Trump’s Islamabad tilt:’ଆମେରିକାର ପ୍ରକୃତ ହିତ ଭାରତ ସହ ରହିଛି,ଟ୍ରମ୍ପ ଏକ ବଡ଼ ଭୁଲ କରୁଛନ୍ତି’; ପୂର୍ବତନ ଆମେରିକୀୟ ମନ୍ତ୍ରୀଙ୍କ ଚେତାବନୀ
ନୂଆଦିଲ୍ଲୀ: ପୂର୍ବତନ ଆମେରିକାର ଉପ-ବିଦେଶ ସଚିବ କର୍ଟ ଏମ୍. କ୍ୟାମ୍ପବେଲ(Kurt M Campbell ) କହିଛନ୍ତି ଯେ, ଆମେରିକାର ସମସ୍ତ ରଣନୈତିକ ସ୍ୱାର୍ଥ ପାକିସ୍ତାନ ସହିତ ନୁହେଁ, ଭାରତ ସହିତ। ସେ ଆମେରିକା-ଭାରତ ସମ୍ପର୍କର ବର୍ତ୍ତମାନର ସ୍ଥିତି ଉପରେ ମଧ୍ୟ ଚିନ୍ତା ପ୍ରକାଶ କରିଥିଲେ ।
ହଡସନ୍ ଇନଷ୍ଟିଚ୍ୟୁଟରେ ଭାଷଣ ଦେଇ କ୍ୟାମ୍ପବେଲ୍ କହିଥିଲେ, “ଆମକୁ ଏ ବିଷୟରେ ସମ୍ପୂର୍ଣ୍ଣ ସ୍ପଷ୍ଟତା ଆବଶ୍ୟକ। ଆମେରିକାର ଭବିଷ୍ୟତ ଭାରତ ସହିତ ଅଛି ଏବଂ ପାକିସ୍ତାନ ଏହାର ନିକଟତର ମଧ୍ୟ ନୁହେଁ। ଯଦି ଏହା କାହାକୁ ଆଘାତ ଦେଇଛି ତେବେ ମୁଁ କ୍ଷମା ପ୍ରାର୍ଥନା କରୁଛି… ଏହା କିଛିଟା ହତାଶାଜନକ ଯେ ଆମକୁ ପାରସ୍ପରିକ ସମ୍ମାନ ବିଷୟରେ ମନେ ପକାଇବାକୁ ପଡିବ। ମୁଁ କେବେ କଳ୍ପନା କରିନଥିଲି ଯେ ଆମେରିକା-ଭାରତ ସମ୍ପର୍କ କେବେ ଏପରି ସ୍ଥିତିରେ ପହଞ୍ଚିବ । ”
ମଞ୍ଚରେ ଉପସ୍ଥିତ ବିଜେପି ନେତା ରାମ ମାଧବ ଆହୁରି କହିଥିଲେ, “ଯେତେବେଳେ ଭାରତ ରଣନୈତିକ ସ୍ୱାୟତ୍ତତା ଗ୍ରହଣ କରିଥିଲା, ସେତେବେଳେ ଆମକୁ ଉପହାସ କରାଯାଇଥିଲା ଏବଂ ପ୍ରତ୍ୟାଖ୍ୟାନ କରାଯାଇଥିଲା। କିନ୍ତୁ ଏବେ ଦେଖନ୍ତୁ ଆଜି ଆମେରିକା କ’ଣ କରୁଛି।”
କ୍ୟାମ୍ପବେଲ କହିଥିଲେ ଯେ ଭାରତ ହେଉଛି କ୍ୱାଡ୍ ଗ୍ରୁପ୍ ପଛରେ ମୁଖ୍ୟ ଶକ୍ତି ଏବଂ ଏହି ଚାରି ଦେଶ ମଧ୍ୟରେ ସହଭାଗୀତା ଗଠନରେ ଭାରତର ଗୁରୁତ୍ୱପୂର୍ଣ୍ଣ ଭୂମିକା ଉପରେ ଗୁରୁତ୍ୱାରୋପ କରିଥିଲେ।
ସୂଚନାଥାଉକି, ଏପ୍ରିଲ ୨୦୨୫ରେ ପହଲଗାମ ଆକ୍ରମଣର ଜବାବରେ ଭାରତର ସାମରିକ ଅଭିଯାନ ‘ଅପରେସନ ସିନ୍ଦୁର’ ପରେ ଡୋନାଲ୍ଡ ଟ୍ରମ୍ପ ପ୍ରଶାସନ ସହିତ ଭାରତର ସମ୍ପର୍କ ପରିବର୍ତ୍ତନ ହେବା ଆରମ୍ଭ କରିଥିଲା। ଭାରତ-ଆମେରିକା ବିବାଦରେ ଡୋନାଲ୍ଡ ଟ୍ରମ୍ପ ଅସ୍ତ୍ରବିରତିର ଶ୍ରେୟ ନେବାକୁ ଚେଷ୍ଟା କରିଥିଲେ, ଯାହାକୁ ଭାରତ ପ୍ରତ୍ୟାଖ୍ୟାନ କରିଥିଲା । ଏପଟେ ପାକିସ୍ତାନ ତାଙ୍କୁ ନୋବେଲ ପୁରସ୍କାର ପାଇଁ ମନୋନୀତ କରିଥିଲା।