ପାଟନା: ବିହାରରେ ନୀତୀଶ କୁମାରଙ୍କ ମେଣ୍ଟ ଛାଡିବା ପରେ ଏନଡିଏରେ ଯୋଗ ଦେଇଛନ୍ତି। ଏହା ପରେ ସେ ବିଜେପି ସହିତ ବିହାରରେ ସରକାର ଗଠନ କରିଛନ୍ତି। ନୀତୀଶ କୁମାର ନବମ ଥର ପାଇଁ ରାଜ୍ୟର ମୁଖ୍ୟମନ୍ତ୍ରୀ ଭାବେ ଶପଥ ଗ୍ରହଣ କରିଥିଲେ। ବର୍ତ୍ତମାନ ୧୨ ଫେବୃଆରୀରେ ସଂଖ୍ୟାଗରିଷ୍ଠତା ହାସଲ କରିବାକୁ ସେ ଏକ ବଡ ଆହ୍ୱାନର ସମ୍ମୁଖୀନ ହୋଇଛନ୍ତି। ଏହାପୂର୍ବରୁ ବିହାର ରାଜନୀତିରେ ମଧ୍ୟ ଉତ୍ତେଜନା ଦେଖାଦେଇଛି। RJD ଏହାର ବିଧାୟକମାନଙ୍କୁ ବିଚ୍ଛିନ୍ନରୁ ରକ୍ଷା କରିବା ପାଇଁ ସମସ୍ତ ପ୍ରକାର ପ୍ରୟାସ କରୁଛି।
ତେବେ ଏହାରି ମଧ୍ୟରେ ଖବର ଆସୁଛି ଯେ ଆରଜେଡି ତେଜସ୍ୱୀ ଯାଦବଙ୍କ ବାସଭବନରେ ଏହାର ସମସ୍ତ ବିଧାୟକଙ୍କୁ ରଖିବାର ବ୍ୟବସ୍ଥା କରିଛି। ଘୋଡ଼ା ବେପାର ଭୟରେ ସମସ୍ତ ଦଳୀୟ ତଥା ସମର୍ଥକ ବିଧାୟକଙ୍କୁ ତେଜସ୍ୱୀଙ୍କ ଘରେ ରଖିବାର ବ୍ୟବସ୍ଥା କରିଛି ଆରଜେଡ଼ି। ସେପଟେ ତେଜସ୍ୱୀ ଯାଦବଙ୍କ ବାସଭବନରେ ଏକ ସଭା ହେବାକୁ ଯାଉଛି ବୋଲି ବିଧାୟକମାନଙ୍କୁ ଡକାଯାଇଥିଲା। ବୈଠକ ପରେ ସମସ୍ତ ବିଧାୟକଙ୍କୁ ସେଠାରେ ରହିବାକୁ କୁହାଯାଇଛି।
ବିଧାୟକଙ୍କ ପାଇଁ ହ୍ୱିପ ଜାରି କରିଛି ଜେଡ଼ିୟୁ
ଫ୍ଲୋର ଟେଷ୍ଟ ପୂର୍ବରୁ ଜେଡ଼ିୟୁ ନିଜର ବିଧାୟକଙ୍କୁ ହ୍ୱିପ ଜାରି କରିଛି। ଆସନ୍ତା ୧୧ ତାରିଖରେ ହେବାକୁ ଥିବା ବିଧାୟକ ବୈଠକରେ ସମସ୍ତ ବିଧାୟକ ଉପସ୍ଥିତ ରହିବାକୁ ଏହି ହ୍ୱିପ ଜାରି କରି କହିଛି। ସମସ୍ତ ବିଧାୟକ ଅନିବାର୍ଯ୍ୟ ଭାବେ ବୈଠକରେ ଉପସ୍ଥିତ ରହିବାକୁ କୁହାଯାଇଛି।
୩ ଘଣ୍ଟା ଧରି ଚାଲିଥିଲା ବୈଠକ
ତେଜସ୍ୱୀ ଯାଦବଙ୍କ ବାସଭବନରେ ପ୍ରାୟ ୩ ଘଣ୍ଟା ଧରି ଚାଲିଥିବା ଏହି ବୈଠକ ପରେ ସମସ୍ତ ବିଧାୟକଙ୍କୁ ୫ ଦେଶ ରତ୍ନ ମାର୍ଗସ୍ଥିତ ବାସଭବନରେ ରଖାଯାଇଛି। ଅନ୍ୟପକ୍ଷରେ କଂଗ୍ରେସ ବିଧାୟକମାନେ ମଧ୍ୟ ହାଇଦ୍ରାବାଦରେ ପହଞ୍ଚିଛନ୍ତି। ଘୋଡ଼ା ବେପାର ଭୟରେ କଂଗ୍ରେସ ବିଧାୟକଙ୍କୁ ହାଇଦ୍ରାବାଦକୁ ପଠାଇ ଦିଆଯାଇଛି। ନିକଟରେ ଦିଲ୍ଲୀରେ ଅନୁଷ୍ଠିତ ବୈଠକରେ ୧୯ ଜଣ କଂଗ୍ରେସ ବିଧାୟକଙ୍କ ମଧ୍ୟରୁ ୧୭ ଜଣ ଯୋଗ ଦେଇଥିଲେ। ବର୍ତ୍ତମାନ ହାଇଦ୍ରାବାଦକୁ ୧୬ ଜଣ ବିଧାୟକ ପଠାଯାଇଛି।
