ନୂଆଦିଲ୍ଲୀ: ହାର୍ଦ୍ଦିକ ପାଣ୍ଡ୍ୟା ଦୀର୍ଘ ଦିନ ହେବ ସଂପୂର୍ଣ୍ଣ ଫିଟ୍ ନଥିବା ବେଳେ ଏକଦିବସୀୟ କ୍ରିକେଟରେ ୧୦ ଓଭର ବୋଲିଂ କରିବାକୁ ପ୍ରସ୍ତୁତ ନାହାନ୍ତି । ଏହି ପରିସ୍ଥିତିରେ ୨୦୨୭ ୱାର୍ଲ୍ଡକପ୍କୁ ନଜରରେ ରଖି ଟିମ୍ ଇଣ୍ଡିଆର ହେଡ୍ କୋଚ୍ ଗୌତମ ଗମ୍ଭୀର ଯୁବ ଅଲରାଉଣ୍ଡର ନୀତିଶ କୁମାର ରେଡ୍ଡୀଙ୍କ ଉପରେ ବଡ଼ ଭରସା ପ୍ରକଟ କରିଛନ୍ତି । ଆଫଗାନିସ୍ତାନ ବିପକ୍ଷ ଟି୨୦ ସିରିଜ୍ ପରେ ଗମ୍ଭୀର ସ୍ପଷ୍ଟ କରିଛନ୍ତି ଯେ ହାର୍ଦ୍ଦିକ ଏବେ ୧୦ ଓଭର ବୋଲିଂ କରିବା ସ୍ଥିତିରେ ନାହାନ୍ତି । ସେ ସମ୍ପୂର୍ଣ୍ଣ ଫିଟ୍ ହେବା ପରେ ଭାରତୀୟ ଦଳକୁ ଫେରିବେ, କାରଣ ତାଙ୍କୁ ନେଇ ଦଳ କୌଣସି ରିସ୍କ ନେବାକୁ ଚାହୁଁନାହିଁ । ହାର୍ଦ୍ଦିକଙ୍କ ଅନୁପସ୍ଥିତିରେ ନୀତିଶ କୁମାର ରେଡ୍ଡୀଙ୍କୁ ସଫଳତାର ସହ ଆଗକୁ ବଢ଼ାଯାଉଛି ।
ଦକ୍ଷିଣ ଆଫ୍ରିକା ଭଳି ପରିସ୍ଥିତିରେ ପେସ୍-ବୋଲିଂ ଅଲରାଉଣ୍ଡରଙ୍କ ଭୂମିକା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହେବ, ଯେଉଁଥିପାଇଁ ନୀତିଶଙ୍କୁ ଅଧିକ ମ୍ୟାଚ୍ ଖେଳିବାର ସୁଯୋଗ ଦିଆଯାଉଛି । ଗମ୍ଭୀର ସଙ୍କେତ ଦେଇଛନ୍ତି ଯେ ହାର୍ଦ୍ଦିକ ଫେରିବା ପରେ ମଧ୍ୟ ଭବିଷ୍ୟତରେ ନୀତିଶ ଓ ହାର୍ଦ୍ଦିକ ଉଭୟଙ୍କୁ ଏକାସାଙ୍ଗରେ ଚୂଡ଼ାନ୍ତ ଏକାଦଶ ରେ ସ୍ଥାନ ମିଳିପାରେ । ଆଫଗାନିସ୍ତାନ ସିରିଜ୍ରେ ଲଗାତାର ମ୍ୟାଚ୍ଗୁଡ଼ିକରେ ୩ଟି ଲେଖାଏଁ ୱିକେଟ୍ ନେଇ ନିଜର ଲାଇନ୍-ଲେନ୍ଥ୍ ଓ ବୋଲିଂ ଦକ୍ଷତା ପ୍ରମାଣିତ କରିଛନ୍ତି । ସେ ଶୀର୍ଷ କ୍ରମରୁ ନେଇ ମଧ୍ୟକ୍ରମ ପର୍ୟ୍ୟନ୍ତ ବ୍ୟାଟିଂ କରିବା ସହ ବିସ୍ଫୋରକ ଶଟ୍ସ ଖେଳିବାରେ ସିଦ୍ଧହସ୍ତ । ଦଳ ପାଖରେ ଏବେ ହାର୍ଦ୍ଦିକଙ୍କ ବିକଳ୍ପ ଭାବେ ନୀତିଶ ପ୍ରସ୍ତୁତ ହେଉଥିବାରୁ ୨୦୨୭ ୱାର୍ଲ୍ଡକପ୍ ପୂର୍ବରୁ ଟିମ୍ ଇଣ୍ଡିଆ ପାଇଁ ଏହା ଏକ ବଡ଼ ସକାରାତ୍ମକ ଦିଗ ସାବ୍ୟସ୍ତ ହୋଇଛି ।
