ହେଲିକପ୍ଟର ଆଗରେ ପ୍ରେମ ନିବେଦନ କରି ଅଡୁଆରେ ସେନା ଅଧିକାରୀ: ପ୍ରୋଟୋକଲ୍ ଉଲ୍ଲଂଘନ ନେଇ ମଗାଗଲା ସ୍ପଷ୍ଟୀକରଣ

ମୁମ୍ବାଇ: ମହାରାଷ୍ଟ୍ରର ନାସିକ୍ ଠାରେ ଥିବା କମ୍ବାଟ୍ ଆର୍ମି ଆଭିଏସନ୍ ଟ୍ରେନିଂ ସ୍କୁଲ (CAATS) ରେ ଏକ ଦୀକ୍ଷାନ୍ତ ସମାରୋହ (ପାସିଂ ଆଉଟ୍ ପରେଡ୍) ପରେ ଜଣେ ଯୁବ ସେନା ଅଧିକାରୀ ହେଲିକପ୍ଟର ଆଗରେ ନିଜ ପ୍ରେମିକାଙ୍କୁ ବିବାହ ପ୍ରସ୍ତାବ ଦେବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଛି। ଏହି ଭିଡିଓ ସୋସିଆଲ ମିଡିଆରେ ଭାଇରାଲ ହେବା ପରେ, ସାମରିକ ନିୟମ ଏବଂ ପ୍ରୋଟୋକଲ୍ ଉଲ୍ଲଂଘନ କରିଥିବା ଦର୍ଶାଇ ତାଙ୍କୁ ବରିଷ୍ଠ ଅଧିକାରୀମାନେ ସ୍ପଷ୍ଟୀକରଣ ମାଗିଛନ୍ତି।

କ୍ୟାପଟେନ୍ ଭାରତ ଭାରଦ୍ୱାଜ ନିକଟରେ ଜଣେ ଆର୍ମି ଆଭିଏସନ୍ ପାଇଲଟ୍ ଭାବରେ ତାଙ୍କର ତାଲିମ ଶେଷ କରିଛନ୍ତି। ସମାରୋହ ଶେଷ ହେବା ପରେ, ସେ ତାଙ୍କର ଭାବୀ ପତ୍ନୀ ଆରୁଷିଙ୍କୁ ସେଠାରେ ଥିବା ଏକ ହେଲିକପ୍ଟର ପାଖକୁ ନେଇଯାଇଥିଲେ। ସେଠାରେ ସେ ଆଣ୍ଠେଇ ପଡି ଆରୁଷିଙ୍କୁ ଏକ ମୁଦି ପିନ୍ଧାଇ ବିବାହ ପ୍ରସ୍ତାବ ଦେଇଥିଲେ। ପରିବାରବର୍ଗ, ସାଥୀ ଅଧିକାରୀ ଏବଂ ଅତିଥିମାନଙ୍କ ଉପସ୍ଥିତିରେ ଆରୁଷି ଏହି ପ୍ରସ୍ତାବକୁ ଗ୍ରହଣ କରିଥିଲେ ଏବଂ ଉପସ୍ଥିତ ଲୋକେ ତାଳି ମାରି ସେମାନଙ୍କୁ ଶୁଭେଚ୍ଛା ଜଣାଇଥିଲେ। ସୋସିଆଲ ମିଡିଆରେ ଅନେକ ଲୋକ ଏହି ହୃଦୟସ୍ପର୍ଶୀ ମୁହୂର୍ତ୍ତକୁ ପ୍ରଶଂସା କରିଥିଲେ।

ଯଦିଓ ଲୋକେ ଏହାକୁ ଖୁବ୍ ପସନ୍ଦ କରିଥିଲେ, କିନ୍ତୁ ଭାରତୀୟ ସେନା ଏହାକୁ ପ୍ରୋଟୋକଲ୍ ବା ନିୟମର ଉଲ୍ଲଂଘନ ଭାବରେ ଗ୍ରହଣ କରିଛି।

ସେନା ଅଧିକାରୀଙ୍କ ବିବାହ ପ୍ରସ୍ତାବ ଦେବାର ଉଦ୍ଦେଶ୍ୟକୁ ସେନା ସମ୍ମାନ ଜଣାଉଛି, କିନ୍ତୁ ଏଥିପାଇଁ ବଛାଯାଇଥିବା ସମୟ ଏବଂ ସ୍ଥାନ ଆଦୌ ଉପଯୁକ୍ତ ନଥିଲା। ସେନାର ଯନ୍ତ୍ରପାତି ଏବଂ ସମ୍ପତ୍ତି (ଯେପରିକି ହେଲିକପ୍ଟର) କୁ ବ୍ୟକ୍ତିଗତ ସୋସିଆଲ୍ ମିଡିଆ ପ୍ରଚାର ବା ବିଷୟବସ୍ତୁ ପାଇଁ ବ୍ୟବହାର କରିବା ବିରୋଧରେ ସେନାର କଠୋର ଗାଇଡଲାଇନ୍ ରହିଛି, ଯାହାର ଉଲ୍ଲଂଘନ ହୋଇଛି।

କ୍ୟାପଟେନ୍ ଭାରଦ୍ୱାଜ ଏକାଧିକ ସେବା ନିୟମର ଉଲ୍ଲଂଘନ କରିଥିବାରୁ ବରିଷ୍ଠ ଅଧିକାରୀମାନେ ତାଙ୍କୁ ଘଟଣା ସମ୍ପର୍କରେ ସ୍ପଷ୍ଟୀକରଣ ମାଗିଛନ୍ତି।

ସୂତ୍ର ଅନୁଯାୟୀ, ଏହା କୌଣସି ଗମ୍ଭୀର ଅପରାଧ ନହୋଇଥିବାରୁ କ୍ୟାପଟେନ୍ ଭାରଦ୍ୱାଜଙ୍କ ବିରୋଧରେ କୌଣସି କଠୋର ଆନୁଷ୍ଠାନିକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବାର ସମ୍ଭାବନା ନାହିଁ। ତଥାପି, ଜଣେ ସେନା ଅଧିକାରୀଙ୍କ ଆଚରଣ, ସେବା ନିୟମ ଏବଂ ପେସାଦାର ଦାୟିତ୍ୱ ସମ୍ପର୍କରେ ତାଙ୍କୁ ଅଧିକ ସଚେତନ କରାଇବା ପାଇଁ ବରିଷ୍ଠ ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି।