ବରୀ ଥାନା ଅନ୍ୟାସୀପୁର ଗ୍ରାମରେ ଭଲପାଇ ବିବାହ କରିଥିବା ଝିଅକୁ ସୁରକ୍ଷା ଦେବାକୁ ଯାଇଥିବା ଝିଅର ଶ୍ବଶୁର ଘର ଲୋକଙ୍କ ମରଣାନ୍ତକ ଆକ୍ରମଣରେ ଝିଅର ବାପା ମୃତବରଣ କରିତଥିବା ଥାନାରେ ଅଭିଯୋଗ ହୋଇଛି । ଅଭିଯୋଗକୁ ଆଧାର କରି ବରୀ ପୁଲିସ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି ।
ସୂଚନାଯୋଗ୍ୟ, ବରୀ ଥାନା ଅନ୍ୟାସୀପ ଗ୍ରାମର ବାବାଜୀ ସେଠୀଙ୍କ ପୁଅ ଏକ ବର୍ଷେ ତଳେ ଉକ୍ତ ଗ୍ରାମର କାଳନ୍ଦୀ ସେଠୀଙ୍କ ଝିଅ ମମତା ସେଠୀକୁ ଭଲପାଇ ବିବାହ କରିଥିଲେ । ବିବାହର କିଛି ଦିନ ପରେ ସ୍ୱାମୀ-ସ୍ତ୍ରୀ ଉଭୟ ଖୋର୍ଦ୍ଧା ସଦରଥାନା ରାମଚଣ୍ଡି ଅଞ୍ଚଳରେ ରହୁଥିଲେ । ଉକ୍ତ ସ୍ଥାନରେ ସ୍ୱାମୀ-ସ୍ତ୍ରୀ ରହିବା ବେଳେ ଉଭୟଙ୍କ ମଧ୍ୟରେ ମନମାଳୀନ ଦେଖାଦେଇଥିଲା । ଏହାକୁ ନେଇ ଗତ ୨୦ ତାରିଖ ଉଭୟେ ଘରକୁ ଚାଲି ଆସିଥିଲେ। ସ୍ୱାମୀ ମିଠା କିଣିବା ବାହାନାରେ ସ୍ତ୍ରୀ ମମତାକୁ ବରୀ ବଜାରରେ ଛାଡି ଘରକୁ ଏକା ପଳାଇ ଆସିଥିଲେ । ମମତା କିଛି ସମୟ ଅପେକ୍ଷା କରି ସ୍ୱାମୀ ନଆସିବାରୁ ସେଠାରୁ ଶାୁଶୁ ଘରକୁ ଯାଇଥିଲେ ।
ହେଲେ ସେଠାରେ ଉପସ୍ଥିତ ଥିବା ସନ୍ତୋଷ ସମେତ ଶାଶୁଘର ଲୋକେ ମମତାକୁ ଘରେ ପ୍ରବେଶ କରାଇ ଦେଇନଥିଲେ । ଏହାକୁ ନେଇ ସ୍ତ୍ରୀ ମମତା ବରୀ ଥାନାରେ ପହଞ୍ଚି ଅଭିଯୋଗ କରିଥିଲେ । ପୋଲିସ ଘଟଣାସ୍ଥଳରେ ପହଞ୍ଚି ମମତାକୁ ଶାଶୁ ଘରେ ପ୍ରବେଶ କରାଇଥିଲେ ।ମାତ୍ର ପୋଲିସ ଚାଲିଯିବା ପରେ ଶ୍ବଶୁର ବାବାଜୀ ସେଠୀ, ଶାଶୂ ମହୁଲି ସେଠୀ, ଦେଡ଼ଶୁର ମଳୟ ସେଠୀ ଓ ବସନ୍ତ ସେଠୀ ମମତାଙ୍କୁ ମାରଧର କରିଥିଲେ।
ଝିଅକୁ ମାରଧର କରୁଥିବା ଖବର ପାଇ ମମତାଙ୍କ ବାପା କାଳନ୍ଦୀ ସେଠାରେ ପହଞ୍ଚି ପ୍ରତିବାଦ କରିଥିଲେ। ଏଥିରେ କ୍ଷୁବ୍ଧ ହୋଇ ଅଭିଯୁକ୍ତମାନେ କଟୁରି, ଭୁଜାଲି ଓ ପନିକିରେ କାଳନ୍ଦୀଙ୍କୁ ପ୍ରାଣାନ୍ତକ ଆକ୍ରମଣ କରିଥିଲେ। ରକ୍ତ ଜୁଡ଼ୁବୁଡ଼ୁ ଅବସ୍ଥାରେ କାଳନ୍ଦୀଙ୍କୁ ଉଦ୍ଧାର କରି ଗାଁ ଲୋକେ ବରୀ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଆଣିଥିଲେ। ସେଠାରୁ ଗୁରୁତର ଅବସ୍ଥାରେ ତାଙ୍କୁ ଯାଜପୁର ଓ ପରେ କଟକ ନିଆଯାଉଥିଲା ମାତ୍ର ସେଠାରେ ଡାକ୍ତର ତାଙ୍କୁ ମୃତ୍ୟୁ ଘୋଷଣା କରିଛନ୍ତି ।
ଘଟଣା ପରେ କାଳନ୍ଦୀଙ୍କ ପତ୍ନୀ ରଂଗବତୀଙ୍କ ଅଭିଯୋଗ କ୍ରମେ ଥାନା କେସ୍ ନମ୍ବର ୧୯୪/୨୦ ଦଫା ୩୦୭ ରେ ମାମଲା ରୁଜୁ ହୋଇଥିଲା। କାଳନ୍ଦୀଙ୍କ ମୃତ୍ୟୁ ପରେ ଏହା ହତ୍ୟା ମାମଲାକୁ ପରିବର୍ତ୍ତନ କରାଯାଇଥିଲା। ଥାନା ଅଧିକାରୀ ଅଜୟ କୁମାର ଜେନାଙ୍କ ତତ୍ତ୍ବାବଧାନରେ ୩/୪ ଟି ଟିମ୍ ବିଭିନ୍ନ ସ୍ଥାନରେ ଚଢ଼ଉ କରି ଅଭିଯୁକ୍ତମାନଙ୍କୁ ଗିରଫ କରିଥିଲେ।
ଅଭିଯୁକ୍ତ ବସନ୍ତ, ମଳୟ, ବାବାଜୀ ଓ ମହୁଲିକୁ ଖୋର୍ଦ୍ଧା ସଦରଥାନା ଅନ୍ତର୍ଗତ ନୂଆସାହି ବସ୍ତିରୁ ଗିରଫ କରାଯାଇଥିଲା। ସେଠାରୁ ହତ୍ୟାକାଣ୍ଡରେ ବ୍ୟବହୃତ କଟୁରି, ଭୁଜାଲି, ପନିକି ଜବତ କରାଯାଇଥିଲା। ଆଜି ଅଭିଯୁକ୍ତମାନଙ୍କୁ କୋର୍ଟ ଚାଲାଣ କରାଯାଇଛି।