ନୋଏଡା: ଅନଲାଇନ୍ ସପିଂ ପ୍ଲାଟଫର୍ମ ଆମାଜନ ନାମରେ ଏକ ନୂଆ ପ୍ରକାରର ଠକେଇ ଚାଲୁଥିବା ଖବର ସାମ୍ନାକୁ ଆସିଛି । ଡେଲିଭରି ବଏମାନେ ଏପରି ଜିନିଷ ନେଇକି ଗ୍ରାହକଙ୍କ ଘରେ ପହଂଚିଯାଉଛନ୍ତି ଯାହା ଗ୍ରାହକ ଅର୍ଡର କରିନାହାଁନ୍ତି । ଯେତେବେଳେ ଏହି ଡେଲିଭରି ବଏମାନେ ଲୋକଙ୍କ ଘରେ ପହଞ୍ଚୁଛନ୍ତି, ସେମାନେ କହୁଛନ୍ତି ଯେ, ଅନ୍ୟ କେହି ଆପଣଙ୍କ ପାଇଁ କିଛି ଅର୍ଡର କରିଛନ୍ତି କିନ୍ତୁ ଆପଣଙ୍କୁ ଟଙ୍କା ଦେବାକୁ ପଡିବ କାରଣ ଏହା କ୍ୟାସ ଅନ ଡେଲିଭରି ଅର୍ଡର ଅଟେ ।
ଏପରି ପରିସ୍ଥିତିରେ, ଯଦି ଘରେ ଉପସ୍ଥିତ ଥିବା ଲୋକମାନେ ସଚେତନ ନୁହଁନ୍ତି, ତେବେ ସେମାନେ ଦେୟ ପ୍ରଦାନ କରନ୍ତି ଯେ ଜଣେ ପରିଚିତ ସେମାନଙ୍କ ପାଇଁ ଅର୍ଡର କରିଥିବେ । କିନ୍ତୁ ଯେତେବେଳେ ଏହି ପାର୍ସଲ୍ ଖୋଲାଯାଉଛି, ଏହା ଭିତରେ ବହୁତ ଶସ୍ତା ଜିନିଷ ମିଳୁଛି, ହେଲେ ଗ୍ରାହକମାନେ ଏଥିପାଇଁ ଅଧିକ ଅର୍ଥ ଦେଉଛନ୍ତି ।
ଏପରି ସଦ୍ୟତମ ମାମଲା ନୋଏଡା ସେକ୍ଟର ୮୨ରେ ଅବସ୍ଥିତ ଉଦ୍ୟୋଗ ବିହାର (ଏଲଆଇଜି) ସୋସାଇଟିରରୁ ସାମ୍ନାକୁ ଆସିଛି । ଏକ ଡେଲିଭରି ବଏ ୩୦ ସେପ୍ଟେମ୍ବରରେ ଅପରାହ୍ନ ପ୍ରାୟ ୩ଟା ୧୦ ରେ ଏଠାରେ ଏକ ଫ୍ଲାଟରେ ପହଞ୍ଚିଥିଲା । ଏହି ବ୍ୟକ୍ତି ଫ୍ଲାଟରେ ଉପସ୍ଥିତ ମହିଳାଙ୍କୁ କହିଥିଲେ ଯେ ଆପଣଙ୍କ ପାର୍ସଲ ଆମାଜନରୁ ଆସିଛି । ଫ୍ଲାଟରେ ରହୁଥିବା ବ୍ୟକ୍ତିଙ୍କ ନାମ ଏବଂ ଠିକଣା ଏହି ପାର୍ସଲରେ ସଠିକ୍ ଭାବରେ ଲେଖାଯାଇଥିଲା । କିନ୍ତୁ ପାର୍ସଲରେ ପଠାଇଥିବା ବ୍ୟକ୍ତିଙ୍କ ନାମ ବ୍ୟତୀତ ଅନ୍ୟ କୌଣସି ସୂଚନା ନାହିଁ । ଡେଲିଭରି ବଏ କହିଛନ୍ତି ଯେ, ଏହି ପାର୍ସଲ୍ ଡେଲିଭରିରେ କ୍ୟାସ ଦେବାକୁ ପଡିବ, ତେଣୁ ଆପଣଙ୍କୁ ହିଁ ଏହାର ମୂଲ୍ୟ ଦେବାକୁ ପଡିବ ।
ଫ୍ଲାଟରେ ଥିବା ମହିଳା ଭାବିଲେ ଯେ ପରିବାର ସଦସ୍ୟ ହୁଏତ କିଛି ଅର୍ଡର କରିଥିବେ । ତେଣୁ, ଏହି ମହିଳା ଜଣକ ଡେଲିଭରି ବଏଙ୍କଠାରୁ ପାର୍ସଲ ନେଇ ଟଙ୍କା ଦେଇଥିଲେ । ସଂଧ୍ୟାରେ ତାଙ୍କ ସ୍ବାମୀ ଆସିବା ପରେ ଜାଣିବାକୁ ପାଇଲେ ଯେ, ଏମିତି ନାମରେ କୌଣସି ସମ୍ପର୍କୀୟ ନାହାନ୍ତି । ଆଉ ଯେତେବେଳେ ପାର୍ସଲ୍ ଖୋଲାଗଲା, ଏଥିରେ ପ୍ରାୟ ୫୦ ରୁ ୧୦୦ ଟଙ୍କା ମୂଲ୍ୟର ଜିନିଷ ରହିଥିଲାବେଳେ ପ୍ରକୃତ ମୂଲ୍ୟ ୬୯୯ ଟଙ୍କା ଦେଇଥିଲେ ମହିଳା ଜଣକ ।
ଏହାପରେ ଅକ୍ଟୋବର ୧ ତାରିଖ ଦିନ ପୁଣି ସମାନ ଘଟମା ଘଟିଥିଲା । ଡେଲିଭରି ବଏ ଜଣକ ଆଉ ଥରେ ଏକ ପାର୍ସଲ ନେଇ ଆସିଥିଲେ ହେଲେ ସେ ଏଥର ଉକ୍ତ ପରିବାର ହାତରେ ଧରାପଡିଯାଇଥିଲେ ।
ଏନେଇ ପରିବାର ପକ୍ଷରୁ ଆମାଜନ କଷ୍ଟ୍ୟୁମର କେୟାର ସହ କଥାହେବାରୁ କମ୍ପାନୀ ପକ୍ଷରୁ ଏକ ମାମଲା ରୁଜୁ ହୋଇଛି ।