ନୂଆଦିଲ୍ଲୀ: ଟ୍ରେନ୍ ଯାତ୍ରା ସମୟରେ ଅନେକ ଥର ଆମକୁ ଷ୍ଟେସନରେ ଘଣ୍ଟା ଘଣ୍ଟା ଧରି ଅପେକ୍ଷା କରିବାକୁ ପଡ଼ିଥାଏ। ବିଶେଷକରି ଟ୍ରେନ୍ ବିଳମ୍ବ ଥିଲେ କିମ୍ବା ରାତି ଅଧରେ ଟ୍ରେନ୍ ପହଞ୍ଚିଲେ ଯାତ୍ରୀମାନେ ଷ୍ଟେସନରେ ଥିବା ୱେଟିଂ ରୁମ୍ ବା ବିଶ୍ରାମାଗାରର ସାହାରା ନେଇଥାନ୍ତି। କିନ୍ତୁ କ’ଣ ଆପଣ ଜାଣନ୍ତି କି ରେଳ ଷ୍ଟେସନରେ ଜଣେ ଯାତ୍ରୀ କେତେ ସମୟ ପର୍ଯ୍ୟନ୍ତ ରହିପାରିବେ, ସେ ନେଇ ଭାରତୀୟ ରେଳବାଇର କିଛି ସ୍ୱତନ୍ତ୍ର ନିୟମ ରହିଛି? ନିୟମ ନ ଜାଣିଲେ ଆପଣଙ୍କୁ ଅଯଥାରେ ଜୋରିମାନା ଦେବାକୁ ପଡ଼ିପାରେ ।
ରେଳବାଇ ନିୟମ ଅନୁଯାୟୀ, କୌଣସି ଯାତ୍ରୀ ଅସୀମିତ ସମୟ ପାଇଁ ଷ୍ଟେସନ କିମ୍ବା ୱେଟିଂ ରୁମ୍ରେ ରହିପାରିବେ ନାହିଁ। ଦିନ ସମୟରେ ଯାତ୍ରା କରୁଥିବା ଯାତ୍ରୀମାନେ ନିଜ ଟ୍ରେନ୍ ଛାଡ଼ିବାର ମାତ୍ର ୨ ଘଣ୍ଟା ପୂର୍ବରୁ ଏବଂ ଗନ୍ତବ୍ୟ ସ୍ଥଳରେ ପହଞ୍ଚିବାର ୨ ଘଣ୍ଟା ପର୍ଯ୍ୟନ୍ତ ହିଁ ଷ୍ଟେସନରେ ଅପେକ୍ଷା କରିପାରିବେ। କିନ୍ତୁ ଯଦି ଆପଣଙ୍କର ଯାତ୍ରା ରାତିରେ ଅଛି କିମ୍ବା ଟ୍ରେନ୍ ରାତି ସମୟରେ ପହଞ୍ଚୁଛି, ତେବେ ଏହି ସମୟ ସୀମାକୁ ସାମାନ୍ୟ କୋହଳ କରାଯାଇଥାଏ। ରାତି ସମୟରେ ଯାତ୍ରୀମାନେ ସୁରକ୍ଷା ଦୃଷ୍ଟିରୁ ସର୍ବାଧିକ ୬ ଘଣ୍ଟା ପର୍ଯ୍ୟନ୍ତ ୱେଟିଂ ରୁମ୍ରେ ବିତାଇ ପାରିବେ। ତେବେ ଯଦି ଟ୍ରେନ୍ ବିଳମ୍ବରେ ଚାଲୁଥାଏ, ସେହି ସ୍ଥିତିରେ ଯାତ୍ରୀଙ୍କୁ ଅଧିକ ସମୟ ରହିବାକୁ ଅନୁମତି ମିଳିଥାଏ ।
ୱେଟିଂ ରୁମ୍ର ବ୍ୟବହାର କେବଳ ବୈଧ ଟିକେଟ୍ ଥିବା ଯାତ୍ରୀମାନେ ହିଁ କରିପାରିବେ। ରେଳବାଇ ପକ୍ଷରୁ ସ୍ଲିପର, ଥାର୍ଡ ଏସି, ସେକେଣ୍ଡ ଏସି ଏବଂ ଫାଷ୍ଟ କ୍ଲାସ ଯାତ୍ରୀଙ୍କ ପାଇଁ ପୃଥକ ପୃଥକ ବିଶ୍ରାମାଗାରର ବ୍ୟବସ୍ଥା କରାଯାଇଛି। କନଫର୍ମ କିମ୍ବା ଆରଏସି ଟିକେଟ୍ ଥିଲେ ଆପଣ ବିନା ମୂଲ୍ୟରେ ନିଜ ଶ୍ରେଣୀର ୱେଟିଂ ରୁମ୍ ବ୍ୟବହାର କରିପାରିବେ। ଆଜିକାଲି ପ୍ରମୁଖ ଷ୍ଟେସନଗୁଡ଼ିକରେ ଏକ୍ସଜିକ୍ୟୁଟିଭ୍ ଲାଉଞ୍ଜର ସୁବିଧା ମଧ୍ୟ ରହିଛି, ଯେଉଁଠାରେ ଘଣ୍ଟା ପ୍ରତି ନିର୍ଦ୍ଧାରିତ ଶୁଳ୍କ ଦେଇ ଅଧିକ ସମୟ ଏବଂ ଉନ୍ନତ ସୁବିଧା ପାଇପାରିବେ ।
ଧ୍ୟାନ ରଖିବା ଜରୁରୀ ଯେ, ଯଦି କୌଣସି ବ୍ୟକ୍ତି ବିନା ଟିକେଟରେ କିମ୍ବା ନିର୍ଦ୍ଧାରିତ ସମୟରୁ ଅଧିକ ସମୟ ଷ୍ଟେସନ ପରିସରରେ ରହୁଥିବାର ଧରାପଡ଼ନ୍ତି, ତେବେ ରେଳବାଇ ଆଇନ ଅନୁସାରେ ତାଙ୍କ ଠାରୁ ଫାଇନ୍ ଆଦାୟ କରାଯିବ। ଷ୍ଟେସନରେ ଅଯଥା ଭିଡ଼ ନିୟନ୍ତ୍ରଣ କରିବା ଏବଂ ପ୍ରକୃତ ଯାତ୍ରୀଙ୍କ ସୁରକ୍ଷା ନିଶ୍ଚିତ କରିବା ଉଦ୍ଦେଶ୍ୟରେ ରେଳବାଇ ପକ୍ଷରୁ ଏଭଳି କଡ଼ା ନିୟମ ଲାଗୁ କରାଯାଇଛି। ଯାଞ୍ଚକାରୀ ଅଧିକାରୀ କିମ୍ବା ଆରପିଏଫ୍ ଯେକୌଣସି ସମୟରେ ଟିକେଟ୍ ଯାଞ୍ଚ କରିପାରନ୍ତି, ତେଣୁ ଯାତ୍ରୀମାନେ ସର୍ବଦା ନିଜ ଟିକେଟ୍ ପାଖରେ ରଖିବା ଉଚିତ୍।
