ନୂଆଦିଲ୍ଲୀ: ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଆଜି ଦିଲ୍ଲୀ ବିଧାନସଭାରେ ଗୃହକୁ ସମ୍ବୋଧିତ କରିଛନ୍ତି । ଏହା ସହ ବିଜେପି ଉପରେ କଡା ଆକ୍ରମଣ କରିଛନ୍ତି । କେଜ୍ରିୱାଲ କହିଛନ୍ତି ଯେ, ମୋତେ ଏବଂ ସିସୋଦିଆଙ୍କୁ ଜେଲରୁ ବାହାରିବା ଦେଖି ବିରୋଧୀମାନେ ଦୁଃଖିତ । ପ୍ରଧାନମନ୍ତ୍ରୀ ମୋଦି ଶକ୍ତିଶାଳୀ କିନ୍ତୁ ସେ ଭଗବାନ ହୋଇପାରିବେ ନାହିଁ ।
ପୂର୍ବତନ ମୁଖ୍ୟମନ୍ତ୍ରୀ କେଜ୍ରିୱାଲ କହିଛନ୍ତି ଯେ, ଦିଲ୍ଲୀକୁ ଅଟକାଇ ବିଜେପି ଖୁସି ହେଉଛି । ଦିଲ୍ଲୀର ଦୁଇ କୋଟି ଲୋକଙ୍କ ଜୀବନ ନଷ୍ଟ କରିଛି ବିଜେପି । କେଜ୍ରିୱାଲ ବିଜେପିକୁ କହିଛନ୍ତି ଯେ ଆମେ ୫୦୦ ମୋହଲା କ୍ଲିନିକ୍ ନିର୍ମାଣ କରିଛୁ, ତେଣୁ ତୁମେ ୫ ହଜାର ନିର୍ମାଣ କର କିଏ ତୁମକୁ ଅଟକାଇଛି?
କେଜ୍ରିୱାଲ କହିଛନ୍ତି ଯେ, ବିଜେପି ଦ୍ୱାରା ବନ୍ଦ ହୋଇଯାଇଥିବା କାର୍ଯ୍ୟକୁ ମୁଁ ପୁନଃ ଆରମ୍ଭ କରିବି । ମୁଁ ଦିଲ୍ଲୀର ଲୋକଙ୍କୁ ଅସୁବିଧାରେ ପକାଇବାକୁ ଦେବି ନାହିଁ । ଏପରିକି ରାବଣର ଗର୍ବ ମଧ୍ୟ ବଜାୟ ରହିପାରିଲା ନାହିଁ । ନିର୍ବାଚନରେ ଦିଲ୍ଲୀର ଲୋକମାନେ ବିଜେପିକୁ ଉପଯୁକ୍ତ ଉତ୍ତର ଦେବେ । ନକଲି ମାମଲା ଦାଖଲ କରି ବିଜେପି ଲୋକମାନେ ଆମ ଦଳର ବରିଷ୍ଠ ନେତାମାନଙ୍କୁ ଜେଲରେ ରଖିଛନ୍ତି । ମୋତେ ଅସାଧୁ ବୋଲି ପ୍ରମାଣ କରିବାକୁ ବିଜେପି କୌଣସି ବାଟ ଛାଡିନାହିଁ ।
ଅରବିନ୍ଦ କେଜ୍ରିୱାଲ ପୁଣି କହିଛନ୍ତି ଯେ, ମୁଁ ଜେଲ୍ ଯିବା ପରେ ଦିଲ୍ଲୀର ରାସ୍ତା ମରାମତି ହୋଇନାହିଁ । ଆଜି ଆମେ ଜନସାଧାରଣଙ୍କୁ ପ୍ରତିଶୃତି ଦେଇଛୁ ଯେ ରାସ୍ତା ମରାମତି ହେବ । ମୋଦିଙ୍କୁ ଲକ୍ଷ୍ୟ କରି କେଜ୍ରିୱାଲ କହିଛନ୍ତି ଯେ, ୭୫ ବର୍ଷ ପୂରଣ ହେବା ପରେ ବିଜେପି ଲାଲ କୃଷ୍ଣ ଆଡଭାନୀ, ମୁର୍ଲି ମନୋହର ଯୋଶୀଙ୍କ ସମେତ ଅନେକ ନେତାଙ୍କୁ ଘରେ ବସେଇଦେଇଛି । ଏହି ନିୟମ ନରେନ୍ଦ୍ର ମୋଦିଙ୍କ ପାଇଁ କାହିଁକି ଲାଗୁ ହେଉ ନାହିଁ ବୋଲି ସେ ପ୍ରଶ୍ନ କରିଛନ୍ତି ।