ନୂଆଦିଲ୍ଲୀ: ଓଡ଼ିଆ ଜାତିର ଆରାଧ୍ୟ ଦେବତା ମହାପ୍ରଭୁ ଶ୍ରୀଜଗନ୍ନାଥ, ବିଶ୍ୱ ପ୍ରସିଦ୍ଧ କୋଣାର୍କ ମନ୍ଦିର, ଓଡ଼ିଶା ରାଜ୍ୟ, ଓଡ଼ିଶାର ବିଧାୟକ ତଥା ସାମ୍ବାଦିକଙ୍କ ବିରୋଧରେ ଅଶାଳୀନ ମନ୍ତବ୍ୟ ଦେଇଥିବା ବଙ୍ଗାଳୀ ସାମ୍ବାଦିକ ଅଭିଜିତ ଆୟାର ମିତ୍ରଙ୍କ ଅଡୁଆ ଏବେ ବଢିଲା । ସୁପ୍ରିମକୋର୍ଟ ତାଙ୍କର ଜାମିନ ଆବେଦନକୁ ଖାରଜ କରିଦେବା ପରେ ଏବେ ସେ ଯେକୌଣସି ସମୟରେ ଗିରଫ ହୋଇପାରନ୍ତି ।
ଗଣମାଧ୍ୟମକୁ ସୂଚନା ଦେଇ ଅଭିଯକ୍ତ ଅଭିଜିତ ନାୟାର ମିତ୍ରଙ୍କ ଓକିଲ ନିଖିଲ ମେହେରା କହିଛନ୍ତି, “ଆପେକ୍ସ କୋର୍ଟରେ ଅଭିଜିତଙ୍କ ମଧ୍ୟବର୍ତ୍ତୀ କାଳୀନ ଜାମିନ ଆବେଦନ ଖାରଜ ହୋଇଯିବା ପରେ ମୋ ମହକିଲ ଏବେ ଓଡ଼ିଶା ପୋଲିସଙ୍କୁ ତଦନ୍ତରେ ସହଯୋଗ କରିବେ” ।
ଅଭିଯୁକ୍ତ ଅଭିଜିତଙ୍କ ଓକିଲ ଶ୍ରୀଯୁକ୍ତ ମେହେରା ଆହୁରି ମଧ୍ୟ କହିଛନ୍ତି ଯେ, ସେ ତାଙ୍କ ମହକିଲଙ୍କୁ ନ୍ୟାୟ ଦେବାକୁ ପାରୁ ପର୍ଯ୍ୟନ୍ତ ଚେଷ୍ଟା କରିବେ ।
“ଆମେ ଏହି ମାମଲାରେ ଖସି ଚାଲିଯିବାକୁ ଚାହୁଁନାହୁଁ କି ଆମେ ମଧ୍ୟ କାହାରିକୁ ଡ଼ରୁନାହୁଁ । ମୋ ମହକିଲ ଯାହାକିଛି ବି ଟିପ୍ପଣୀ ଦେଇଛନ୍ତି ତାହା ସାମ୍ବିଧାନିକ ଭାବେ ଠିକ୍ । ସମ୍ବିଧାନରେ ସ୍ୱ ବାକ୍ ଅଧିକାରର ସ୍ପଷ୍ଟ ନିୟମ ଉଲ୍ଲେଖ ରହିଛି । ” ଏହି କଥା କହିଛନ୍ତି ବଙ୍ଗୀୟ ସାମ୍ବାଦିକ ତଥା ଅଭିଯୁକ୍ତ ଅଭିଜିତ ଆୟାର ମିତ୍ରଙ୍କ ଓକିଲ ନିଖିଲ ମେହେରା ।
ସୁପ୍ରିମକୋର୍ଟର ସ୍ୱତନ୍ତ୍ର ଖଣ୍ଡପୀଠରେ ଏହି ମାମଲାର ବିଚାର ଚାଲିଥିବା ବେଳେ ଅଭିଯୁକ୍ତ ଅଭିଜିତଙ୍କ ଓକିଲ ତାଙ୍କର ମହକିଲଙ୍କ ଜୀବନ ପ୍ରତି ବିପଦ ରହିଥିବା କଥା ଯୁକ୍ତି ଦର୍ଶାଇଥିଲେ । କିନ୍ତୁ ଏହି ଯୁକ୍ତିକୁ ଖଣ୍ଡନ କରିଦେଇ ନ୍ୟାୟାଧୀଶ ରଞ୍ଜନ ଗୋଗୋଇ କହିଥିଲେ, “ତମର ଜୀବନ ଯଦି ବିପଦପୂର୍ଣ୍ଣ ତେବେ ଜେଲ କୋଠରୀ ଠାରୁ ଆଉ ସୁରକ୍ଷିତ ସ୍ଥାନ କେଉଁଠି ରହିଛି? ସେଠାରେ ତୁମ ଜୀବନ ସୁରକ୍ଷିତ ରହିବ” ।
ଏପରିକି ବିଚାର କରୁଥିବା ଏହି ଖଣ୍ଡପୀଠ ମଧ୍ୟ ତାଙ୍କ ଶୁଣାଣିରେ କହିଥିଲେ, ଦେଇଥିବା ବିବାଦୀୟ ଟିପ୍ପଣୀ ସାଂପ୍ରଦାୟିକ ବିଭେଦକୁ ଦର୍ଶାଉଛି । ତେଣୁ କିପରି ତମକୁ ଜାମିନ ମିଳିବ?
ଓଡ଼ିଶାର କଳା ଓ ସ୍ଥାପତ୍ୟ ସମ୍ପର୍କରେ ଅଶାଳୀନ ଟିପ୍ପଣୀ ଦେବା ପରେ ଅଭିଜିତଙ୍କୁ ଓଡ଼ିଶା ପୋଲିସ ଗତ ସେପ୍ଟେମ୍ବର ୨୦ ତାରିଖରେ ନୂଆଦିଲ୍ଲୀର ନିଜାମ୍ମୁଦିନ ଥାନା ଅଞ୍ଚଳରୁ ଗିରଫ କରିଥିଲା । ଏହାପରେ ସମଗ୍ର ଓଡ଼ିଶାରେ ଏହି ବଙ୍ଗାଳୀ ସାମ୍ବାଦିକଙ୍କ ଟିପ୍ପଣୀକୁ ନେଇ ପ୍ରବଳ ପ୍ରତିବାଦ ସହିତ ବିଭିନ୍ନ ସ୍ଥାନରେ ବିକ୍ଷୋଭ ପ୍ରଦର୍ଶନ କରାଯାଇଥିଲା ।
ଅଭିଯୁକ୍ତ ଅଭିଜିତଙ୍କୁ ତୁରନ୍ତ ଗିରଫ କରିବାକୁ ସାରା ଓଡ଼ିଶାରେ ପ୍ରବଳ ଦାବି ହେଉଥିବା ବେଳେ ଓଡ଼ିଶା ସରକାର ବିଧାନ ସଭାରେ ଏହି ମାମଲା ନେଇ ଏକ ଗୃହ କମିଟି ଗଠନ କରିଥିଲେ । ବିରୋଧି ଦଳ ନେତା ନରସିଂହ ମିଶ୍ରଙ୍କ ଅଧ୍ୟକ୍ଷତାରେ ଅନୁଷ୍ଠିତ ହୋଇଥିବା ବୈଠକରେ ବଙ୍ଗୀୟ ସାମ୍ବାଦିକ ଅଭିଜିତଙ୍କୁ ବିଧାନସଭାର ଗୃହ କମିଟିରେ ହାଜର ହେବାକୁ ନୋଟିସ ଜାରି କରାଯାଇଥିଲା ।
ଏହି ମାମଲା ବିମ୍ବାଧର ବେଉରାଙ୍କ ପକ୍ଷରୁ ଆପେକ୍ସ କୋର୍ଟରେ ଦାୟର କରାଯିବା ପରେ ତାଙ୍କୁ ସେପ୍ଟେମ୍ବର ୨୮ରେ କୋର୍ଟରେ ହାଜର ହେବାକୁ ନିର୍ଦ୍ଦେଶ ଦିଆଯାଇଥିଲା ।
ସେପ୍ଟେମ୍ବର ୨୭ ତାରିଖରେ ମାନ୍ୟବର ସୁପ୍ରିମକୋର୍ଟ ଅନ୍ତରୀଣ ଜାମିନ ପ୍ରଦାନକୁ ଅକ୍ଟୋବର ୫ ତାରିଖ ପର୍ଯ୍ୟନ୍ତ ଘୁଞ୍ଚାଇ ଥିଲେ । ଓଡ଼ିଶା ହାଇକୋର୍ଟରେ ଏହାର ବିଚାର ହେବାକୁ ଥିବାବେଳେ ଅଭିଜିତଙ୍କୁ ଆବଶ୍ୟକୀୟ ସୁରକ୍ଷା ପ୍ରଦାନ କରିବା ଲାଗି ଓଡ଼ିଶା ପୋଲିସକୁ ନିର୍ଦ୍ଦେଶ ଦେଇଥିଲେ ।
Comments are closed.