ପାଇଲଟଙ୍କୁ ଟେକ୍ ଅଫ୍ ସିଗନାଲ, ହେବେ କି ରାଜସ୍ଥାନ ମୁଖ୍ୟମନ୍ତ୍ରୀ?

ନୂଆଦିଲ୍ଲୀ: ରାଜଧାନୀରେ ରାଜସ୍ଥାନ ରାଜନୀତିର ତାତି। ଦିନ ତମାମ ରାଜସ୍ଥାନ ରାଜନୀତିକୁ ନେଇ କଂଗ୍ରେସରେ ଚାଲିଲା ଆଲୋଚନା। ପ୍ରଥମେ ଅଶୋକ ଗେହଲଟ ପରେ ତାଙ୍କ ଦଳୀୟ ପ୍ରତିଦ୍ବନ୍ଦୀ ସଚିନ ପାଇଲଟ ସୋନିଆ ଗାନ୍ଧୀଙ୍କୁ ଭେଟିଛନ୍ତି। ଏହି ଭେଟଘାଟ ଅଧ୍ୟକ୍ଷ ନିର୍ବାଚନ ପାଇଁ ପ୍ରାର୍ଥୀପତ୍ର ଦାଖଲ କରିବାର ଶେଷ ତାରିଖ ପୂର୍ବ ଦିନ ହୋଇଥିବାରୁ ସାରା ଦେଶର ନଜର ଏହି ଖବର ଉପରେ ଥିଲା। ଯଦିଓ ଗେହଲଟ ସୋନିଆଙ୍କୁ ଭେଟିବା ପରେ ନିଜ ଭୁଲ ପାଇଁ କ୍ଷମା ପ୍ରାର୍ଥନା କରିଥିବା ସୂଚନା ରହିଛି। ସେହିପରି ଅଧ୍ୟକ୍ଷ ନିର୍ବାଚନ ସେ ଲଢ଼ିବେ ନାହିଁ ବୋଲି କହିଛନ୍ତି। କିନ୍ତୁ ଏହାପରେ ସଚିନ ପାଇଲଟ ସୋନିଆଙ୍କୁ ଭେଟିବା ରାଜସ୍ଥାନ ରାଜନୀତିର ଅନେକ ସମୀକରଣକୁ ଜନ୍ମ ଦେଇପାରେ।

୧୦ ଜନପଥରେ ସଚିନ୍ ପାଇଲଟ ଏବଂ ସୋନିଆ ଗାନ୍ଧୀଙ୍କ ମଧ୍ୟରେ ଏକ ବୈଠକ ହୋଇଥିଲା। ସଚିନ ପାଇଲଟ କହିଛନ୍ତି ଯେ ସେ ହାଇକମାଣ୍ଡଙ୍କ ଆଗରେ ନିଜର ମତ ରଖିଛନ୍ତି। ଏଥିସହ ତାଙ୍କର ଫୋକସ ରାଜସ୍ଥାନ ଉପରେ ହିଁ ରହିବ। ସେ ଆହୁରି ପରିଶ୍ରମ କରି ୨୦୨୩ ନିର୍ବାଚନରେ  ଦଳକୁ ସଫଳତାର ଶୀର୍ଷରେ ପହଞ୍ଚିବାକୁ ଚେଷ୍ଟା କରିବେ ବୋଲି କହିଛନ୍ତି। ତେଣୁ ଅନୁମାନ କରାଯାଉଛି ଯେ ସଚିନ ପାଇଲଟ ଟେକ୍ ଅଫ୍ ପାଇଁ ସଙ୍କେତ ପାଇଛନ୍ତି। ଅର୍ଥାତ ଦଳରେ ପ୍ରମୁଖ ଭୂମିକା ତୁଲାଇବାକୁ ସୋନିଆଙ୍କ ଠାରୁ କୌଣସି ସକରାତ୍ମକ ଇସାରା ପାଇଛନ୍ତି।

ସଚିନ ପାଇଲଟ ଏବଂ ସୋନିଆ ଗାନ୍ଧୀଙ୍କ ମଧ୍ୟରେ ପ୍ରାୟ ଘଣ୍ଟାଏ ଧରି ଆଲୋଚନା ହୋଇଥିଲା। ଏହାପରେ ସଚିନ ପାଇଲଟ ମିଡିଆକୁ ପ୍ରତିକ୍ରିୟା ଦେଇଥିଲେ। ଯଦିଓ ସେ ସ୍ପଷ୍ଟ ଭାବରେ କିଛି କହି ନାହାନ୍ତି, କିନ୍ତୁ ରାଜସ୍ଥାନ ଉପରେ ଧ୍ୟାନ ଦେବା ପାଇଁ ଏକ ବଡ଼ ସଙ୍କେତ ଦେଇଛନ୍ତି ବୋଲି ସୂଚନା ରହିଛି।

ସଚିନ ପାଇଲଟ କହିଛନ୍ତି ଯେ ସେ ଆଜି କଂଗ୍ରେସ ସଭାପତିଙ୍କୁ ଭେଟିଛନ୍ତି। ସେ ନିରବ ରହି ମୋ କଥା ଶୁଣିଥିଲେ। ଜୟପୁରରେ କ’ଣ ହେଲା ଆମେ ବିସ୍ତୃତ ଭାବରେ ଆଲୋଚନା କରିଥିଲେ। ନିଜର ସମସ୍ତ କଥା ତାଙ୍କ ନିକଟରେ କହିବା ସହିତ ନିଜର ମତାମତ ରଖିଛନ୍ତି।

ସଚିନ ପାଇଲଟ କହିଛନ୍ତି ଯେ ସୋନିଆ ଗାନ୍ଧୀ ରାଜସ୍ଥାନ ପ୍ରସଙ୍ଗରେ ସମ୍ପୂର୍ଣ୍ଣ ନିଷ୍ପତ୍ତି ନେବେ। ଆସନ୍ତା ୧୨-୧୩ ମାସ ମଧ୍ୟରେ ଆମର କଠିନ ପରିଶ୍ରମକୁ ଆଧାର କରି ଆମେ ପୁଣି ଥରେ ରାଜସ୍ଥାନରେ କଂଗ୍ରେସ ସରକାର ଗଠନ କରିବା। ସଚିନ ପାଇଲଟ କହିଛନ୍ତି ଯେ ଏବେ ଆମର ଫୋକସ ୨୦୨୩ ନିର୍ବାଚନରେ ଦଳ କିପରି ​​ଜିତିବ।

ଏହାପୂର୍ବରୁ ରାଜସ୍ଥାନ ମୁଖ୍ୟମନ୍ତ୍ରୀ ଅଶୋକ ଗେହଲଟ ସୋନିଆ ଗାନ୍ଧୀଙ୍କୁ ଭେଟିଥିଲେ। ତେବେ ବୈଠକ ପରେ ଅଶୋକ ଗେହଲଟ ଯାହା କହିଛନ୍ତି ଏଥିରୁ ସ୍ପଷ୍ଟ ହୋଇଛି ଯେ ତାଙ୍କ ପଦ ଯିବାର ସମ୍ଭାବନା ଅଧିକ। କଂଗ୍ରେସ ସଭାପତି ପଦ ଦୌଡରୁ ଓହରିଯିବା ପାଇଁ ଗେହଲଟ୍ ନିଜେ ଘୋଷଣା କରିଛନ୍ତି।

ଅନ୍ୟପଟେ ଦଳର ସାଧାରଣ ସମ୍ପାଦକ କେ.ସି ଭେନୁଗୋପାଲଙ୍କ ସକାଳେ କହିଥିଲେ ସୋନିଆ ଗାନ୍ଧୀ ଆସନ୍ତା ୪୮ ଘଣ୍ଟା ମଧ୍ୟରେ ରାଜସ୍ଥାନର ମୁଖ୍ୟମନ୍ତ୍ରୀ କିଏ ହେବେ ତା ଉପରେ ନିଷ୍ପତ୍ତି ନେବେ।

ସୂଚନାଯୋଗ୍ୟ, ସଚିନ ପାଇଲଟ ମୁଖ୍ୟମନ୍ତ୍ରୀ ହୁଅନ୍ତୁ ବୋଲି ଗାନ୍ଧୀ ପରିବାରର ସମର୍ଥନ ରହିଥିବା ବେଳେ ଅଶୋକ ଗେହଲଟ ଏବଂ ତାଙ୍କ ଗୋଷ୍ଠୀ ପାଇଲଟଙ୍କୁ ବିରୋଧ କରୁଛନ୍ତି।