ଜୁଆ ଆଡ୍ଡା ଉପରେ ରାତି ଅଧିଆ ରେଡ୍: ୧୧ ଗିରଫ, ୩ ଲକ୍ଷ ଟଙ୍କା ଜବତ

ଭୁବନେଶ୍ୱର: ଜୁଆ ଆଡ୍ଡା ଉପରେ ରାତି ଅଧିଆ ରେଡ୍ । ଅଚାନକ ମାଡ଼ି ବସିଲା ପୋଲିସ । ଖୋର୍ଦ୍ଧା ଜିଲ୍ଲା ବାଲିଅନ୍ତା ଥାନା ବାଳକାଟିରେ ଜୁଆ ଖେଳ ଚାଲିଥିବା ପୋଲିସକୁ ଖବର ମିଳିଥିଲା । ଏହାପରେ ଆରମ୍ଭ ହୋଇଥିଲା ଚଢ଼ାଉ । ୧୧ ଜଣ ଜୁଆଡିଙ୍କୁ ଗିରଫ କରାଯାଇଛି । ସେମାନଙ୍କ ନିକଟରୁ ଜବତ ହୋଇଛି ନଗଦ ୨ଲକ୍ଷ ୯୮ ହଜାର ଟଙ୍କା ।

ଗତକାଲି ବିଳମ୍ବିତ ରାତିରେ ବାଳକାଟିରେ ଥିବା ଅନନ୍ୟା ମଣ୍ଡପରେ ଜୁଆ ଖେଳ ଚାଲିଥିଲା । ସୂଚନା ପାଇବା ପରେ ବାଲିଅନ୍ତା ଥାନା ଅଧିକାରୀ ଯୁବରାଜ ସ୍ଵାଇଁଙ୍କ ନେତୃତ୍ଵରେ ଏକ ଟିମ୍ ଚଢ଼ାଉ କରିଥିଲେ । ୧୧ଜୁଆଡିଙ୍କ ନିକଟରୁ ନଗଦ ୨ ଲକ୍ଷ ୯୮ ହଜାର ଟଙ୍କା, ୫ ମୁଠା ତାସ୍ , ୩ଟି ବାଇକ୍ ଓ ଗୋଟିଏ ଅଟୋ ଜବତ ହୋଇଛି । ଅଧିକ ଖୋଳତାଡ ଜାରି ରହିଛି ।