ନୂଆଦିଲ୍ଲୀ: ଆମ ଦେଶର ଲୋକଙ୍କ ଭିତରେ ପ୍ରତିଭା ଭରପୂର ହୋଇ ରହିଛି । ନିଜର ଖୁସିକୁ ଛୋଟ ଛୋଟ ଜିନିଷ ମାଧ୍ୟମରେ ଖୋଜି ସ୍ୱପ୍ନ ପୂରଣ କରିଥାନ୍ତି । ସୋସିଆଲ ମିଡିଆ ଯୁଗରେ ଏପରି ଘଟଣା ବେଶ୍ ଦେଖିବାକୁ ମିଳୁଛି । ଏପରି ଏକ ଘଟଣା ଗତକାଲି ମୁମ୍ୱାଇ ରାସ୍ତାରେ ନଜରକୁ ଆସିଥିଲା । ଜଣେ ଅଟୋ ଡ୍ରାଇଭର ତାଙ୍କ ଅଟୋକୁ କନ୍ସର୍ଟ ଷ୍ଟେଜରେ ପରିଣତ କରିଥିଲେ । ଯାହା ବଲିଉଡର ସଙ୍ଗୀତ ନିର୍ଦ୍ଦେଶକ ଅମିତ ତ୍ରିବେଦୀଙ୍କ ଦୃଷ୍ଟି ଆକର୍ଷଣ କରିଥିଲା । ସେ ସୋସିଆଲ ମିଡିଆରେ ଭିଡିଓକୁ ପୋଷ୍ଟ କରିଛନ୍ତି । ଏହି ଭିଡିଓ ପୋଷ୍ଟ କରିବା ମାତ୍ରେ ଭାଇରାଲ ହେବାରେ ଲାଗିଛି ।
ଖବର ଲେଖାଯିବା ସୁଧା ଏହି ଭିଡିଓକୁ ୩୦ ଲକ୍ଷରୁ ଅଧିକ ଲୋକ ଦେଖିଛନ୍ତି । ଏଥିସହ ଦୁଇ ଲକ୍ଷ କୋଡିଏ ହଜାର ୟୁଜର୍ସ ଭିଡିଓକୁ ଲାଇକ କରିଛନ୍ତି । ହଜାର ହଜାର ଲୋକ ଭିଡିଓକୁ ସେୟାର କରିଛନ୍ତି ।
ଅଟୋ ଡ୍ରାଇଭରଙ୍କ ପ୍ରତିଭାକୁ ଇନଷ୍ଟାଗ୍ରାମ ୟୁଜର୍ସ ବେଶ୍ ପସନ୍ଦ କରିଛନ୍ତି । ଏମିତିକି ଶହ ଶହ ସଂଖ୍ୟାରେ ଲୋକ ଏହି ଭିଡିଓକୁ ପ୍ରଶଂସା କରିଛନ୍ତି । ଜଣେ ୟୁଜର୍ସ ଲେଖିଛନ୍ତି,‘‘ ଭିତରୁ ଆମେ ଅନ୍ୟ କିଛି , ବାହାରୁ ଆମେ ଅସହାୟ ।’’ ଅନ୍ୟ ଜଣେ ୟୁଜର୍ସ ଲେଖିଛନ୍ତି,‘‘ ବହୁତ ସୁନ୍ଦର ହୋଇଛି…. କିନ୍ତୁ ଗାଡ଼ି ଚଳାଇବା ସମୟରେ ଗୀତ ଗାଇବା ବିପଦଜ୍ଜନକ ।’’
View this post on Instagram
ସଙ୍ଗୀତ ନିର୍ଦ୍ଦେଶକ ଅମିତ ତ୍ରିବେଦୀ ଲେଖିଛନ୍ତି,‘‘ ଏକ ଉତ୍ସାହର ଝଲକ୍ ମୁମ୍ୱାଇ ରାସ୍ତାରେ ଦେଖିବାକୁ ପାଇଲି । ଅଟୋ ଡ୍ରାଇଭର ତାଙ୍କ ଅଟୋକୁ କନ୍ସର୍ଟ ଷ୍ଟେଜରେ ପରିଣତ କରିଛନ୍ତି । ଏହା ଦେଖି ବହୁତ ଖୁସି ଲାଗିଲା । ଭାରତରେ ଅତି ଚମତ୍କାର ପ୍ରତିଭା ଅଛନ୍ତି। ’’
ଏହି ଅଟୋ ରିକ୍ସା ପଛରେ ବଡ଼ ବଡ଼ ଅକ୍ଷରରେ ‘ଶୁଭ ଜନ୍ମଦିନର ଶୁଭେଚ୍ଛା’ ସହ କିଛି ଲୋକଙ୍କର ନାଁ ମଧ୍ୟ ଲେଖାଯାଇଥିବା ଦେଖିବାକୁ ମିଳିଛି । ଏଥିସହ ଅଟୋ ଭିତରେ ରଙ୍ଗୀନ ଆଲୋକ ସହିତ ଉଚ୍ଚ ସ୍ୱରରେ ଗୀତ ବାଜୁଛି । ବଲିଉଡର ଏଭର ଗ୍ରୀନ କଣ୍ଠଶିଳ୍ପୀ ମହମ୍ମଦ ରାଫି ଗାଇଥିବା ଗୀତ ‘ଖୋୟା-ଖୋୟା ଚାନ୍ଦ… ଗୀତ ଗାଉଥିବା ଅଟୋ ଡ୍ରାଇଭରଙ୍କୁ ଭିଡିଓରେ ଦେଖିବାକୁ ମିଳିଛି ।