ଯାଜପୁର/ଭଦ୍ରକ/ପୁରୀ: ତିନିଜଣ ବ୍ୟକ୍ତି କରୋନା ଭୂତାଣୁ ସଂକ୍ରମଣରେ ଆକ୍ରାନ୍ତ ହେବାପରେ ଓଡ଼ିଶାର ୩ଟି ଜିଲ୍ଲାର ଅତ୍ୟନ୍ତ ସମ୍ବେଦନଶୀଳ ଅଞ୍ଚଳଗୁଡ଼ିକୁ ସଟ୍ଡାଉନ୍ କରାଯାଇଛି ।
ଗଣମାଧ୍ୟମକୁ ସୂଚନାଦେଇ ଯାଜପୁର ଜିଲ୍ଲାପାଳ ରଞ୍ଜନ କୁମାର ଦାସ କହିଛନ୍ତି, ନିଜାମୁଦ୍ଦିନର ତବଲିଘି ଜମ୍ମାତରେ ଯୋଗଦେଇଥିବା ୨୮ ଜଣ ବ୍ୟକ୍ତିଙ୍କ ମଧ୍ୟରୁ ଓଡ଼ିଶାରେ ୩ ଜଣ ବ୍ୟକ୍ତି କରୋନା ପଜିଟିଭ୍ ଚିହ୍ନଟ ହୋଇଛନ୍ତି ।
“ସେମାନଙ୍କ ମଧ୍ୟରୁ ରସୁଲପୁର ବ୍ଲକର ବ୍ରହ୍ମବରଦା ଗ୍ରାମର ଜଣେ ବ୍ୟକ୍ତି ପଜିଟିଭ୍ ଚିହ୍ନଟ ହୋଇଛନ୍ତି । ଏହି ଗ୍ରାମ ସହିତ ଏହାର ୩ କିଲୋମିଟର ପରିମିତ ଅଞ୍ଚଳକୁ ଶୁକ୍ରବାର ରାତିରୁ ସମ୍ପୂର୍ଣ୍ଣ ରୂପେ ସଟ୍ଡାଉନ୍ କରାଯାଇଛି । ଏଠାରେ ମଧ୍ୟ ଏହି ସଟ୍ଡାଉନ୍ ରବିବାର ରାତି ୮ଟା ପର୍ଯ୍ୟନ୍ତ ବଳବତ୍ତର ରହିବ ।” ଏହା କହିଛନ୍ତି ଯାଜପୁର ଜିଲ୍ଲାପାଳ ।
ବ୍ରହ୍ମବରଦା ଗ୍ରାମରେ ଚିହ୍ନଟ ହୋଇଥିବା ଏହି କରୋନା ରୋଗୀଙ୍କୁ କଟକର ଅଶ୍ୱିନୀ ହସ୍ପିଟାଲରେ ଭର୍ତ୍ତି କରିବା ସହିତ ତାଙ୍କ ପରିବାର ଲୋକଙ୍କୁ କ୍ୱାରେନଣ୍ଟାଇନରେ ରଖିବାକୁ ଜିଲ୍ଲା ପ୍ରଶାସନ ନିଷ୍ପତ୍ତି ଗ୍ରହଣ କରିଥିବାର ଜିଲ୍ଲାପାଳ ସୂଚନା ଦେଇଛନ୍ତି ।
ସେ ଜନସାଧାରଣଙ୍କୁ ଅନୁରୋଧ କରିଛନ୍ତି ଯେ, ଯେଉଁ ବ୍ୟକ୍ତିମାନେ ଏହି ରୋଗୀଙ୍କ ସଂସ୍ପର୍ଶରେ ଆସିଛନ୍ତି ସେମାନେ ସ୍ୱତଃପ୍ରବୃତ୍ତ ଭାବେ ଜିଲ୍ଲା ପ୍ରଶାସନକୁ ଅବଗତ କରିବା ସହିତ ୧୪ ଦିନ ଲାଗି ହୋମ୍ କ୍ୱାରେଣ୍ଟାଇନରେ ରହିବା ଆବଶ୍ୟକ । ପ୍ରଶାସନ ପକ୍ଷରୁ ସମସ୍ତ ସ୍ୱାସ୍ଥ୍ୟ ସେବା ସେମାନଙ୍କୁ ଯୋଗାଇ ଦିଆଯିବ ।
ସେହିପରି ଭାବେ ପୁରୀରେ ଜିଲ୍ଲା ପ୍ରଶାସନ ପିପିଲି ବ୍ଳକର ଦାନଗୋହିରୀ ଗ୍ରାମକୁ ସମ୍ପୂର୍ଣ୍ଣ ଭାବେ ସିଲ୍ କରିଦେଇଛନ୍ତି ।
ପୁରୀ ଜିଲ୍ଲାପାଳ ବଲୱନ୍ତ ସିଂହ ସୂଚନା ପ୍ରଦାନ କରି କହିଛନ୍ତି ଯେ, ପିପିଲି ସିଭିକ୍ ବଡ଼ି ପକ୍ଷରୁ ସମ୍ପୂର୍ଣ୍ଣ ଗ୍ରାମକୁ ସାନିଟାଇଜ୍ କରାଯିବା ସହିତ ରବିବାର ରାତି ୮ଟା ପର୍ଯ୍ୟନ୍ତ ସଟ୍ଡାଉନ୍ ରହିବ ।
#OdishaFightsCorona #Shutdown #Bhadrak
District Administration has extended #Shutdown order to Erein Gram Panchayat of Bhadrak Block adjacent to Charampa area of Bhadrak Municipality till 8.00 pm of 5/4/20.— GYANA DAS (@gyana_r_das) April 4, 2020
ଭଦ୍ରକ ଜିଲ୍ଲାପାଳ ଜ୍ଞାନ ରଞ୍ଜନ ଦାସ ଟ୍ୱିଟ୍ ମାଧ୍ୟମରେ ଜଣାଇଛନ୍ତି ଯେ, ଭଦ୍ରକ ଚରମ୍ପା ନିକଟବର୍ତ୍ତୀ ଏରେଇଁ ପଞ୍ଚାୟତ ଯାହାକି ଭଦ୍ରକ ମ୍ୟୁନିସିପାଲିଟି ଅଞ୍ଚଳରେ ରହିଛି ସେହି ଅଞ୍ଚଳରେ ସଟ୍ଡାଉନ ରବିବାର ରାତି ୮ଟା ପର୍ଯ୍ୟନ୍ତ ଲାଗୁ କରାଯାଇଛି । ନିଜାମୁଦ୍ଦିନରୁ ଫେରିଥିବା ଏହି ପଞ୍ଚାୟତର ବ୍ୟକ୍ତି ଜଣକ କରୋନା ପଜିଟିଭ୍ ଜଣାପଡ଼ିବା ପରେ ଏହି ଅଞ୍ଚଳକୁ ସମ୍ପୂର୍ଣ୍ଣ ସିଲ୍ କରିଦିଆଯାଇଛି ।