Salman Khan: ଫ୍ୟାନ୍ସଙ୍କୁ ଚମକାଇଲେ ଭାଇଜାନ୍! ହାଫ୍ ପ୍ୟାଣ୍ଟ ପିନ୍ଧି YouTubeରେ ଏଣ୍ଟ୍ରି କଲେ ସଲମାନ ଖାନ୍, ଛାଡ଼ିଦେବେ କି ଅଭିନୟ?
ମୁମ୍ବାଇ: ବଲିଉଡ୍ର ଦବଙ୍ଗ ଖାନ୍ ସଲମାନଙ୍କ ନୂଆ ଅବତାର! ଏବେ କେବଳ ବଡ଼ ପରଦା କି ଟିଭି ନୁହେଁ, YouTubeରେ ମଧ୍ୟ ନିଜ ଜଲୱା ଦେଖାଇବେ ଭାଇଜାନ୍। ଅକ୍ଟୋବର ୯ ତାରିଖ ଶୁକ୍ରବାର ଦିନ ସଲମାନ ଖାନ୍ ନିଜର ଅଫିସିଆଲ୍ YouTube ଚ୍ୟାନେଲ୍ ଲଞ୍ଚ୍ କରିଛନ୍ତି। ତାଙ୍କର ଏହି ନୂଆ ପଦକ୍ଷେପ ଫ୍ୟାନ୍ସଙ୍କ ମଧ୍ୟରେ ଉତ୍ସାହ ବଢ଼ାଇଛି। ଚ୍ୟାନେଲ୍ ଆରମ୍ଭ ହେବାର ମାତ୍ର ଗୋଟିଏ ଘଣ୍ଟା ମଧ୍ୟରେ ୧୪ ହଜାରରୁ ଅଧିକ ସବ୍ସ୍କ୍ରାଇବର୍ ଯୋଡ଼ି ହୋଇଥିଲେ ।
ସଲମାନ ନିଜ ଇନ୍ଷ୍ଟାଗ୍ରାମ୍ ଷ୍ଟୋରିରେ ଏକ ଛୋଟ ଭିଡିଓ ସେୟାର୍ କରି ଚ୍ୟାନେଲ୍ ଲଞ୍ଚ୍ ବିଷୟରେ ଜଣାଇଥିଲେ। ଭିଡିଓରେ ସେ ଇଂରାଜୀ ବର୍ଣ୍ଣମାଳା ଉଚ୍ଚାରଣ କରିବା ପରେ ନିଜ ଚ୍ୟାନେଲ୍ର ଧାରଣା ବିଷୟରେ ସଙ୍କେତ ଦେଇଥିଲେ। ତାଙ୍କର ‘ଶୁରୁ ସେ ଶୁରୁ କରତେ ହୈଁ’ ଅର୍ଥାତ୍ ‘ଆରମ୍ଭରୁ ଆରମ୍ଭ କରିବା’ ମେସେଜ୍ ଏବେ ଚର୍ଚ୍ଚାରେ ରହିଛି। ତାଙ୍କ ଚ୍ୟାନେଲ୍ର ପରିଚୟ ବାୟୋରେ ଲେଖାଯାଇଛି, “ସେ ଜଣେ ଫିଲ୍ମ ଅଭିନେତା, କଳାକାର, ଚିତ୍ରକର ଏବଂ ମାନବସେବୀ”। ଏହା ତାଙ୍କର ଅଫିସିଆଲ୍ ଚ୍ୟାନେଲ୍।
ଚ୍ୟାନେଲ୍ ଆରମ୍ଭ ସମୟରେ ସେଥିରେ ୧୦ଟି ଛୋଟ ଭିଡିଓ ବା ‘ଶର୍ଟ୍ସ’ ଅପଲୋଡ୍ ହୋଇଥିଲା। ଏହି ଭିଡିଓଗୁଡ଼ିକ ଛୋଟ ଏବଂ ହାଲୁକା ଧରଣର। ତେବେ ଆଗକୁ କେଉଁ ପ୍ରକାରର ଭିଡିଓ ଆସିବ, ତାହାକୁ ଦେଖିବାକୁ ଫ୍ୟାନ୍ସ ଉତ୍ସାହିତ ରହିଛନ୍ତି । ଫ୍ୟାନ୍ସ ଆଶା କରୁଛନ୍ତି, ଚ୍ୟାନେଲ୍ରେ ସଲମାନଙ୍କ ବ୍ୟକ୍ତିଗତ ଅପଡେଟ୍, ଫିଲ୍ମ ସୁଟିଂ ସମୟର ଝଲକ, ପ୍ରମୋସନାଲ୍ ଭିଡିଓ ଏବଂ ପରଦା ପଛର କିଛି ମଜାଦାର ଦୃଶ୍ୟ ଦେଖିବାକୁ ମିଳିପାରେ।
YouTubeରେ ନିଜର ଚ୍ୟାନେଲ୍ ଖୋଲିବାରେ ସଲମାନ ପ୍ରଥମ ଅଭିନେତା ନୁହନ୍ତି। ଆଲିଆ ଭଟ୍ଟ, ସୋନାକ୍ଷୀ ସିହ୍ନା, ନୋରା ଫତେହି, ଜ୍ୟାକଲିନ୍ ଫର୍ଣ୍ଣାଣ୍ଡିଜ୍, ବରୁଣ ଧୱନ୍, ଶିଳ୍ପା ସେଟ୍ଟୀ, ଅର୍ଚ୍ଚନା ପୁରନ୍ ସିଂହ ଏବଂ ଫରାହ ଖାନ୍ଙ୍କ ଭଳି ତାରକାମାନେ ମଧ୍ୟ ଏହି ପ୍ଲାଟଫର୍ମରେ ସକ୍ରିୟ। ସେମାନେ ଭ୍ଲଗ୍, ଭ୍ରମଣ, ରୋଷେଇ, ଫିଟ୍ନେସ୍ ଏବଂ ନିଜ ଦୈନନ୍ଦିନ ଜୀବନର ଭିଡିଓ ସେୟାର୍ କରନ୍ତି। ଦକ୍ଷିଣ ଭାରତୀୟ ସିନେମାର ଆଲ୍ଲୁ ଅର୍ଜୁନ୍ ଓ ମୋହନଲାଲ୍ଙ୍କର ମଧ୍ୟ ଅଫିସିଆଲ୍ ଚ୍ୟାନେଲ୍ ରହିଛି।
କାମ କ୍ଷେତ୍ରରେ ମଧ୍ୟ ସଲମାନ ଏବେ ବ୍ୟସ୍ତ ଅଛନ୍ତି। ସେ ରିଆଲିଟି ଶୋ’ ‘ବିଗ୍ ବସ୍ ୨୦’ର ହୋଷ୍ଟ୍ ଭାବେ ନଜର ଆସୁଛନ୍ତି। ଏହା ଶୋ’ର ହୋଷ୍ଟ୍ ଭାବେ ତାଙ୍କର ୧୫ତମ ସିଜନ୍ ବୋଲି ରିପୋର୍ଟରେ ଉଲ୍ଲେଖ ରହିଛି। ଫିଲ୍ମ କଥା କହିଲେ, ସଲମାନ ଆଗକୁ ‘ମାତୃଭୂମି’ରେ ନଜର ଆସିବେ। ଏହି ଫିଲ୍ମର ନାଁ ପୂର୍ବରୁ ‘ବ୍ୟାଟଲ୍ ଅଫ୍ ଗଲୱାନ୍’ ଥିଲା। ଅପୂର୍ବ ଲାଖିଆଙ୍କ ନିର୍ଦ୍ଦେଶିତ ଏହି ଫିଲ୍ମରେ ଚିତ୍ରାଙ୍ଗଦା ସିଂହ ମଧ୍ୟ ଅଭିନୟ କରୁଛନ୍ତି। ଫିଲ୍ମର ନୂଆ ରିଲିଜ୍ ତାରିଖ ଏପର୍ଯ୍ୟନ୍ତ ଘୋଷଣା ହୋଇନାହିଁ। ଏହା ବ୍ୟତୀତ ନିର୍ଦ୍ଦେଶକ ବଂଶୀ ପୈଦିପଲ୍ଲୀଙ୍କ ପ୍ରୋଜେକ୍ଟ ‘SVC63’ରେ ମଧ୍ୟ ସଲମାନ କାମ କରୁଛନ୍ତି। ଏହି ଫିଲ୍ମରେ ନୟନତାରା ଅଭିନୟ କରୁଥିବାବେଳେ ଏହାର ନାଁ ‘ମନ୍ଷ୍ଟର୍’ ହୋଇପାରେ ବୋଲି ରିପୋର୍ଟରେ କୁହାଯାଇଛି। ଏହି ଫିଲ୍ମ ୨୦୨୭ ଇଦ୍ରେ ରିଲିଜ୍ ହେବାର ଯୋଜନା ରହିଛି।
ତେବେ ବର୍ତ୍ତମାନର ଡିଜିଟାଲ୍ ଯୁଗରେ କଣ୍ଟେଣ୍ଟ କ୍ରିଏସନ୍ର ଚାହିଦା ବଢ଼ୁଥିବା ବେଳେ ଦର୍ଶକଙ୍କ ପସନ୍ଦ ମଧ୍ୟ ବଦଳିବାରେ ଲାଗିଛି । ଫିଲ୍ମ ସହ ସୋସିଆଲ୍ ମିଡିଆରେ ନିଜ ପ୍ରିୟ କଳାକାରଙ୍କୁ ଅଧିକ ନିକଟରୁ ଜାଣିବାକୁ ଫ୍ୟାନ୍ସ ଚାହୁଁଛନ୍ତି । ଏଭଳି ସମୟରେ ଭାଇଜାନ୍ ସଲମାନ ଖାନ୍ଙ୍କ ୟୁଟ୍ୟୁବ୍ ଚ୍ୟାନେଲ୍ ଲଞ୍ଚ୍କୁ ନେଇ ଦର୍ଶକଙ୍କ ମଧ୍ୟରେ ବେଶ୍ ଉତ୍ସାହ ଦେଖିବାକୁ ମିଳୁଛି । ଏବେ ସମସ୍ତଙ୍କ ନଜର ତାଙ୍କ ଚ୍ୟାନେଲ୍ରେ ଆଗକୁ କେଉଁ ନୂଆ କଣ୍ଟେଣ୍ଟ ଦେଖିବାକୁ ମିଳିବ, ତାହା ଦେଖିବାକୁ ଫ୍ୟାନ୍ସ ଉତ୍ସୁକ।