‘ଦିଲ୍ଲୀ ଅବକାରୀ ନୀତି ଦୁର୍ନୀତିରେ ଅନ୍ୟତମ ମୁଖ୍ୟ ଷଡ଼ଯନ୍ତ୍ରକାରୀ ଅରବିନ୍ଦ କେଜ୍ରିଓ୍ଵାଲ’

ନୂଆଦିଲ୍ଲୀ: ଦିଲ୍ଲୀ ଅବକାରୀ ନୀତି ଦୁର୍ନୀତିରେ ଅପରାଧିକ ଷଡ଼ଯନ୍ତ୍ରର ଅନ୍ୟତମ ମୁଖ୍ୟ ଷଡ଼ଯନ୍ତ୍ରକାରୀ ଅରବିନ୍ଦ କେଜ୍ରିଓ୍ଵାଲ। କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ବୁଧବାର ସ୍ୱତନ୍ତ୍ର ଅଦାଲତକୁ ଏହା କହିଛି।

କେଜ୍ରିୱାଲଙ୍କୁ ରିମାଣ୍ଡରେ ନେବା ପାଇଁ ସିବିଆଇ ମାର୍ଚ୍ଚ ମାସରେ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି)ର ଯୁକ୍ତି ଭଳି ଯୁକ୍ତି ଉପସ୍ଥାପନ କରିଥିଲା। ଯେଉଁଥିରେ ଭାରତ ରାଷ୍ଟ୍ର ସମିତି (ବିଆରଏସ) ଏମଏଲସି କେ କବିତା ଏବଂ ଓଙ୍ଗୋଲରୁ ନବନିର୍ବାଚିତ ତେଲୁଗୁ ଦେଶମ ପାର୍ଟି (ଟିଡିପି) ସାଂସଦ ମାଗୁଣ୍ଟା ଶ୍ରୀନିବାସୁ ରେଡ୍ଡୀଙ୍କ ସହ କେଜ୍ରିୱାଲଙ୍କ ବୈଠକ ମଦ କାରବାର ଉପରେ ଆଲୋଚନା କରାଯାଇଥିଲା।

ଗିରଫ ଦାରୀର କାରଣ ଦର୍ଶାଇ ସିବିଆଇ ସ୍ୱତନ୍ତ୍ର ଅଦାଲତକୁ କହିଛି ଯେ କେଜ୍ରିୱାଲଙ୍କ ଘନିଷ୍ଠ ସହଯୋଗୀ ଭାବେ ପରିଚିତ ବିଜୟ ନାୟାର ୨୦୨୧-୨୨ ବର୍ଷ ପାଇଁ ଆଗାମୀ ଦିଲ୍ଲୀ ଅବକାରୀ ନୀତିରେ ସେମାନଙ୍କ ପାଇଁ ଅନୁକୂଳ ବ୍ୟବସ୍ଥା ଅନ୍ତର୍ଭୁକ୍ତ କରିବା ପାଇଁ ମାର୍ଚ୍ଚ ୨୦୨୧ରୁ ବିଭିନ୍ନ ମଦ ଉତ୍ପାଦନକାରୀ ଏବଂ ବ୍ୟବସାୟୀଙ୍କ ସହ ଯୋଗାଯୋଗ କରି ଅଯଥା ସନ୍ତୋଷ ଦାବି କରୁଥିଲେ।

ସିବିଆଇ ଏହା ମଧ୍ୟ ଦାବି କରିଛି ଯେ ରେଡ୍ଡୀ ୧୬ ମାର୍ଚ୍ଚ ୨୦୨୧ରେ ଦିଲ୍ଲୀ ସଚିବାଳୟରେ ଥିବା ତାଙ୍କ କାର୍ଯ୍ୟାଳୟରେ କେଜ୍ରିୱାଲଙ୍କୁ ଭେଟିଥିଲେ ଏବଂ ଦିଲ୍ଲୀରେ ମଦ କାରବାର ରେ ସମର୍ଥନ ପାଇଁ ଅନୁରୋଧ କରିଥିଲେ। ବୈଠକରେ କେଜ୍ରିଓ୍ଵାଲ ରେଡ୍ଡୀଙ୍କୁ ସମର୍ଥନର ପ୍ରତିଶ୍ରୁତି ଦେବା ସହ କବିତାଙ୍କ ସହ ଯୋଗାଯୋଗ କରିବାକୁ କହିଥିଲେ।

କେଜ୍ରିୱାଲ ରେଡ୍ଡୀଙ୍କୁ ଆପକୁ ଆର୍ଥିକ ପାଣ୍ଠି ଯୋଗାଇ ଦେବାକୁ କହିଥିଲେ। ରେକର୍ଡରେ ଥିବା ଦସ୍ତାବିଜ ତଥ୍ୟ ସହ ଏହା ପ୍ରମାଣିତ ହୋଇଛି ବୋଲି ସିବିଆଇ ନିଜ ରିମାଣ୍ଡ ନୋଟରେ କହିଛି।

ମଦ ଲାଇସେନ୍ସ ଚାହୁଁଥିବା ବିକ୍ରେତାମାନଙ୍କୁ ଅଯଥା ଆର୍ଥିକ ସହାୟତା ପ୍ରଦାନ କରିବା, ରାଜକୋଷକୁ ୧୪୦ କୋଟିରୁ ଅଧିକ କ୍ଷତି ପହଞ୍ଚାଇବା ଏବଂ ସେହି ଅନୁଗ୍ରହ ବଦଳରେ ଲାଞ୍ଚ ନେବା ଏବଂ ବିଭିନ୍ନ କମ୍ପାନୀର ମାଲିକଙ୍କ ସହ ମିଶି ମିଳାମିଶା କରୁଥିବା ଆପ୍ ସରକାରଙ୍କ ବିରୋଧରେ ଏହି ମାମଲା ରୁଜୁ ହୋଇଛି।

ଦିଲ୍ଲୀ ମୁଖ୍ୟ ଶାସନ ସଚିବ ନରେଶ କୁମାରଙ୍କ ଦ୍ୱାରା ପ୍ରସ୍ତୁତ ଏକ ଆକଳନ ରିପୋର୍ଟ ଅନୁଯାୟୀ, ଗତ ବର୍ଷ ଜୁଲାଇ ୨୨ତାରିଖରେ ଦିଲ୍ଲୀ ଉପରାଜ୍ୟପାଳ ବିନୟ କୁମାର ସକ୍ସେନା ଦିଲ୍ଲୀ ଅବକାରୀ ନୀତି ୨୦୨୧-୨୨ର ସିବିଆଇ ତଦନ୍ତ ପାଇଁ ସୁପାରିସ କରିଥିଲେ।

ନୀତିରେ ସଂଶୋଧନ, ଲାଇସେନ୍ସଧାରୀଙ୍କୁ ଅଯଥା ଅନୁକମ୍ପା ପ୍ରଦାନ, ଲାଇସେନ୍ସ ଶୁଳ୍କ ହ୍ରାସ ଏବଂ ଏଲ୍ -୧ ଲାଇସେନ୍ସ (ମଦ କାରବାରରେ ହୋଲସେଲ ବଣ୍ଟନ ଅଭିଜ୍ଞତା ଥିବା ସଂସ୍ଥାଗୁଡ଼ିକୁ ପ୍ରଦାନ) ବିନା ପୂର୍ବ ଅନୁମୋଦନରେ ବୃଦ୍ଧି କରିବା ଆଦି ଅନିୟମିତତା ଅଭିଯୋଗ ହୋଇଛି।

ଉଲ୍ଲେଖଯୋଗ୍ୟ, ନିମ୍ନ ଅଦାଲତଙ୍କ ଜାମିନ ଉପରେ ରୋକ୍ ଲଗାଇଥିବା ଦିଲ୍ଲୀ ହାଇକୋର୍ଟଙ୍କ ଆଦେଶ ବିରୋଧରେ ସୁପ୍ରିମକୋର୍ଟରେ ଶୁଣାଣି ହେବାର କିଛି ଘଣ୍ଟା ପୂର୍ବରୁ ସିବିଆଇ କେଜ୍ରିଓ୍ଵାଲଙ୍କୁ ଗିରଫ କରିଥିଲା। ଅନିୟମିତତା ଅଭିଯୋଗରେ କେଜ୍ରିୱାଲଙ୍କୁ ପଚରାଉଚରା କରିବା ପାଇଁ ସ୍ୱତନ୍ତ୍ର ସିବିଆଇ ଅଦାଲତ ବୁଧବାର ସିବିଆଇକୁ ୩ ଦିନିଆ ରିମାଣ୍ଡରେ ପଠାଇଛନ୍ତି।