ନୂଆଦିଲ୍ଲୀ: ନେପାଳରେ ରାଜତନ୍ତ୍ର Vs ଗଣତନ୍ତ୍ର । ତେଜୁଛି ଅସନ୍ତୋଷର ନିଆଁ । ରାଜତନ୍ତ୍ର ସମର୍ଥନରେ ହିଂସା । ୨ଜଣଙ୍କ ମୃତ୍ୟୁ, ୧୧୦ରୁ ଅଧିକ ଆହତ । ନେପାଳରେ ପୁଣି ରାଜତନ୍ତ୍ର ପ୍ରତିଷ୍ଠା ଦାବିରେ ରାସ୍ତାକୁ ଓହ୍ଲାଇଛନ୍ତି ଆନ୍ଦୋଳନକାରୀ । ବିରୋଧ ପ୍ରଦର୍ଶନ ବେଳେ ବ୍ୟାପକ ହିଂସା ଦେଖିବାକୁ ମିଳିଛି । ଘରେ ନିଆଁ ଲଗାଇବା ସହ ଲୁଟପାଟ ଭଳି ଘଟଣା ସାମନାକୁ ଆସିଛି । ହିଂସାକାଣ୍ଡରେ ୨ଜଣଙ୍କ ମୃତ୍ୟୁ ହୋଇଥିବା ବେଳେ ଶତାଧିକ ଆହତ ହୋଇଛନ୍ତି । ହିଂସା ପରେ ରାଜତନ୍ତ୍ରର ସମର୍ଥକ ଓ ନେପାଳ ସରକାର ମୁହାଁମୁହିଁ ହୋଇଛନ୍ତି । ପୂର୍ବତନ ରାଜା ଜ୍ଞାନେନ୍ଦ୍ର ଶାହଙ୍କ ସହ ହିଂସାରେ ସାମିଲ ଲୋକଙ୍କ ଉପରେ ଆକ୍ସନ୍ ନେଉଛନ୍ତି ସରକାର । ସେପଟେ ଏପ୍ରିଲ ୩ତାରିଖ ପର୍ଯ୍ୟନ୍ତ ସରକାରଙ୍କୁ ଅଲଟିମେଟମ୍ ଦେଇଛନ୍ତି ରାଜତନ୍ତ୍ର ସମର୍ଥକ ।
ପୂର୍ବତନ ରାଜାଙ୍କ ବିରୋଧରେ ଆକ୍ସନ୍
ନେପାଳର ପୂର୍ବତନ ରାଜା ଜ୍ଞାନେନ୍ଦ୍ର ଶାହଙ୍କ ବିରୋଧରେ ଆକ୍ସନ ମୋଡରେ ସରକାର । ଦେଶର ବିଭିନ୍ନ ସ୍ଥାନ ଗସ୍ତ କରିବା ପରେ ଫେବ୍ରୁଆରୀରେ ଜନତାଙ୍କୁ ସିଧାସଳଖ ସମର୍ଥନ ମାଗିଥିଲେ ଜ୍ଞାନେନ୍ଦ୍ର ଶାହ । ତେବେ ହିଂସାତ୍ମକ ପ୍ରଦର୍ଶନ ପରେ ଜ୍ଞାନେନ୍ଦ୍ରଙ୍କ ସୁରକ୍ଷାରେ ପରିବର୍ତ୍ତନ କରିଛନ୍ତି ନେପାଳର ଓଲି ସରକାର । ସୁରକ୍ଷା ହ୍ରାସ କରିବା ସହ ଜ୍ଞାନେନ୍ଦ୍ରଙ୍କ ସୁରକ୍ଷାରେ ନିୟୋଜିତ ସୁରକ୍ଷାକର୍ମୀଙ୍କୁ ବଦଳାଇ ଦେଇଛନ୍ତି । ପୂର୍ବରୁ ଜ୍ଞାନେନ୍ଦ୍ରଙ୍କ ସୁରକ୍ଷାରେ ୨୫ଜଣ ସୁରକ୍ଷା କର୍ମୀ ରହୁଥିବା ବେଳେ ଏବେ ଏହାକୁ କମାଇ ୧୬କରାଯାଇଛି । ସେପଟେ କାଠମାଣ୍ଡୁ ନଗର ନିଗମ ମଧ୍ୟ ରାଜାଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନେଉଛି ।
ରାଜାଙ୍କୁ ଜରିମାନା
ନେପାଳରେ ବିରୋଧ ପ୍ରଦର୍ଶନ ବେଳେ ହୋଇଥିବା ହିଂସାରେ ହୋଇଥିବା କ୍ଷୟକ୍ଷତି ଭରଣା କରିବାକୁ ଜ୍ଞାନେନ୍ଦ୍ର ଶାହଙ୍କୁ କୁହାଯାଇଛି । କାଠମାଣ୍ଡୁ ନଗର ନିଗମ ପୂର୍ବତନ ରାଜାଙ୍କୁ ୭ଲକ୍ଷ ୯୩ହଜାର ନେପାଳି ଟଙ୍କା ଜରିମାନା ବାବଦକୁ ଭରଣା କରିବାକୁ ନିର୍ଦ୍ଦେଶ ଦେଇଛି । ହିଂସାତ୍ମକ ପ୍ରଦର୍ଶନ ବେଳେ ଅନେକ କୋଠା, ସରକାରୀ ଅଫିସ ଓ ସରକାରୀ ଗାଡ଼ିରେ ନିଆଁ ଲଗାଯାଇଥିଲା । ଏହାର କ୍ଷତିପୂରଣ ଜ୍ଞାନେନ୍ଦ୍ରଙ୍କୁ ହିଁ ଭରଣା କରିବାକୁ କୁହାଯାଇଛି। ଏହା ସହ ଦେଶରେ ପୁଣି ରାଜତନ୍ତ୍ର ଫେରାଇ ଆଣିବାକୁ ଦାବି କରୁଥିବା ଜ୍ଞାନେନ୍ଦ୍ରଙ୍କ ସମର୍ଥକଙ୍କୁ ଚେତାବନୀ ଦେଇଛନ୍ତି ସରକାର । ହିଂସାକାଣ୍ଡ ନେଇ ଯାଞ୍ଚ ଚାଲିଥିବା ବେଳେ ଏଥିରେ ସାମିଲ ହୋଇଥିବା ବ୍ୟକ୍ତି ବିଶେଷଙ୍କ ବିରୋଧରେ କଡା କାର୍ଯ୍ୟାନୁଷ୍ଠାନ ନିଆଯିବ । ଗୁଇନ୍ଦା ସୂଚନା ଅନୁସାରେ ଦୋଷୀଙ୍କୁ ଚିହ୍ନଟ କରାଯିବ । ଏଥିରୁ ସ୍ପଷ୍ଟ ହୋଇଛି ଜ୍ଞାନେନ୍ଦ୍ରଙ୍କୁ ଛାଡିବା ମୁଡରେ ନାହାନ୍ତି ନେପାଳ ସରକାର ।
ସରକାରଙ୍କ ବିରୋଧରେ ତେଜୁଛି ଅସନ୍ତୋଷ
ଦୁର୍ନୀତି ଓ ବିଭିନ୍ନ ସ୍କାନରେ ନେପାଳର ପ୍ରାୟ ସବୁ ପ୍ରଧାନମନ୍ତ୍ରୀ ଓ ବରିଷ୍ଠ ରାଜନେତା ସଂପୃକ୍ତ ରହିଥିବା ଅଭିଯୋଗ ହୋଇଛି । ଏହାକୁ ନେଇ ନେପାଳ ଲୋକଙ୍କ ମଧ୍ୟରେ ଅସନ୍ତୋଷ କୁହୁଳୁଥିଲା । ହିଂସାତ୍ମକ ବିରୋଧ ପ୍ରଦର୍ଶନ ବେଳେ ଲୋକଙ୍କ ଅସନ୍ତୋଷ ତୀବ୍ର ରୂପ ନେଇଥିଲା । ନେପାଳରେ ଗଣତନ୍ତ୍ର ସରକାର ବିଫଳ ହୋଇଥିବା ସେଠାକାର ଲୋକେ ମନେ କରୁଛନ୍ତି । ତେଣୁ ପୁଣି ଦେଶକୁ ରାଜତନ୍ତ୍ର ଫେରାଇ ଆଣିବାକୁ ଦାବି କରୁଛନ୍ତି । କାରଣ ରାଜତନ୍ତ୍ର ଫେରିଲେ ହିଁ ରାଜନେତାଙ୍କ ନାଁରେ ଆସିଥିବା ବିଭିନ୍ନ ଅଭିଯୋଗର ନିରପେକ୍ଷ ତଦନ୍ତ କରାଯାଇପାରିବ ।
ବିରୋଧ ପ୍ରଦର୍ଶନ ପରେ ପୂର୍ବତନ ରାଜା ଓ ରାଜତନ୍ତ୍ରର ସମର୍ଥକଙ୍କୁ ଟାର୍ଗେଟ୍ କରୁଛନ୍ତି ନେପାଳ ସରକାର । ତେବେ ଏହା ସମସ୍ୟାର ସମାଧାନ ନୁହେଁ । କାରଣ ସରକାର ଓ ଗଣତନ୍ତ୍ର ବ୍ୟବସ୍ଥା ଉପରେ ବିଶ୍ବାସ କରିପାରୁନାହାନ୍ତି ସେଠାକାର ଲୋକେ । ତେଣୁ କାର୍ଯ୍ୟାନୁଷ୍ଠାନ ଡର ଦେଖାଇ ନୁହେଁ ବରଂ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରାଯାଇ ପାରିବ ।
ବ୍ୟୁରୋ ରିପୋର୍ଟ, ଓଡିଶା ସମ୍ବାଦ
Comments are closed.