ତିରୁମାଲା ମନ୍ଦିରକୁ ନୋ-ଫ୍ଲାଏ ଜୋନ୍ ଘୋଷଣା କରିବାକୁ ଦାବି

ତିରୁପତି: ଆନ୍ଧ୍ରପ୍ରଦେଶର ପ୍ରସିଦ୍ଧ ତିରୁମାଲା ମନ୍ଦିରକୁ ନୋ-ଫ୍ଲାଏ ଜୋନ୍ ଘୋଷଣା କରିବାକୁ ଦାବି ହୋଇଛି । ତିରୁମାଲା ତିରୁପତି ଦେବସ୍ଥାନମ୍ (ଟିଟିଡି) ଅଧ୍ୟକ୍ଷ ବି.ଆର. ନାଇଡୁ ଶନିବାର କେନ୍ଦ୍ର ବିମାନ ଚଳାଚଳ ମନ୍ତ୍ରୀ ରାମ ମୋହନ ନାଇଡୁଙ୍କୁ ଏହି ସମ୍ପର୍କରେ ଏକ ଚିଠି ଲେଖିଛନ୍ତି । ଏଥିରେ, ଆଗମ ଶାସ୍ତ୍ର ନିୟମ ଅନୁଯାୟୀ ତିରୁମାଲା ମନ୍ଦିର ଉପରେ ନୋ-ଫ୍ଲାଏ ଜୋନ୍ ଘୋଷଣା କରିବାକୁ ଅନୁରୋଧ କରାଯାଇଛି ।

ଟିଟିଡି ଚିଠିରେ କୁହାଯାଇଛି ଯେ, ମନ୍ଦିର ଆଖପାଖରେ ବିମାନଚଳାଚଳ ଆଧ୍ୟାତ୍ମିକ ପରିବେଶ ଉପରେ ପ୍ରତିକୂଳ ପ୍ରଭାବ ପକାଏ । ଏହି ଅଞ୍ଚଳରେ ବିମାନ ଯାତାୟାତ ବୃଦ୍ଧି ପାଇବା ସହିତ ଏପରି ଚିନ୍ତା କରାଯାଉଛି ଯେ କମ୍ ଉଡ଼ୁଥିବା ବିମାନ, ବିଶେଷକରି ହେଲିକପ୍ଟର, ମନ୍ଦିର ଚାରିପାଖର ଶାନ୍ତ ପରିବେଶ ଏବଂ ଏହାର ପବିତ୍ର ରୀତିନୀତିକୁ ବାଧା ଦେଇପାରେ ।

ତେଣୁ ଏହି କାର୍ଯ୍ୟ ପବିତ୍ର ଐତିହ୍ୟକୁ ସଂରକ୍ଷଣ କରିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ହେବ । ତିରୁମାଲା ମନ୍ଦିର ଭାରତର ସବୁଠାରୁ ପୂଜ୍ୟ ଧାର୍ମିକ ସ୍ଥଳ ମଧ୍ୟରୁ ଗୋଟିଏ । ମନ୍ଦିରଟି ଟିଟିଡି ସଂସ୍ଥା ଦ୍ୱାରା ପରିଚାଳିତ ହୁଏ ଯାହାର ମୁଖ୍ୟ ଆନ୍ଧ୍ର ପ୍ରଦେଶ ସରକାର ଦ୍ୱାରା ନିଯୁକ୍ତ ହୁଅନ୍ତି ।