ଚାଉଳ, ଡାଲି, ଅଟା ପରେ ଏବେ ଶାସ୍ତା ମସୁର ଡାଲି ବିକ୍ରି କରିବେ କେନ୍ଦ୍ର ସରକାର, ବଜାରକୁ ଆସିବ ଭାରତ ମସୁର ଡାଲି

ନୂଆଦିଲ୍ଲୀ: ଦରଦାମ ବୃଦ୍ଧି ଭିତରେ ଚଳିତ ବର୍ଷ ଡାଲି ଦର ମଧ୍ୟ ରେକର୍ଡ ସୃଷ୍ଟି କରିଛି । ପ୍ରଥମେ ବୁଟ ଡାଲି, ଅଟା ଏବଂ ଚାଉଳ ପରେ ବର୍ତ୍ତମାନ ସରକାର ଶସ୍ତା ଦରରେ ବଜାରରେ ‘ଭାରତ ମସୁର ଡାଲି’ ଲଞ୍ଚ କରିବାକୁ ଯୋଜନା କରିଛନ୍ତି । ନିର୍ବାଚନ ବର୍ଷରେ ସରକାର ଏହି ଉପହାର ଦେବାର ଉଦ୍ଦେଶ୍ୟ ହେଉଛି ସାଧାରଣ ଲୋକଙ୍କୁ କମ୍ ମୂଲ୍ୟରେ ପୁଷ୍ଟିକର ଖାଦ୍ୟ ଯୋଗାଇବା ।

ଭାରତ ଅଟା, ଭାରତ ଚାଉଳ ଏବଂ ଭାରତ ଡାଲି ପରେ ସରକାର ଭାରତ ମସୁର ଡାଲି ବିକ୍ରୟ ପାଇଁ ସମ୍ପୂର୍ଣ୍ଣ ପ୍ରସ୍ତୁତି ଆରମ୍ଭ କରିଛନ୍ତି । ସରକାରଙ୍କ ଏହି ଯୋଜନା ସହ ଜଡିତ ଜଣେ ଅଧିକାରୀ କହିଛନ୍ତି ଯେ, ପ୍ରଥମ ପର୍ଯ୍ୟାୟରେ ୨୫,୦୦୦ ଟନ୍ ଡାଲି NAFED ଏବଂ NCCF ଦ୍ୱାରା ପ୍ରକ୍ରିୟାକରଣ ଏବଂ ପ୍ୟାକିଙ୍ଗ କରାଯିବ | ଏହା ପରେ ଡାଲିଗୁଡିକ କେନ୍ଦ୍ରୀୟ ଷ୍ଟୋର ମାଧ୍ୟମରେ ସାରା ଦେଶରେ ବଣ୍ଟନ କରାଯିବ | ବୁଟ ଡାଲି ପରି ଭାରତ ମସୁର ଡାଲି ମଧ୍ୟ ଗ୍ରାହକଙ୍କ ପାଇଁ ଏକ କେଜି ପ୍ୟାକେଟରେ ଉପଲବ୍ଧ ହେବ | ବର୍ତ୍ତମାନ ବଜାରରେ ଏକ କିଲୋଗ୍ରାମ ବ୍ରାଣ୍ଡେଡ୍ ମସୁର ଡାଲିର ମୂଲ୍ୟ ୧୨୫ ଟଙ୍କା | ଅନ୍ୟପକ୍ଷରେ, ଭାରତର ମସୁର ଡାଲିର ହାରାହାରି ଖୁଚୁରା ମୂଲ୍ୟ କିଲୋଗ୍ରାମ ପିଛା ପ୍ରାୟ ୯୩.୫ ଟଙ୍କା ରହିଛି। କିନ୍ତୁ ଭାରତ ସରକାର କିଲୋଗ୍ରାମ ପିଛା 8୯ ଟଙ୍କା ମୂଲ୍ୟରେ ମସୁର ଡାଲି ବିକ୍ରି କରିବେ।

ଜୁଲାଇ ୨୦୨୩ରେ ଡାଲିର ମୂଲ୍ୟ ଆକାଶଛୁଆଁ ହୋଇଯାଇଥିଲା | ଏହା ପରେ ମୋଦୀ ସରକାର ଜୁଲାଇ ୧୭,୨୦୨୩ରୁ ଭାରତ ବ୍ରାଣ୍ଡ ନାମରେ ବୁଟ ଡାଲି ବିକ୍ରି ଆରମ୍ଭ କରିଥିଲେ। ଖୁଚୁରା ବଜାରରେ ୧କେଜି ଡାଲିର ମୂଲ୍ୟ ୬୦ ଟଙ୍କା ହୋଇଥିବା ବେଳେ ଭାରତ ଡାଲି ୧କିଲୋକୁ ୫୫ ଟଙ୍କାରେ ବିକ୍ରି କରୁଛନ୍ତି । ଏହା ପରେ, ନଭେମ୍ବର ୨୦୨୩ ରେ, ‘ଭାରତ ଅଟା’ ନାମରେ ଶସ୍ତା ଅଟା ବଜାରକୁ ଅଣାଯାଇଥିଲା | ୧୦କିଲୋ ଭାରତ ଅଟାର ମୂଲ୍ୟ ୨୭୫ଟଙ୍କା । ଏହା ବ୍ୟତୀତ ସରକାର କିଲୋଗ୍ରାମ ପିଛା ୨୯ ଟଙ୍କା ମୂଲ୍ୟରେ ଚାଉଳ ମଧ୍ୟ ଦେଉଛନ୍ତି । NAFED ଏବଂ NCCF ମାଧ୍ୟମରେ ଭାରତ ମସୁର ଡାଲି ବିକ୍ରି ହେବ | ଏହି ଡାଲିର ବିକ୍ରୟ କେନ୍ଦ୍ରିୟ ଭଣ୍ଡାର ଏବଂ ଖୁଚୁରା ଦୋକାନରେ ମଧ୍ୟ କରାଯାଇପାରିବ । ଯେପରି ଭାରତ ଡାଲି ବର୍ତ୍ତମାନ ରିଲାଏନ୍ସ ଷ୍ଟୋର୍‌ ଏବଂ ଅନ୍ୟାନ୍ୟ ସ୍ଥାନରେ ଉପଲବ୍ଧ, ସେହିପରି ଭାରତ ମସୁର ଡାଲି ମଧ୍ୟ ସମାନ ଭାବରେ ବିକ୍ରି ହେବ ବୋଲି ଆଶା କରାଯାଉଛି।