ମୁମ୍ବାଇ: ଏସିଆ କପ୍ ୨୦୨୫ର ଫାଇନାଲ ମ୍ୟାଚରେ ଭାରତ ପାକିସ୍ତାନକୁ ହରାଇ ନବମ ଥର ପାଇଁ ମ୍ୟାଚ ଜିତିଛି। ଏହି ରୋମାଞ୍ଚକର ମ୍ୟାଚରେ ତିଲକ ବର୍ମାଙ୍କ ଦମଦାର ପାଳି ଭାରତକୁ ବିଜୟୀ କରାଇଛି। ତାଙ୍କର ଅର୍ଦ୍ଧଶତକ ପାକିସ୍ତାନ ପାଇଁ ବଡ଼ ଝଟକା ସାବ୍ୟସ୍ତ ହୋଇଛି।
ପାକିସ୍ତାନ ଭାରତ ଆଗରେ ୧୪୭ ରନର ଲକ୍ଷ୍ୟ ରଖିଥିଲା। କିନ୍ତୁ ଭାରତର ଆରମ୍ଭ ଖରାପ ଥିଲା। ୧୦ ରନରେ ୨ଟି ଓ୍ଵିକେଟ ହରାଇଥିଲା ଦଳ। ଏହା ପରେ ତିଲକ ବର୍ମା ମଇଦାନକୁ ଓହ୍ଲାଇଥିଲେ। କିନ୍ତୁ ୨୦ ରନ ବେଳକୁ ଭାରତ ତୃତୀୟ ଓ୍ଵିକେଟ ହରାଇଥିଲା। ତିଲକ ଗୋଟିଏ ପଟେ କ୍ରିଜରେ ଛିଡା ହୋଇଥିଲେ ଆଉ ତାଙ୍କୁ ସହଯୋଗ କରିଥିଲେ ସଞ୍ଜୁ ସାମସନ। ଉଭୟ ୫୭ ରନର ଗୁରୁତ୍ୱପୂର୍ଣ୍ଣ ଇନିଂସ ଖେଳିଥିଲେ।
ପରେ ଶିବମ ଦୁବେଙ୍କ ସହ ମିଶି ତିଲକ ଦଳକୁ ବିଜୟର ପାଖାପାଖି ପହଞ୍ଚାଇଥିଲେ। ତିଲକ ୪୧ ବଲରେ ନିଜର ଅର୍ଦ୍ଧଶତକ ପୂରଣ କରିଥିଲେ। ଏହା ଏହି ଟୁର୍ଣ୍ଣାମେଣ୍ଟରେ ତାଙ୍କର ପ୍ରଥମ ଅର୍ଦ୍ଧଶତକ। ସେ ୫୩ ବଲରେ ୬୯ ରନ କରି ଅପରାଜିତ ରହିଥିଲେ। ସେ ୩ଟି ଚୌକା ଓ ୪ଟି ଛକା ମାରିଥିଲେ। ୧୩୦.୧୮ ଷ୍ଟ୍ରାଇକ ରେଟରେ ସେ ଏହି ରନ କରିଥିଲେ। ଏହା ତାଙ୍କର ଟୁର୍ଣ୍ଣାମେଣ୍ଟର ସବୁଠାରୁ ବଡ଼ ଇନିଂସ ଥିଲା। ଏହା ପୂର୍ବରୁ ସେ ଶ୍ରୀଲଙ୍କା ବିପକ୍ଷରେ ୪୯ ରନରେ ଅପରାଜିତ ଥିଲେ।
ସଞ୍ଜୁ ସାମସନ ୨୧ ବଲରେ ୨୪ ରନ କରିଥିଲେ। ସେ ୨ଟି ଚୌକା ଓ ଗୋଟିଏ ଛକା ମାରିଥିଲେ। ଶିବମ ଦୁବେ ୨୨ ବଲରେ ୧୫୦.୦୦ ଷ୍ଟ୍ରାଇକ ରେଟରେ ୩୩ ରନ କରିଥିଲେ। ତାଙ୍କ ପାଳିରେ ୨ଟି ଚୌକା ଓ ୨ଟି ଛକା ଥିଲା। ଏହି ଦୁହେଁ ତିଲକଙ୍କ ସହ ମିଶି ଭାରତକୁ ବିଜୟର ଦ୍ୱାର ଦେଶରେ ପହଁଚାଇଥିଲେ।
Comments are closed.