ନୂଆଦିଲ୍ଲୀ: ସଂସଦର ଚଳିତ ଅଧିବେଶନରେ ଏକ ଐତିହାସିକ ନିଷ୍ପତ୍ତି ନେବାକୁ ଯାଉଛନ୍ତି କେନ୍ଦ୍ର ସରକାର । ଆସନ୍ତା ଲୋକସଭା ଓ ବିଧାନସଭା ନିର୍ବାଚନରେ ମହିଳାଙ୍କୁ ୩୩ ପ୍ରତିଶତ ସଂରକ୍ଷଣ ଦେବା ପାଇଁ ସରକାର ଏକ ବଡ଼ ସମ୍ବିଧାନ ସଂଶୋଧନ ବିଧେୟକ ଆଣିବାକୁ ପ୍ରସ୍ତୁତି କରୁଛନ୍ତି । ଏହି ବିଲ୍ ପାସ୍ ହେଲେ, ଭାରତୀୟ ଗଣତନ୍ତ୍ରରେ ମହିଳାଙ୍କ ଅଂଶଗ୍ରହଣ ଶିଖର ଛୁଇଁବ ।
ସରକାରଙ୍କ ଯୋଜନା ଅନୁସାରେ, ଆଗାମୀ ଲୋକସଭା ଓ ବିଧାନସଭା ନିର୍ବାଚନରେ ଏକ-ତୃତୀୟାଂଶ ଆସନ ମହିଳାଙ୍କ ପାଇଁ ସଂରକ୍ଷିତ ରହିବ । ଏଥିପାଇଁ ଲୋକସଭାର ଆସନ ସଂଖ୍ୟା ମଧ୍ୟ ବୃଦ୍ଧି କରାଯାଇପାରେ । ବର୍ତ୍ତମାନର ୫୪୩ ଆସନକୁ ବଢ଼ାଇ ୮୧୬ କରାଯିବାର ପ୍ରସ୍ତାବ ରହିଛି । ଏହାର ଅର୍ଥ ହେଉଛି, ସଂସଦରେ ୨୭୩ଟି ନୂଆ ଆସନ ଯୋଗ କରାଯିବ, ଯେଉଁଥିରୁ ଅଧିକାଂଶ ମହିଳାଙ୍କ ପାଇଁ ସଂରକ୍ଷିତ ରହିବ । ଏହି ବୃଦ୍ଧି ଯୋଗୁଁ ବର୍ତ୍ତମାନର ସାଂସଦଙ୍କ ଉପରେ କୌଣସି ସିଧାସଳଖ ପ୍ରଭାବ ପଡ଼ିବ ନାହିଁ ।
ଆସନ ସଂଖ୍ୟା ବଢ଼ିବା ସହ ଲୋକସଭାରେ ବହୁମତ ସଂଖ୍ୟା ମଧ୍ୟ ବୃଦ୍ଧି ପାଇବ । ନୂତନ ପ୍ରସ୍ତାବ ଅନୁସାରେ, ଏହି ସଂଖ୍ୟା ୪୦୯କୁ ବୃଦ୍ଧି ପାଇବ । ଏହା ଗତ କିଛି ଦଶନ୍ଧି ମଧ୍ୟରେ ସଂସଦର ଗଠନରେ ସବୁଠାରୁ ବଡ଼ ପରିବର୍ତ୍ତନ ହେବ । କେବଳ ସେତିକି ନୁହେଁ, ସବୁ ରାଜ୍ୟର ଆସନରେ ମଧ୍ୟ ପ୍ରାୟ ୫୦ ପ୍ରତିଶତ ବୃଦ୍ଧି ହେବାର ଯୋଜନା ରହିଛି । ଉଦାହରଣ ସ୍ୱରୂପ, ଉତ୍ତର ପ୍ରଦେଶର ଆସନ ୮୦ରୁ ୧୨୦, ବିହାରର ୪୦ରୁ ୬୦ ଏବଂ ଓଡ଼ିଶାର ୨୧ରୁ ପ୍ରାୟ ୩୧ କିମ୍ବା ୩୨କୁ ବୃଦ୍ଧି ପାଇପାରେ ।
ମହିଳା ସଂରକ୍ଷଣ ଲାଗୁ କରିବାରେ ପରିସୀମା ଏବଂ ଜନଗଣନା ଏକ ବଡ଼ ବାଧା ଭାବେ ଉଭା ହୋଇଥିଲା । କିନ୍ତୁ ଏବେ ସରକାର ୨୦୧୧ ଜନଗଣନା ଆଧାରରେ ପରିସୀମା ପ୍ରକ୍ରିୟାକୁ ତ୍ୱରାନ୍ୱିତ କରିବାକୁ ଚିନ୍ତା କରୁଛନ୍ତି । ଏହି ପ୍ରକ୍ରିୟା ଶେଷ ହେବା ପରେ, ୨୦୨୯ ପରେ ହେବାକୁ ଥିବା ନିର୍ବାଚନରେ ଏହି ସଂରକ୍ଷଣ ଲାଗୁ କରାଯାଇପାରିବ । ଏଥିସହ, ଅନୁସୂଚିତ ଜାତି ଏବଂ ଜନଜାତିଙ୍କ ପାଇଁ ସଂରକ୍ଷିତ ଆସନ ସଂଖ୍ୟା ମଧ୍ୟ ଆନୁପାତିକ ଭାବେ ବୃଦ୍ଧି କରାଯିବ, ଯାହାଦ୍ୱାରା ପ୍ରତିନିଧିତ୍ୱର ସନ୍ତୁଳନ ବଜାୟ ରହିବ ।
ଏହି ବିଧେୟକକୁ ପାସ୍ କରାଇବା ପାଇଁ ରାଜନୈତିକ କାର୍ଯ୍ୟକଳାପ ମଧ୍ୟ ଜୋରଦାର ଚାଲିଛି । ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହା ବିଭିନ୍ନ ଦଳର ନେତାଙ୍କ ସହ ଆଲୋଚନା କରି ସମର୍ଥନ ଜୁଟାଉଛନ୍ତି, କାରଣ ସମ୍ବିଧାନ ସଂଶୋଧନ ପାଇଁ ଦୁଇ-ତୃତୀୟାଂଶ ବହୁମତ ଆବଶ୍ୟକ । ଅନ୍ୟପଟେ, କିଛି ବିରୋଧୀ ଦଳ ମହିଳା ଆରକ୍ଷଣ ମଧ୍ୟରେ ଅନ୍ୟ ପଛୁଆ ବର୍ଗ, OBC ପାଇଁ ପୃଥକ କୋଟା ଦାବି କରୁଥିବାବେଳେ, କିଛି ଦଳ ଏହି ପ୍ରକ୍ରିୟାରୁ ଦୂରେଇ ରହିଛନ୍ତି । ଯଦି ଏହି ବିଧେୟକ ପାସ୍ ହୁଏ, ତେବେ ଏହା ଭାରତୀୟ ଗଣତନ୍ତ୍ରରେ ମହିଳାଙ୍କ ଭାଗିଦାରୀ ବଢ଼ାଇବାରେ ସହାୟକ ହେବ ।