ମିସ୍ ୱାର୍ଲ୍ଡ ଫିନାଲେରେ ନିରାଶ ହେଲା ଭାରତ: ଟପ୍-୪୦ରେ ସୁନ୍ଦର ପ୍ରଦର୍ଶନ ପରେ ବି ବିଦାୟ ନେଲେ ନିକିତା ପୋରୱାଲ

ନୂଆଦିଲ୍ଲୀ: ମିସ୍ ୱାର୍ଲ୍ଡ ୨୦୨୬ ପ୍ରତିଯୋଗିତାରେ ଭାରତର ସଫର ଶେଷ ହୋଇଛି। ଭିଏତନାମର ନା ଟ୍ରାଙ୍ଗ୍ ସହରରେ ଅନୁଷ୍ଠିତ ହେଉଥିବା ୭୩ତମ ମିସ୍ ୱାର୍ଲ୍ଡ ପ୍ରତିଯୋଗିତାରେ ଭାରତର ପ୍ରତିନିଧିତ୍ୱ କରୁଥିବା ନିକିତା ପୋରୱାଲ ଟପ୍-୨୦ ତାଲିକାରେ ସ୍ଥାନ ପାଇବାରୁ ବଞ୍ଚିତ ହୋଇଛନ୍ତି । ଏହା ସହ ତାଙ୍କର ଏହି ବିଶ୍ୱସ୍ତରୀୟ ସୌନ୍ଦର୍ଯ୍ୟ ପ୍ରତିଯୋଗିତା ଯାତ୍ରାର ଅନ୍ତ ଘଟିଛି ।

ମଧ୍ୟପ୍ରଦେଶର ଉଜ୍ଜୈନର ବାସିନ୍ଦା ନିକିତା ପୋରୱାଲ ନିକଟରେ ‘ଫେମିନା ମିସ୍ ଇଣ୍ଡିଆ ୨୦୨୪’ ଖିତାବ ଜିତି ମିସ୍ ୱାର୍ଲ୍ଡ ପ୍ରତିଯୋଗିତା ପାଇଁ ଯୋଗ୍ୟତା ଅର୍ଜନ କରିଥିଲେ। ସାରା ବିଶ୍ୱରୁ ଆସିଥିବା ୧୧୧ ଜଣ ପ୍ରତିଯୋଗୀଙ୍କ ମଧ୍ୟରୁ ସେ ଟପ୍-୪୦ରେ ନିଜର ସ୍ଥାନ ସୁରକ୍ଷିତ କରି ଭାରତବାସୀଙ୍କ ମନରେ ନୂଆ ଆଶା ସୃଷ୍ଟି କରିଥିଲେ । ତେବେ ଗ୍ରାଣ୍ଡ୍ ଫିନାଲେରେ ସେ ଟପ୍-୨୦ ରାଉଣ୍ଡକୁ ଉନ୍ନୀତ ହୋଇପାରିନଥିଲେ, ଯାହା ଫଳରେ ସପ୍ତମ ଥର ପାଇଁ ମିସ୍ ୱାର୍ଲ୍ଡ ମୁକୁଟ ଜିତିବାର ଭାରତର ସ୍ୱପ୍ନ ଅଧୁରା ରହିଯାଇଛି ।

ଫିନାଲେ ମଞ୍ଚରେ ନିକିତାଙ୍କ ଉପସ୍ଥିତି ବେଶ୍ ଆକର୍ଷଣୀୟ ଥିଲା। ସେ ପ୍ରସିଦ୍ଧ ଡିଜାଇନର ଭାବନା ରାଓଙ୍କ ଦ୍ୱାରା ପ୍ରସ୍ତୁତ ଏକ ସ୍ୱତନ୍ତ୍ର ପୋଷାକ ପିନ୍ଧି ମଞ୍ଚରେ ଅବତୀର୍ଣ୍ଣ ହୋଇଥିଲେ। ଏଥିସହ ସେ ଆୟୋଜକ ଦେଶ ଭିଏତନାମକୁ ସମ୍ମାନ ଜଣାଇ ସେଠାକାର ପାରମ୍ପରିକ ପୋଷାକ ‘ଆଓ ଡାଇ’ ପିନ୍ଧି ସମସ୍ତଙ୍କ ହୃଦୟ ଜିଣିଥିଲେ। ‘ଡାନ୍ସେସ୍ ଅଫ୍ ଦ ୱାର୍ଲ୍ଡ’ କାର୍ଯ୍ୟକ୍ରମରେ ମାତା ମୀନାକ୍ଷୀଙ୍କୁ ଆଧାର କରି ଏକ ସୁନ୍ଦର ନୃତ୍ୟ ପରିବେଷଣ ମାଧ୍ୟମରେ ସେ ଭାରତୀୟ ସଂସ୍କୃତିର ଝଲକ ବିଶ୍ୱ ଦରବାରରେ ପ୍ରଦର୍ଶନ କରିଥିଲେ । ନିକିତା ନିଜର ‘ବିଉଟି ୱିଥ୍ ଏ ପର୍ପସ୍’ ପ୍ରକଳ୍ପ ‘ମାଟି’ ମାଧ୍ୟମରେ ଆଦିବାସୀ ମହିଳା ଏବଂ ଶିଶୁମାନଙ୍କ ଶିକ୍ଷା, ସ୍ୱାସ୍ଥ୍ୟ ତଥା ପରିମଳ ଦିଗରେ କରୁଥିବା ଉଲ୍ଲେଖନୀୟ କାର୍ଯ୍ୟ ପାଇଁ ଆନ୍ତର୍ଜାତିକ ସ୍ତରରେ ବେଶ୍ ପ୍ରଶଂସିତ ହୋଇଛନ୍ତି ।

ମିସ୍ ଇଣ୍ଡିଆ ସଙ୍ଗଠନ ପକ୍ଷରୁ ସୋସିଆଲ୍ ମିଡିଆରେ ଏକ ବାର୍ତ୍ତା ଜାରି କରି କୁହାଯାଇଛି ଯେ, ନିକିତା ବିଶ୍ୱର ସବୁଠାରୁ ବଡ଼ ମଞ୍ଚରେ ଅତ୍ୟନ୍ତ ନିଷ୍ଠା ଓ ଗାରିମାର ସହ ଭାରତର ପ୍ରତିନିଧିତ୍ୱ କରିଛନ୍ତି । ସେ ମିସ୍ ୱାର୍ଲ୍ଡ ମୁକୁଟ ଜିତି ପାରିନଥିଲେ ମଧ୍ୟ ଲଗାତାର ୮ମ ଥର ପାଇଁ କୌଣସି ଭାରତୀୟଙ୍କୁ ଟପ୍-୪୦ ତାଲିକାରେ ସ୍ଥାନ ଦେବାର ଧାରାକୁ ବଜାୟ ରଖିଛନ୍ତି, ଯାହା ଭାରତ ପାଇଁ ଏକ ଗର୍ବର ବିଷୟ।