ମଣିପୁରର ୧୨ ହଜାରରୁ ଉର୍ଦ୍ଧ୍ୱ ଲୋକଙ୍କୁ ଅଶ୍ରୟ ଦେଇଛି ମିଜୋରାମ, ଆର୍ଥିକ ସହାୟତା ପାଇଁ କେନ୍ଦ୍ର ଆଗରେ ଗୁହାରୀ

ଓଡ଼ିଶା ସମ୍ବାଦ ବ୍ୟୁରୋ: ହିଂସା ପ୍ରଭାବିତ ରାଜ୍ୟ ମଣିପୁରର ବିସ୍ଥାପିତ ଲୋକଙ୍କ ପାଇଁ ମିଜୋରାମ ସରକାର କେନ୍ଦ୍ର ସରକାରଙ୍କ ସହାୟତା ଦାବିକୁ ଦୋହରାଇଛନ୍ତି। ମିଜୋରାମ ସରକାର କହିଛନ୍ତି ଯେ ହିଂସା ଯୋଗୁଁ ମଣିପୁରର ୧୨ ହଜାରରୁ ଅଧିକ ଲୋକ ତାଙ୍କ ରାଜ୍ୟରେ ଥିବା ରିଲିଫ କ୍ୟାମ୍ପରେ ଆଶ୍ରୟ ନେଇଛନ୍ତି। ମେ ମାସରେ, ମିଜୋରାମ ମୁଖ୍ୟମନ୍ତ୍ରୀ ଜୋରାମଥାଙ୍ଗା ପ୍ରଧାନମନ୍ତ୍ରୀ ମୋଦୀଙ୍କୁ ଚିଠି ଲେଖି ଜାତି ହିଂସା କାରଣରୁ ବିସ୍ଥାପିତମାନଙ୍କୁ ସୁବିଧା ଯୋଗାଇବା ପାଇଁ ଅତି କମରେ ୧୦ କୋଟି ଟଙ୍କା ଆର୍ଥିକ ସହାୟତା ମାଗିଥିଲେ, କିନ୍ତୁ ପ୍ରାୟ ଦୁଇମାସ ପରେ ହେଲାଣି ମିଜୋରାମ ସରକାରଙ୍କ ହାତ ଖାଲି ରହିଛି।

ହିଂସା ପ୍ରଭାବିତ ରାଜ୍ୟ ମଣିପୁର ସହ ମିଜୋରାମ ପ୍ରାୟ ୯୫ କିଲୋମିଟର ସୀମା ସେୟାର କରିଛି। ମେ ୩ ରେ ହିଂସା ଆରମ୍ଭ ହେବା ପରଠାରୁ ୧୨,୦୦୦ ରୁ ଅଧିକ ବିସ୍ଥାପିତଙ୍କୁ ଆଶ୍ରୟ ଦେଇଛି ମିଜୋରାମ। ସେମାନଙ୍କ ମଧ୍ୟରୁ ଅଧିକାଂଶ ରିଲିଫ୍ କ୍ୟାମ୍ପରେ ଥିବାବେଳେ କିଛି ଲୋକ ନିଜ ସମ୍ପର୍କୀୟଙ୍କ ଘରେ ଅଛନ୍ତି। ମିଜୋରାମର ଗୃହ କମିଶନର ଲାଲେଙ୍ଗମାୱିଆ କହିଛନ୍ତି ଯେ ବର୍ତ୍ତମାନ ପର୍ଯ୍ୟନ୍ତ ଆମେ ସହାୟତା ପାଇଁ କେନ୍ଦ୍ର ସରକାରଙ୍କଠାରୁ କୌଣସି ଟଙ୍କା ପାଇନାହୁଁ। ଆମେ ଚର୍ଚ୍ଚ, ସାମାଜିକ ସଂଗଠନ ଏବଂ ବ୍ୟକ୍ତିବିଶେଷଙ୍କ ଅବଦାନ ମାଧ୍ୟମରେ ପ୍ରଭାବିତ ଲୋକଙ୍କୁ ସହାୟତା ପ୍ରଦାନ କରୁଛୁ।

ସେ ଆହୁରି କହିଛନ୍ତି, ଯଦି କେନ୍ଦ୍ର ସରକାର ତୁରନ୍ତ କୌଣସି ପଦକ୍ଷେପ ନ ନିଅନ୍ତି ତେବେ ପ୍ରାୟ ଦୁଇ ସପ୍ତାହ ପରେ ଲୋକମାନଙ୍କୁ ସାହାଯ୍ୟ କରିବା ପାଇଁ ଆମ ପାଖେ ଥିବା ସମ୍ବଳର ଅଭାବ ହୋଇଯିବ। ବହୁତ କମ୍ ବଜେଟ୍ ସତ୍ତ୍ୱେ ସେମାନେ ଲୋକମାନଙ୍କୁ ସୁବିଧା ଯୋଗାଇବା ପାଇଁ ଯଥାସମ୍ଭବ ଚେଷ୍ଟା କରୁଛନ୍ତି। ସେହିପରି ମିଜୋରାମ ବିଦ୍ୟାଳୟରେ ଅନେକ ଛାତ୍ରଛାତ୍ରୀଙ୍କୁ ଆଡମିଶନ ଦିଆଯାଇଛି। ସୂଚନା ଥାଉକି ଯେ ମଣିପୁରରେ ଏପର୍ଯ୍ୟନ୍ତ ଶାନ୍ତି ଫେରିନାହିଁ। ଅନେକ ଜିଲ୍ଲାରେ କର୍ଫ୍ୟୁ ଜାରି ରହିଥିବା ବେଳେ ଇଣ୍ଟରନେଟ୍ ଏବଂ ବିଦ୍ୟାଳୟ ସବୁ ବନ୍ଦ ରହିଛି।  ଏକ ରିପୋର୍ଟ ଅନୁଯାୟୀ, ୪୦୦୦ରୁ ଅଧିକ ବିସ୍ଥାପିତ ଲୋକ କେବଳ ଆଇଜୋଲ୍ ଜିଲ୍ଲାରେ ଆଶ୍ରୟ ନେଇଛନ୍ତି। ଏଥିପାଇଁ ୟଙ୍ଗ ମିଜୋ ଆସୋସିଏସନ୍ (YMA) ଦ୍ୱାରା ୧୨ ଟି ରିଲିଫ୍ କ୍ୟାମ୍ପ ଚାଲିଛି। କେନ୍ଦ୍ରୀୟ ୱାଇଏମଏ ର ସହକାରୀ ସଚିବ କହିଛନ୍ତି ଯେ ଅଧିକ ରିଲିଫ୍ କ୍ୟାମ୍ପ ଗଠନ ପାଇଁ ଏହି ସଂସ୍ଥା ରାଜ୍ୟ ସରକାରଙ୍କୁ ନିବେଦନ କରିଛି।

ମଣିପୁରରେ ହିଂସା ଆରମ୍ଭ ହେବା ପରେ ରାଜ୍ୟର ପ୍ରାୟ ୩୭୦୦୦ ଲୋକ ରିଲିଫ କ୍ୟାମ୍ପରେ ଆଶ୍ରୟ ନେଇଥିବାବେଳେ ହଜାର ହଜାର ଲୋକ ଅନ୍ୟ ରାଜ୍ୟକୁ ଯାଇ ଆଶ୍ରୟ ନେଇଛନ୍ତି। ରାଜ୍ୟର ନିକଟତର ଥିବାରୁ ଅଧିକାଂଶ ଲୋକ ମିଜୋରାମରେ ରହିଛନ୍ତି। ସୋମବାର ସନ୍ଧ୍ୟା ପର୍ଯ୍ୟନ୍ତ ମିଜୋରାମର ମଣିପୁରରୁ ବିସ୍ଥାପିତ ହୋଇଥିବା ଲୋକଙ୍କ ସଂଖ୍ୟା ୧୨,୧୬୨ ଥିଲା। ସେଥିମଧ୍ୟରୁ ୨,୯୩୭ ଲୋକ ୩୫ ଟି ରିଲିଫ କ୍ୟାମ୍ପରେ ରହିଛନ୍ତି ଏବଂ ବାକି ଲୋକେମାନେ ସେମାନଙ୍କ ବନ୍ଧୁ, ସମ୍ପର୍କୀୟ ଏବଂ ପରିବାର ସହିତ ରହିଛନ୍ତି।

ରାଜ୍ୟର ଶିକ୍ଷା ନିର୍ଦ୍ଦେଶକଙ୍କ ଅନୁଯାୟୀ, ବିସ୍ଥାପିତଙ୍କ ମଧ୍ୟରେ ୧୫୦୦ ରୁ ଅଧିକ ପିଲା ଅଛନ୍ତି। ଏଥିରେ ପ୍ରଥମରୁ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପିଲାମାନେ ଅନ୍ତର୍ଭୁକ୍ତ। ହିଂସା ହେତୁ ଏହି ପିଲାମାନଙ୍କର ଶିକ୍ଷା ନଷ୍ଟ ନହେବା ପାଇଁ ମିଜୋରାମ ସରକାର ନିଜର ବିଦ୍ୟାଳୟରେ ଆଡମିଶନ ଦେଇଛନ୍ତି। ମଣିପୁରରେ ଯଦି ଏପରି ହିଂସା ଜାରି ରହିଥାଏ ତେବେ ପିଲାଙ୍କ ସଂଖ୍ୟା ଆହୁରି ବୃଦ୍ଧି ପାଇବ ବୋଲି ଆଶା କରାଯାଉଛି। ଏହି ଲୋକମାନଙ୍କର କୌଣସି ଦଲିଲ ନାହିଁ, ତଥାପି ସେମାନଙ୍କର ପ୍ରତିକୂଳ ପରିସ୍ଥିତିକୁ ଦୃଷ୍ଟିରେ ରଖି ସେମାନଙ୍କୁ ବିଦ୍ୟାଳୟରେ ଆଡମିଶନ ଦିଆଯାଇଛି।