍ର ଦାୱାଡି ବିପଦର ଗମ୍ଭୀରତାକୁ ଅନୁଭବ କରି ତୁରନ୍ତ ପିଲାମାନଙ୍କୁ ସ୍ଥାନାନ୍ତର କରିବାକୁ ନିଷ୍ପତ୍ତି ନେଇଥିଲେ। ସେ ତୁରନ୍ତ ଛାତ୍ରମାନଙ୍କୁ ଉଚ୍ଚ ଏବଂ ସୁରକ୍ଷିତ ସ୍ଥାନକୁ ସ୍ଥାନାନ୍ତର କରିଥିଲେ।
ରିପୋର୍ଟ ଅନୁସାରେ, ପ୍ରାୟ ୨୦ ମିନିଟ୍ ମଧ୍ୟରେ ସ୍କୁଲ କ୍ୟାମ୍ପସ ଖାଲି କରାଯାଇଥିଲା। ଏହାର କିଛି ସମୟ ପରେ ଏକ ପ୍ରବଳ ଜଳ ପ୍ରବାହ ଫଳରେ ସ୍କୁଲର କୋଠା ଭୁଶୁଡ଼ି ପଡ଼ିଥିଲା।
ସ୍କୁଲ କୋଠା ଏବଂ ଆଖପାଖ ଅଞ୍ଚଳ ବନ୍ୟା ପାଣି ଏବଂ ଭଗ୍ନାବଶେଷ ଦ୍ୱାରା ଗୁରୁତର ଭାବରେ ପ୍ରଭାବିତ ହୋଇଥିଲା। ତେବେ ପିଲାମାନଙ୍କୁ ସମୟ ମଧ୍ୟରେ ସ୍ଥାନାନ୍ତର କରାଯିବା ଯୋଗୁଁ ୧୬୪୩ ପିଲାଙ୍କ ଜୀବନ ବଞ୍ଚିଯାଇଥିଲା। ନେପାଳରେ ବିପର୍ଯ୍ୟୟ ସମୟରେ ରାଜେନ୍ଦ୍ର ଦାୱାଡିଙ୍କ ନିଷ୍ପତ୍ତିକୁ ସବୁଠି ପ୍ରଶଂସା କରାଯାଉଛି।
ନେପାଳରେ ଏହି ଆକସ୍ମିକ ବନ୍ୟା ବ୍ୟାପକ କ୍ଷୟକ୍ଷତି ଘଟାଇଛି। ରିପୋର୍ଟ ଅନୁଯାୟୀ, ନେପାଳରେ ମୃତ୍ୟୁ ସଂଖ୍ୟା ୭୦୦ ଅତିକ୍ରମ କରିଥିବା ବେଳେ ପ୍ରାୟ ୩୦୦୦ରୁ ଅଧିକ ଲୋକ ଏପର୍ଯ୍ୟନ୍ତ ନିଖୋଜ ଅଛନ୍ତି। ଖରାପ ପାଗ ଏବଂ କ୍ଷତିଗ୍ରସ୍ତ ରାସ୍ତା ରିଲିଫ୍ ଏବଂ ଉଦ୍ଧାର କାର୍ଯ୍ୟରେ ବାଧା ସାଜିଛି।