ଭୁବନେଶ୍ୱର: ବାଲେଶ୍ୱର ବାହାନଗାରେ ବଡ଼ ଧରଣର ଟ୍ରେନ୍ ଦୁର୍ଘଟଣାରେ ଏବେ ସୁଦ୍ଧା ୫୦ ଜଣଙ୍କ ମୃତ୍ୟୁ ହୋଇଛି । ପ୍ରଥମେ ବାହାନଗାରେ ଷ୍ଟେସନ ନିକଟରେ କରମଣ୍ଡଳ ଏକ୍ସପ୍ରେସ୍ (୧୨୮୪୧) ମାଲଗାଡ଼ିକୁ ଧକ୍କା ଦେଇଥିଲା । ପରେ ବିପରୀତ ଦିଗରୁ ଆସୁଥିବା ବେଙ୍ଗଳୁରୁ-ହାୱଡ଼ା ସୁପରଫାଷ୍ଟ (୧୨୮୬୪) ମଧ୍ୟ ଲାଇନଚ୍ୟୁତ୍ କରମଣ୍ଡଳକୁ ଧକ୍କା ଦେଇଥିଲା ।
ଦୁର୍ଘଟଣାରେ ୫୦ରୁ ଅଧିକ ଜଣଙ୍କ ମୃତ୍ୟୁ ହୋଇଥିବା ବେଳେ ଦୁର୍ଘଟଣାରେ ୨୦୦ରୁ ଅଧିକ ଜଣ ଆହତ ହୋଇଛନ୍ତି । ଉଭୟ ଏକ୍ସପ୍ରେସର ଏକାଧିକ ବଗି କ୍ଷତିଗ୍ରସ୍ତ ହୋଇଛି । ଗତବର୍ଷ ନଭେମ୍ବର ୨୧ ସକାଳେ ଯାଜପୁର ଜିଲ୍ଲା କୋରାଇରେ ମାଲବାହୀ ଟ୍ରେନ୍ ଦୁର୍ଘଟଣାରେ ୩ ଜଣଙ୍କ ମୃତ୍ୟୁ ହୋଇଥିଲା । ଏବେ ବାଲେଶ୍ୱରର ବାହାନଗାରେ ମାଲବାହୀ ସହ ୨ଟି ଏକ୍ସପ୍ରେସ୍ ଲାଇନଚ୍ୟୁତ୍ ହୋଇଛି ।
ଏହା ପୂର୍ବରୁ ୨୦୧୭ ଜାନୁଆରୀ ୨୩ରେ ଭୁବନେଶ୍ୱରରୁ ଜଗଦଲପୁର ଯାଉଥିବା ହିରାଖଣ୍ଡ ଏକ୍ସପ୍ରେସ୍ ମଧ୍ୟ ବଡ଼ ଧରଣର ଦୁର୍ଘଟଣାର ସମ୍ମୁଖୀନ ହୋଇଥିଲା । ଆନ୍ଧ୍ରପ୍ରଦେଶର କୁନେରୁ ଷ୍ଟେସନ୍ ନିକଟରେ ବିଳମ୍ବିତ ରାତିରେ ହିରାଖଣ୍ଡ ଏକ୍ସପ୍ରେସ୍ ଲାଇନଚ୍ୟୁତ୍ ହୋଇଥିଲା । ଯେଉଁଥିରେ ୩୯ ଜଣଙ୍କ ମୃତ୍ୟୁ ହୋଇଥିବା ବେଳେ ୬୭ରୁ ଅଧିକ ଆହତ ହୋଇଥିଲେ ।
ଏନସିଆରବି ରିପୋର୍ଟ ଅନୁସାରେ, ୨୦୨୦ ମସିହାରେ ଦେଶରେ ୧୩ ହଜାରରୁ ଅଧିକ ଟ୍ରେନ୍ ଦୁର୍ଘଟଣା ଘଟିଥିବା ବେଳେ ରେଳ ଯୋଗୁଁ ଦୈନିକ ୩୨ ଜଣଙ୍କ ମୃତ୍ୟୁ ହେଉଛି । ସବୁଠୁ ଅଧିକ ଟ୍ରେନ୍ ଦୁର୍ଘଟଣା ମହାରାଷ୍ଟ୍ର ଓ ଉତ୍ତରପ୍ରଦେଶରେ ଘଟୁଛି ।
ଏବେ ଆସନ୍ତୁ ନଜର ପକାଇବା ଦେଶରେ ବିଭିନ୍ନ ସମୟରେ ଘଟିଥିବା ବଡ଼ ରେଳ ଦୁର୍ଘଟଣା ଉପରେ…
- ୧୯୮୧ ଜୁନ୍ ୬ ତାରିଖରେ ବିହାରରେ ବଡ଼ ଧରଣର ଟ୍ରେନ୍ ଦୁର୍ଘଟଣା ଘଟିଥିଲା । ପ୍ରାୟ ୯ ଶହ ଯାତ୍ରୀଙ୍କୁ ନେଇ ଯାଉଥିବା ଏକ ଯାତ୍ରୀବାହୀ ଟ୍ରେନ୍ ବାଗମତି ନଦୀକୁ ଖସି ପଡ଼ିଥିଲା । ଯାହାକି ଭାରତୀୟ ରେଳ ଦୁର୍ଘଟଣା ଇତିହାସରେ ସବୁଠୁ ବଡ଼ ଦୁର୍ଘଟଣା । ଏଥିରେ ପ୍ରାୟ ୬ ଶହ ଯାତ୍ରୀଙ୍କ ମୃତ୍ୟୁ ହୋଇଥିଲା ।
- ସେହିଭଳି ୧୯୯୫ ଅଗଷ୍ଟ ୨୦ ତାରିଖରେ ଦିଲ୍ଲୀରୁ ବାହାରିଥିବା ୨ଟି ଟ୍ରେନ୍ ଉତ୍ତରପ୍ରଦେଶର ଫିରୋଜବାଦରେ ଧକ୍କା ହେବା ଫଳରେ ପ୍ରାଣ ହାରିଥିଲେ ପ୍ରାୟ ୩୦୦ ଯାତ୍ରୀ । ସେଦିନ ରାତିରେ ଖାଇ ସାରି ଟ୍ରେନରେ ଶୋଇଥାନ୍ତି । ହଠାତ୍ କାଳିନ୍ଦୀ ଏକ୍ସପ୍ରେସ୍ ଏକ ଗାଈକୁ ଧକ୍କା ଦେଇ ଟ୍ରାକ୍ ଉପରେ ଅଟକି ରହିଥିଲା । ଆଉ ପଛରୁ ଆସୁଥିଲା ପୁରୁଷୋତ୍ତମ ଏକ୍ସପ୍ରେସ୍ । କିନ୍ତୁ କାଳିନ୍ଦୀ ଏକ୍ସପ୍ରେସ୍ ଟ୍ରାକରେ ଛିଡ଼ା ହୋଇ ଥିବା ନେଇ ସିଗନାଲ୍ ମ୍ୟାନ୍ କୌଣସି ସୂଚନା ପୁରୁଷୋତ୍ତମ ଏକ୍ସପ୍ରେସ୍ ଡ୍ରାଇଭରକୁ ଦେଇ ନଥିଲେ । ଫଳରେ ଏତେ ବଡ଼ ଦୁର୍ଘଟଣା ଘଟିଥିଲା ।
- ୧୯୯୯ ଅଗଷ୍ଟ ୧ ତାରିଖରେ ପଶ୍ଚିମବଙ୍ଗର ଗାଇସାଲ ଷ୍ଟେସନରେ ବଡ଼ ଧରଣର ଟ୍ରେନ୍ ଦୁର୍ଘଟଣା ହୋଇଥିଲା । ଆୱାଧ-ଆସାମ ଏକ୍ସପ୍ରେସ୍, ବ୍ରହ୍ମପୁତ୍ର ମେଲକୁ ଧକ୍କା ଦେବା ଫଳରେ ୩୦୦ ଜଣ ଯାତ୍ରୀଙ୍କ ମୃତ୍ୟୁ ହୋଇଥିଲା । ଷ୍ଟେସନ୍ ମାଷ୍ଟରଙ୍କ ଭୁଲ୍ ସୂଚନା ପାଇଁ ଏତେବଡ଼ ଦୁର୍ଘଟଣା ଘଟିଥିଲା ।
୧୯୯୮ ନଭେମ୍ବର ୨୬ ତାରିଖରେ ଟ୍ରେନ୍ ଟ୍ରାକରେ ଫାଟ ଯୋଗୁଁ ୨୧୨ ଜଣ ପ୍ରାଣ ହରାଇଥିଲେ । ପଞ୍ଜାବରେ ଏହି ଦୁର୍ଘଟଣା ଘଟିଥିଲା । କଲିକତାରୁ ଯାଉଥିବା ଜମ୍ମୁ ଏକ୍ସପ୍ରେସକୁ ଧକ୍କା ଦେଇଥିଲା ତାୱି-ସିଲଧ ଏକ୍ସପ୍ରେସ୍ । - ୨୦୧୮ ଏପ୍ରିଲ୍ ୨୬ରେ ଉତ୍ତରପ୍ରଦେଶର କୁଶିନଗରରେ ୧୩ ଜଣ ସ୍କୁଲ୍ ଛୁଆ ଟ୍ରେନ୍ ଦୁର୍ଘଟଣାରେ ପ୍ରାଣ ହରାଇଥିଲେ । ପ୍ରାୟ ୨୫ ସ୍କୁଲ୍ ଛୁଆଙ୍କୁ ନେଇ ଯାଉଥିବା ବସକୁ ଦ୍ରୁତଗତିରେ ଆସୁଥିବା ଟ୍ରେନ୍ ଧକ୍କା ଦେଇଥିଲା । ଗୋରଖପୁର ଠାରୁ ପ୍ରାୟ ୫୦ କିଲୋମିଟର ଦୂରରେ ଥିବା ଜଗୁଆଳୀ ବିହୀନ ରେଳ ଫାଟକରେ ଏହି ଦୁର୍ଘଟଣା ଘଟିଥିଲା ।
Comments are closed.