ମୁମ୍ବାଇ: ପ୍ରତିଟି ଚଳଚ୍ଚିତ୍ରରେ ଭିନ୍ନଭିନ୍ନ ଭୂମିକାରେ ଅଭିନୟ କରିବାକୁ ପସନ୍ଦ କରୁଥିବା ଖିଲାଡି ବୟ ସୁପରଷ୍ଟାର ଅକ୍ଷୟ କୁମାରଙ୍କର ଆଗାମୀ ସିନେମାର ପୋଷ୍ଟର ରିଲିଜ ହୋଇଛି ।
ଅକ୍ଷୟ କୁମାର ସବୁବେଳେ ଭିନ୍ନ ଭିନ୍ନ ଚରିତ୍ର ଓ କାହାଣୀରେ କାମ କରୁଥିବା ଯୋଗୁଁ ବେଶ ଚର୍ଚ୍ଚାରେ ମଧ୍ୟ ରହନ୍ତି। ଅଭିନେତା ଅକ୍ଷୟ କୁମାରଙ୍କ ଆଗାମୀ ଫିଲ୍ମ ‘ହାଉସ୍ଫୁଲ୍-୪’ ଅକ୍ଟୋବର ମାସ ୨୬ ତାରିଖରେ ରିଲିଜ୍ ହେବାକୁ ଯାଉଛି। ତେବେ ଏହି ଫିଲ୍ମ ମୁକ୍ତିଲାଭ ଅପେକ୍ଷାରେ ଥିବା ବେଳେ ଆଉ ଏକ ଫିଲ୍ମ ନେଇ ଏବେ ଚର୍ଚ୍ଚାରେ ଅକ୍ଷୟ ।
ସିନେମାଟିର ନାମ ‘ଲକ୍ଷ୍ମୀ ବମ୍ବ’ ରଖାଯାଇଛି । ଫିଲ୍ମ ‘ଲକ୍ଷ୍ମୀ ବମ୍ବ’ରେ ଅକ୍ଷୟ ଜଣେ କିନ୍ନରଙ୍କ ରୂପରେ ନଜର ଆସିବେ। ଏହି ଫିଲ୍ମର ପ୍ରଥମ ଲୁକ୍ ର ପୋଷ୍ଟର ଏବେ ସାମ୍ନାକୁ ଆସିଛି । ଏହି ପୋଷ୍ଟରକୁ ଅକ୍ଷୟ ନିଜ ଟୁଇଟର ପେଜରେ ସେୟାର କରିଛନ୍ତି। ସେୟାର କରିଥିବା ଫଟୋରେ ଅକ୍ଷୟ ଲାଲ୍ ରଙ୍ଗର ଶାଢ଼ି ପିନ୍ଧି, ମୁଣ୍ଡରେ ସିନ୍ଦୁର ଲଗାଇ ମାଆ ଦୁର୍ଗାଙ୍କ ଆଗରେ ଠିଆ ହୋଇଥିବାର ଦେଖା ଯାଇଛି । ତେବେ ଫଟୋ ସେୟାର କରିବା ସହ ଅକ୍ଷୟ ଏଥିରେ ଟୁଇଟ କରିଛନ୍ତି ଯେ, ନବରାତ୍ରୀ ଭଳି ପବିତ୍ର ଦିନରେ ସେ ନିଜେ ଲକ୍ଷ୍ମୀମାଆଙ୍କ ରୂପରେ ନିଜର ଫଟୋ ସେୟାର କରୁଛନ୍ତି ।
ସେ ଏକ ଏମିତି ଚରିତ୍ରରେ ଅଭିନୟ କରିବେ ଯେଉଁଥିପାଇଁ ସେ ବେଶ ଉତ୍ସାହିତ ଅଛନ୍ତି। ଏହା ସହ ତାଙ୍କ ମନରେ ଟିକେ ଡ଼ର ମଧ୍ୟ ରହିଛି । ହେଲେ ଜୀବନରେ କିଛି ଅଲଗା କଲେ ତା’ର ମହତ୍ବ ବେଶ ମୁଲ୍ୟବାନ ହେବ ବୋଲି” ମଧ୍ୟ ଅକ୍ଷୟ ନିଜ ପେଜରେ ଲେଖିଛନ୍ତି ।
ତାଙ୍କର ଏହି ଲୁକ୍ ଏବେ ସୋସିଆଲ ମିଡିଆରେ ଭାଇରାଲ୍ ହେବାରେ ଲାଗିଛି |
ଦର୍ଶକ ତାଙ୍କର ଏହି ଲୁକ୍କୁ ବେଶ୍ ପସନ୍ଦ କରୁଥିବା ସହ ଅକ୍ଷୟଙ୍କ ଲୁକ୍କୁ ଦେଖି ଜଣାପଡ଼ୁଛି ଯେ ଫିଲ୍ମରେ ତାଙ୍କ ଅଭିନୟ ମଧ୍ୟ ଜବରଦସ୍ତ ହୋଇଥିବ ।
ସୂଚନାଯୋଗ୍ୟ, ଏହି ଚଳଚ୍ଚିତ୍ରଟି ତାମିଲ ଭୂତ କମେଡି ଫିଲ୍ମ ‘କଞ୍ଚନା’ର ରିମେକ୍ । ରାଘବ ଲୋରେନ୍ସଙ୍କ ନିର୍ଦ୍ଦେଶିତ ଏହି ଫିଲ୍ମଟି ଆସନ୍ତା ବର୍ଷ ଏପ୍ରିଲ ୫ରେ ପରଦା ଉପରକୁ ଆସିବ ।
ଫିଲ୍ମରେ ଅକ୍ଷୟ ଜଣେ କିନ୍ନର ଭୂତ ଭୂମିକାରେ ଅଭିନୟ କରୁଛନ୍ତି ।ଏଥିରେ କିୟାରା ଆଡଭାନୀଙ୍କୁ ମଧ୍ୟ ମୁଖ୍ୟ ଭୂମିକାରେ ଦେଖିବାକୁ ମିଳିବ ।
Comments are closed.